തിരുവനന്തപുരം: തെരഞ്ഞെടുപ്പ് അവസാനഘട്ടത്തിലേക്ക് കടക്കുമ്പോള്, ഗള്ഫ് രാജ്യങ്ങളില് നിന്നുള്ള പ്രവാസി വോട്ടര്മാരുടെ വരവ് ഇത്തവണ ഗണ്യമായി കുറയാനിടയുണ്ടെന്ന ആശങ്ക ഉയരുന്നു. ഗള്ഫ് സംഘര്ഷത്തെത്തുടര്ന്ന് വിമാനക്കൂലി കുത്തനെ വര്ധിച്ചതും സര്വീസുകള് വെട്ടിക്കുറച്ചതുമാണ് പ്രധാന കാരണം.
സാധാരണ തെരഞ്ഞെടുപ്പ് സമയങ്ങളില് ആയിരക്കണക്കിന് പ്രവാസികള് നാട്ടിലെത്തി വോട്ട് രേഖപ്പെടുത്താറുണ്ട്. എന്നാല് ഇത്തവണ ടിക്കറ്റ് നിരക്കുകള് ഇരട്ടിയിലധികം ഉയര്ന്നതോടെ പലര്ക്കും യാത്ര പ്രായോഗികമല്ലാതായി. ചിലര്ക്ക് ഒരു കുടുംബമായി നാട്ടിലെത്താന് ലക്ഷങ്ങള് ചെലവാകുന്ന സാഹചര്യം ഉണ്ടാകുന്നു.
ഇതോടൊപ്പം ഗള്ഫ് മേഖലയിലേക്കുള്ള വിമാന സര്വീസുകള് കുറച്ചതും പ്രശ്നം രൂക്ഷമാക്കി.
സീറ്റുകളുടെ കുറവ് മൂലം ടിക്കറ്റ് ലഭ്യതയും ബുദ്ധിമുട്ടിലായതോടെ, വോട്ടുചെയ്യാന് ആഗ്രഹമുള്ളവര്ക്കുപോലും യാത്ര സാധ്യമാകുന്നില്ല. ഇത്തരം സാഹചര്യത്തില്, ഭൂരിഭാഗം പേരും യാത്ര ഒഴിവാക്കാനാണ് തീരുമാനിക്കുന്നത്. ഇതോടെ കഴിഞ്ഞ തെരഞ്ഞെടുപ്പിനെ അപേക്ഷിച്ച് പോളിങ് ശതമാനത്തില് കുറവ് ഉണ്ടാകുമെന്ന വിലയിരുത്തലും ഉയരുന്നു.രാഷ്ട്രീയ ക്യാമ്പുകളിലും ആശങ്കപ്രവാസി വോട്ടുകള് നിര്ണായകമായ നിരവധി മണ്ഡലങ്ങളില് ഈ സാഹചര്യം സ്ഥാനാര്ത്ഥികളെ ആശങ്കയിലാഴ്ത്തിയിട്ടുണ്ട്. ഗള്ഫ് മേഖലയില് നിന്നുള്ള വോട്ടര്മാരുടെ പങ്കാളിത്തം കുറഞ്ഞാല് ഫലത്തെ സ്വാധീനിക്കാമെന്ന കണക്കുകൂട്ടലിലാണ് വിവിധ മുന്നണികള്. തെരഞ്ഞെടുപ്പ് പോരാട്ടം കടുപ്പമാകുന്ന ഘട്ടത്തില്, വോട്ടര്മാര് എത്തുമോഎന്ന ചോദ്യമാണ് ഇപ്പോള് പല സ്ഥാനാര്ത്ഥികളെയും അലട്ടുന്നത്. ഈ പ്രതിസന്ധി, ഇത്തവണത്തെ തെരഞ്ഞെടുപ്പില് നിര്ണായകമാകും.
സുനില് ജെ. സണ്ണി
