ബോളിവുഡിന്റെ കിംഗ് ഖാന് ഷാരൂഖ് ഖാന് അറുപതിന്റെ നിറവിലാണ്. ആരാധകരും സഹതാരങ്ങളും സുഹൃത്തുക്കളും സെലിബ്രിറ്റികളുമടക്കം നിരവധി പേരാണ് താരത്തിന് ഹൃദയത്തില് ചാലിച്ച ആശംസകള് നേര്ന്നത്. എല്ലാവരും തങ്ങളുടെ കിംഗ് ഖാനെ സ്നേഹം കൊണ്ട് മൂടുകയും എത്രത്തോളം ആരാധിക്കുകയും ചെയ്യുന്നുണ്ടെന്ന് കുറിപ്പിലൂടെ വ്യക്തമാക്കി.
ഇപ്പോഴിതാ അക്കൂട്ടത്തില് ഏറെ ശ്രദ്ധിക്കപ്പെടുന്നത് കോണ്ഗ്രസ് നേതാവും തിരുവനന്തപുരം എം.പി.യുമായ ശശി തരൂരിന്റെ ആശംസയാണ്. സോഷ്യല് മീഡിയയില് തരംഗമാകുന്ന ആശംസയില് ഷാരൂഖിന്റെ പ്രായം അങ്ങേയറ്റം സംശയാസ്പദമാണെന്ന് തമാശരൂപേണ ചൂണ്ടിക്കാട്ടിക്കൊണ്ടാണ് തരൂര് എക്സില് കുറിച്ചത്. ഈ ‘ഫാക്ട് ചെക്കിംഗ് റിപ്പോർട്ട്’ പങ്കുവെച്ച തരൂര് ബോളിവുഡിന്റെ യഥാർത്ഥ കിംഗ് ആയ ഷാരൂഖിന് 60 വയസ് തികഞ്ഞു എന്ന വാദത്തെ ചോദ്യം ചെയ്യാൻ മൂന്ന് പ്രധാന തെളിവുകളും നിരത്തി. ഷാരൂഖിന്റെ എനർജിലെവല്, 20 വർഷം മുമ്പത്തേക്കാള് ഷാരൂഖ് ഊർജ്ജസ്വലനാണ്, പ്രായത്തിന്റെ ലക്ഷണങ്ങളില്ല എന്നതടക്കം കണ്ടെത്താന് പ്രഗത്ഭരായ വിദഗ്ദ്ധർക്ക് പോലും സാധിക്കുന്നില്ല എന്നാണ് തന്റെ ഔദ്യോഗിക എക്സ് അക്കൗണ്ടിലൂടെ തരൂര് കുറിച്ചത്.
‘‘ബോളിവുഡിലെ ആത്യന്തിക രാജാവ് ഷാരൂഖ് ഖാന്റെ 60-ാം ജന്മദിനം
ഈ ‘60’ എന്ന സംഖ്യ വളരെ സംശയാസ്പദമാണെന്ന് ഞാൻ സമ്മതിക്കുന്ന. സ്വതന്ത്ര വസ്തുതാ പരിശോധകരും ഫോറൻസിക് ഡിറ്റക്ടീവുകളും അടങ്ങുന്ന ഒരു സംഘം ഈ ‘60’ എന്ന അവകാശവാദം അന്വേഷിച്ചപ്പോള് കണ്ടെത്തിയത് ഇങ്ങനെ. ‘വ്യക്തമായ ദൃശ്യ തെളിവുകളുടെ പൂർണ്ണവും സമ്പൂർണ്ണവുമായ അഭാവത്തിൽ പ്രത്യേകിച്ച്, ഫോട്ടോഷോപ്പ് ചെയ്യാത്ത നരച്ച മുടിയില്ല, മുടിയിഴകളില് കൂടുതല് യുവത്വം, ത്വക്കില് ചുളിവുകളില്ല, ഗണ്യമായി പ്രായം കുറഞ്ഞ ഒരാളുടെ സ്ഥിരമായ രൂപമല്ല, പ്രായത്തിന്റെ ലക്ഷണങ്ങളില്ല...ഇതൊക്കെ ഷാരൂഖ് ഖാൻ 60 വയസ്സ് തികയുന്നു എന്ന അവകാശവാദം വസ്തുതാപരമായി സ്ഥിരീകരിക്കാൻ കഴിയില്ല...’’
ഔദ്യോഗിക കഥ ഒരു മറച്ചുവെക്കലാണെന്നും ‘ദി ക്യൂരിയസ് കേസ് ഓഫ് ബെഞ്ചമിൻ ബട്ടൺ’ എന്ന സിനിമയുടെ ആഗോളതലത്തിലുള്ള ഒരു യഥാർത്ഥ ബോളിവുഡ് പതിപ്പിലാണ് ഷാരൂഖ് അഭിനയിക്കുന്നതെന്നും ഞാൻ സംശയിക്കുന്നു. അയാൾക്ക് വിപരീതമായി പ്രായമാകുകയാണ്.
തെളിവുകൾ നോക്കൂ:
1. ഇന്ന് അദ്ദേഹത്തിന്റെ ഊർജ്ജ നില 20 വർഷം മുമ്പുള്ളതിനേക്കാൾ ഉയർന്നതായി തോന്നുന്നു.
2. അദ്ദേഹത്തിന്റെ ഹെയർസ്റ്റൈൽ ക്രമേണ കൂടുതൽ യുവത്വമുള്ളതായി മാറിയിരിക്കുന്നു.
3. മാന്യമായ ഒരു ലൈറ്റിംഗ് ടീമിനും വിശദീകരിക്കാൻ കഴിയാത്ത ചുളിവുകൾ ഇല്ല.
ഷാരൂഖ് തന്റെ ‘70-ാം ജന്മദിനം ആഘോഷിക്കുമ്പോഴേക്കും അയാള് കൗമാരക്കാരായ വേഷങ്ങൾക്കായി ഓഡിഷൻ നടത്തുമെന്ന് ഞാൻ പ്രവചിക്കുന്നു. ഭാഗ്യവശാൽ, ഒരു ഷാരൂഖ് ബാലതാരമായി മാറുമ്പോൾ ഞാൻ അവിടെ ഉണ്ടാകുമെന്ന് പ്രതീക്ഷിക്കുന്നില്ല.
ഈ അവിശ്വസനീയമായ നാഴികക്കല്ലിന് അഭിനന്ദനങ്ങൾ, ഷാരൂഖ്... ദയവായി ഭൗതികശാസ്ത്രത്തെയും ജീവശാസ്ത്രത്തെയും വെല്ലുവിളിക്കുകയും വരും വർഷങ്ങളിൽ നമ്മളെയെല്ലാം ആശയക്കുഴപ്പത്തിലാക്കുകയും ചെയ്യുക.
ജന്മദിനാശംസകൾ എസ്ആര്കെ കിംഗ് ഖാൻ...’’ എന്നാണ് ശശി തരൂര് കുറിച്ചിരിക്കുന്നത്. ഈ രസകരമായ പോസ്റ്റ് ഷാരൂഖ് ഖാൻ ആരാധകർ ഏറ്റെടുക്കുകയും സോഷ്യല് മീഡിയയില് വൈറലാക്കുകയും ചെയ്തു. തരൂരിന്റെ തമാശ നിറഞ്ഞ ചോദ്യങ്ങള്ക്ക് കിംഗ് ഖാൻ എന്ത് മറുപടി നല്കുമെന്ന ആകാംക്ഷയിലാണ് ആരാധകർ.
Happy 60th Birthday to the ultimate King of Bollywood, Shah Rukh Khan @iamsrk !
I have to admit, I'm finding this "60" number deeply suspicious. A crack team of independent fact-checkers and forensic detectives investigated this "60" claim & concluded: "In the complete and… pic.twitter.com/wnidSFbTDX— Shashi Tharoor (@ShashiTharoor) November 2, 2025
