ബോളിവുഡ് താരം അര്ജുന് കപൂറിനും സഹോദരി അന്ഷുല കപൂറിനും തങ്ങളുടെ പ്രിയപ്പെട്ട അമ്മ മോണ കപൂറിനെ നഷ്ടപ്പെട്ടിട്ട് 14 വര്ഷം തികയുന്നു. അമ്മയുടെ ചരമവാര്ഷിക ദിനത്തില് ഹൃദയം നുറുങ്ങുന്ന വേദനയോടെയാണ് ഇരുവരും തങ്ങളുടെ അമ്മയെ ഓര്ത്തത്.
‘14 വര്ഷങ്ങള് കഴിഞ്ഞു... ഇന്നും അമ്മയില്ലാതെ ഞങ്ങള് തളര്ന്നിരിക്കുകയാണ്,’ എന്നായിരുന്നു അര്ജുന് കപൂര് സോഷ്യല് മീഡിയയില് കുറിച്ചത്. ഒരു തകര്ന്ന ഹൃദയത്തിന്റെ ഇമോജിക്കൊപ്പം പങ്കുവെച്ച ഈ വരികള് ആരാധകരുടെ ഉള്ളുലയ്ക്കുന്നതായിരുന്നു.
അന്ഷുലയും തന്റെ അമ്മയെക്കുറിച്ചുള്ള ഹൃദയസ്പര്ശിയായ ഒരു കുറിപ്പ് പങ്കുവെച്ചു.അമ്മയുടെ സാന്നിധ്യത്തില് താന് അനുഭവിച്ചിരുന്ന ആ പഴയ സുരക്ഷിതബോധത്തെയാണ് താന് ഏറ്റവും കൂടുതല് മിസ്സ് ചെയ്യുന്നതെന്ന് അന്ഷുല പറയുന്നു.അമ്മയ്ക്കൊപ്പമുള്ള ഓരോ നിമിഷവും തനിക്ക് ഓര്മ്മയുണ്ടാകില്ലായിരിക്കാം, എന്നാല് അമ്മയുടെ സ്നേഹം എങ്ങനെയുള്ളതായിരുന്നു എന്ന് തനിക്ക് വ്യക്തമായി ഓര്മ്മയുണ്ടെന്നും അവര് കൂട്ടിച്ചേര്ത്തു.
അമ്മേ, നിങ്ങളെക്കുറിച്ചുള്ള എല്ലാം ഇപ്പോള് എനിക്ക് ഓര്മ്മയില്ലായിരിക്കാം, പക്ഷേ നിങ്ങളുടെ തണലില് കഴിഞ്ഞിരുന്ന ആ അനുഭവം എനിക്കോര്മ്മയുണ്ട്. ചെറിയ തലവേദനയോ മോശമായ ഒരു ദിവസമോ ആയി നിങ്ങളുടെ അടുത്ത് വരുമ്പോള്, അത് വലിയ കാര്യമായിക്കണ്ട് നിങ്ങള് കേട്ടിരുന്ന ആ രീതി ഞാന് ഇന്നും ഓര്ക്കുന്നു, അന്ഷുല കുറിച്ചു.
നിങ്ങളുടെ സാന്നിധ്യത്തില് മാത്രം നിലനിന്നിരുന്ന എന്റെ ഒരു പതിപ്പുണ്ടായിരുന്നു അതാണ് എനിക്ക് ഏറ്റവും കൂടുതല് നഷ്ടമായതെന്ന് ഞാന് കരുതുന്നു. നിങ്ങളെ മാത്രമല്ല, നിങ്ങള് എന്നെ നോക്കിക്കണ്ടിരുന്ന ആ രീതിയെക്കൂടിയാണ് ഞാന് മിസ്സ് ചെയ്യുന്നത്, അവര് കൂട്ടിച്ചേര്ത്തു.
നിങ്ങളുടെ കൈ പിടിച്ചിട്ട് 14 വര്ഷങ്ങള് കഴിഞ്ഞു, ചില ദിവസങ്ങളില് ഇപ്പോഴും ഞാന് ഓര്ത്തുപോകും, 'ഇതമ്മയോട് പറയണം' എന്ന്. ആ തോന്നല് ഒരിക്കലും മാറില്ല. കാരണം എനിക്ക് എപ്പോഴും എന്റെ അമ്മയെ വേണം. ഓരോ ദിവസവും നിങ്ങളെ മിസ്സ് ചെയ്യുന്നു. എന്നും നിങ്ങളെ സ്നേഹിക്കുന്നു,' എന്ന് പറഞ്ഞുകൊണ്ടാണ് ആ കുറിപ്പ് അവസാനിക്കുന്നത്.
ഓര്മ്മകള് മങ്ങുന്നത് സങ്കടകരമായ ഒരു ഘട്ടമാണെങ്കിലും, ചില കാര്യങ്ങള് മറന്നുപോകുന്നു എന്നതിനര്ത്ഥം ആ വ്യക്തിയെ മറക്കുന്നു എന്നല്ലെന്നും അന്ഷുല തന്റെ കുറിപ്പില് വ്യക്തമാക്കി.
ബോളിവുഡ് നിര്മ്മാതാവ് ബോണി കപൂറിന്റെ ആദ്യ ഭാര്യയായിരുന്നു മോണ കപൂര്. 2012 മാര്ച്ച് 25-നാണ് കാന്സര് ബാധയെത്തുടര്ന്ന് അവര് അന്തരിച്ചത്.
