ന്യൂഡല്ഹി: സിനിമയ്ക്ക് ഇടയില് ദേശീയ ഗാനം കേള്ക്കുമ്പോള് തീയറ്ററില് എഴുന്നേറ്റു നില്ക്കേണ്ടതില്ലെന്ന് സുപ്രീംകോടതി. ഇതു സംബന്ധിച്ച ഹര്ജി പരിഗണിച്ച ജസ്റ്റിസുമാരായ ദീപക് മിശ്രയും ആര്. ഭാനുമതിയും അടങ്ങുന്ന രണ്ടംഗ ബെഞ്ചാണ് ഇക്കാര്യം വ്യക്തമാക്കിയത്.
സിനിമയുടേയോ ഡോക്യുമെന്ററിയുടെയോ വാര്ത്താപരിപാടികളുടെയോ ഭാഗമായി ചിത്രീകരിക്കപ്പെട്ട ദേശീയ ഗാനം കേള്ക്കുമ്പോള് എഴുന്നേറ്റു നില്ക്കേണ്ടതില്ലെന്നാണു കോടതി ഉത്തരവ്. എല്ലാ തീയറ്ററുകളിലും സിനിമ തുടങ്ങുന്നതിനു മുമ്പു ദേശീയഗാനം കേള്പ്പിക്കുകയും ആ സമയത്ത് സ്ക്രീനില് ദേശീയ പതാക പ്രദര്ശിപ്പിക്കുകയും വേണമെന്നുമുള്ള സുപ്രീംകോടതിയുടെ മുന് ഉത്തരവില് വ്യക്തതവരുത്തിയാണ് രണ്ടംഗബെഞ്ചിന്റെ നടപടി.
ആമിര്ഖാന് ചിത്രമായ ദംഗലില് സിനിമയുടെ ഭാഗമായി ദേശീയഗാനം ആലപിക്കുന്നതിനിടെ എണീറ്റുനില്ക്കാത്ത വൃദ്ധനെ അക്രമിച്ചത് വിവാദമായിരുന്നു. ഈ പശ്ചാത്തലത്തില് സുപ്രീംകോടതി വിധിയില് വ്യക്തത ആവശ്യപ്പെട്ടു കൊടുങ്ങല്ലൂര് ഫിലിംസൊസൈറ്റി ഉള്പ്പെടെയുള്ളവര് സമര്പ്പിച്ച പൊതുതാല്പ്പര്യ ഹര്ജിയിലാണ് രണ്ടംഗബെഞ്ചിന്റെ വിശദീകരണം. വിധിയില് കൂടുതല് വാദംകേള്ക്കണമെന്ന ഹര്ജിക്കാരുടെ ആവശ്യം രണ്ടംഗബെഞ്ച് പരിഗണിച്ചു.
ദേശീയഗാനം കേള്ക്കുമ്പോള് പ്രേക്ഷകര് എഴുന്നേറ്റുനിന്ന് ആദരവ് കാണിക്കണമെന്നും ഇതിലൂടെ ജനങ്ങളില് രാജ്യസ്നേഹവും ദേശീയബോധവും ഉണര്ത്താന് കഴിയുമെന്നുമാണ് നവംബറില് ജസ്റ്റിസ് ദീപക് മിശ്രയുടെ നേതൃത്വത്തിലുള്ള ബെഞ്ച് ഉത്തരവിട്ടത്.
ഇതു സംബന്ധിച്ച് രാജ്യത്ത് ചര്ച്ച സജീവമാകുന്നതിനിടെ കേരളത്തിലടക്കം തിയേറ്ററില് ദേശീയഗാനം ആലപിച്ചപ്പോള് എഴുന്നേറ്റു നില്ക്കാത്തവര്ക്കെതിരേ പോലീസ് കേസെടുക്കുകയും ചെയ്തിരുന്നു.
അംഗപരിമിതര് ഉള്പ്പെടെയുള്ളവര് ഈ സമയം എന്തുചെയ്യണമെന്നതടക്കമുള്ള നിര്ദേശങ്ങള് ഇല്ലാത്തതിനാല് സുപ്രീംകോടതി ഉത്തരവില് വ്യക്തത കുറവുണ്ടെന്ന് കേസിലെ അമിക്കസ്ക്യൂറി സിദ്ധാര്ത്ത് ലുത്ര അറിയിച്ചു. ഈ സമയം അംഗപരിമിതര് എങ്ങിനെയാണ് ആദരവ് പ്രകടിപ്പിക്കേണ്ടതെന്ന കേന്ദ്ര ആഭ്യന്തരമന്ത്രാലയത്തിന്റെ മാര്ഗനിര്ദേശങ്ങള് അറ്റോര്ണി ജനറല് മുകുള് റോത്തകി സുപ്രിംകോടതിയില് സമര്പ്പിച്ചു.
ഇതേതുടര്ന്ന് കേസില് വിശദവാദംകേള്ക്കേണ്ടതുണ്ടെന്നു കോടതി നിരീക്ഷിച്ചു. ഹര്ജികള് പരിഗണിക്കുന്നത് ഏപ്രില് 18ലേക്കു മാറ്റുകയും ചെയ്തു.
ദേശീയഗാനം നിര്ബന്ധമാക്കിയ ഇടക്കാല ഉത്തരവ് റദ്ദാക്കണമെന്ന് കൊടുങ്ങല്ലൂര് ഫിലിം സൊസൈറ്റിക്കു വേണ്ടി ഹാജരായ മുതിര്ന്ന അഭിഭാഷകന് ചന്ദര് ഉദയ് സിങ്ങും അഡ്വ. പി.വി ദിനേഷും ആവശ്യപ്പെട്ടു.
സിനിമക്കു മുമ്പ് ദേശീയഗാനം കേള്പ്പിക്കാനും ആ സമയത്ത് എണീറ്റുനില്ക്കാനും നിര്ബന്ധമാക്കിയതു കാരണം തീയറ്ററുകളില് ചിലര് സദാചാര പോലീസ് ചമയുകയാണെന്നു ഹര്ജിക്കാര് വാദിച്ചു. എന്നാല് ഈ വാദം ബെഞ്ച് തള്ളി.
തീയറ്ററില് ദേശീയഗാനം നിര്ബന്ധമാക്കിയതിനോടു യോജിപ്പില്ലെന്ന നിലപാട് വ്യക്തമാക്കി, ഈ സമയം കോടതിയിലുണ്ടായിരുന്ന മുതിര്ന്ന അഭിഭാഷകന് ഇടപെട്ടു. എന്നാല് ഇവിടെ ഇത് നിങ്ങള് അംഗീകരിക്കുന്നുണ്ടോ ഇല്ലയോ എന്നതല്ല വിഷയമെന്നും അതു ശരിയോ തെറ്റോ എന്നതാണെന്നും ജസ്റ്റിസ് ദീപക് മിശ്ര പ്രതികരിച്ചു. തുടര്ന്നാണ് കൂടുതല് സംവാദമാകാമെന്ന് ജഡ്ജി വ്യക്തമാക്കിയത്.
