തിരുവനന്തപുരം: പിഎം ശ്രീയില് സിപിഐ ഇടഞ്ഞുനില്ക്കുന്നതിനിടയില് സിപിഐ ആസ്ഥാനമായ എംഎന് സ്മാരകം സന്ദര്ശിച്ച് വിദ്യാഭ്യാസമന്ത്രി വി. ശിവന്കുട്ടി. ഇന്ന് രാവിലെ സിപിഐ ആസ്ഥാനത്ത് എത്തിയ ശിവന്കുട്ടി സിപിഐ സംസ്ഥാന സെക്രട്ടറി ബിനോയ് വിശ്വവുമായി കൂടിക്കാഴ്ച്ച നടത്തി. സിപിഐയെ അനുനയിപ്പിക്കാനുള്ള നീക്കത്തിന്റെ ഭാഗമാണ് സന്ദര്ശനമെന്നാണ് കരുതുന്നത്.
എന്നാല് കൂടിക്കാഴ്ചയെക്കുറിച്ച് പ്രതികരിക്കാന് മന്ത്രി തയ്യാറായില്ല. എല്ലാ പ്രശ്നങ്ങളും തീരും എന്ന് മാത്രമാണ് മന്ത്രി പറഞ്ഞ്. ചര്ച്ചയുടെ വിശദാംശങ്ങള് വെളിപ്പെടുത്തുന്നില്ലെന്നും മന്ത്രി പറഞ്ഞു. മന്ത്രി ജി ആര് അനിലും കൂടിക്കാഴ്ചയില് പങ്കെടുത്തിരുന്നു. പിഎം ശ്രീ പദ്ധതിയില് ഒപ്പിടാനുണ്ടായ സാഹചര്യം വിശദീകരിക്കാനും പ്രതിഷേധത്തില് നിന്നും പിന്മാറാന് ആവശ്യപ്പെടാനുമാണ് മന്ത്രി എത്തിയതെന്നാണ് കരുതുന്നത്. പദ്ധതിയില് ഒപ്പിട്ടത് വലിയ വിവാദമായതിനിടയില് അനുനയത്തിനായി പാര്ട്ടി ശിവന്കുട്ടിയെ തന്നെ ചുമതലപ്പെടുത്തുകയായിരുന്നു.
ഇതെന്തൊരു സര്ക്കാരെന്ന് ചോദിച്ചായിരുന്നു മന്ത്രിസഭയുടെ കൂട്ടുത്തരവാദിത്വമില്ലായ്മയെ കഴിഞ്ഞ ദിവസം ബിനോയ് വിശ്വം വിമര്ശിച്ചത്. എല്ഡിഎഫ് ഈ രീതിയില് മുന്നോട്ട് പോവുകയാണെങ്കില് അപ്പോള് കാണാമെന്ന വെല്ലുവിളിയും ബിനോയ് വിശ്വം നടത്തിയിരുന്നു. തിങ്കളാഴ്ച ചേരുന്ന സംസ്ഥാന എക്സിക്യൂട്ടിവ് യോഗം തുടര്നീക്കങ്ങള് എങ്ങനെ വേണമെന്ന് തീരുമാനിക്കും.
നിലപാടില് നിന്നും ഒരിഞ്ച് പിന്നോട്ടില്ലെന്ന നിലപാടിലാണ് സിപിഐ. ഒപ്പിട്ട ധാരണാപത്രം പിന്വലിക്കണമെന്നാണ് മുതിര്ന്ന സിപിഐ നേതാവ് പ്രകാശ് ബാബു ഇന്ന് രാവിലെ പ്രതികരിച്ചത്. സിപിഐ മുഖപത്രം ജനയുഗത്തിലും വിദ്യാഭ്യാസ വകുപ്പിനെതിരെ രൂക്ഷവിമര്ശനം ഉയര്ത്തിയിരുന്നു. ബംഗാളിലെ വീഴ്ച ആവര്ത്തിക്കരുതെന്നാണ് സിപിഐ കേന്ദ്രസെക്രട്ടറിയേറ്റിന്റെ മുന്നറിയിപ്പ്.
