തിരൂര്: പോളിംഗ് ബൂത്തിനരികെ സംഘംചേര്ന്ന് നിന്നെന്ന പേരില് തിരൂര് എസ്.എച്ച്.ഒ. അനില്കുമാര് മേപ്പള്ളിയുടെ നേതൃത്വത്തില് പോലീസ് കസ്റ്റഡിയിലെടുത്ത യുവാക്കളെ തിരൂര് നിയോജക മണ്ഡലത്തിലെ മുസ്ലീംലീഗ് സ്ഥാനാര്ഥി കുറുക്കോളി മൊയ്തീന് പോലീസ് സ്റ്റേഷനിലെത്തി മോചിപ്പിച്ചു. പറവണ്ണ ഗവ. എല്.പി, യു.പി. സ്കൂളിലെ രണ്ട് പോളിംഗ് ബൂത്തുകളില്നിന്നാണ് കൊണ്ടാരന്റ പുരക്കല് സഹദ് (25), കുന്നത്തകത്ത് പുതിയില് റബീസ് (18), അരയന്റ പുരക്കല് ഹംസ തുടങ്ങിയ എട്ടോളം പേരെയാണ് പോലീസ് പിടികൂടിയത്. രോഗികളായ ചിലരെ ബൂത്തിലേക്ക് വാഹനങ്ങളില് കൊണ്ടുവരുന്നത് തടയാന് ശ്രമിച്ച പോലീസ് നടപടി നാട്ടുകാരില് ചിലര് ചോദ്യം ചെയ്തതാണ് പോലീസിനെ പ്രകോപിപ്പിച്ചത്.
എസ്.എച്ച്.ഒ. അകാരണമായി പ്രവര്ത്തകരെ പിടിച്ച് വണ്ടിയില് കയറുകയും ഭീതി സൃഷ്ടിക്കുകയുമായിരുന്നുവെന്നു നാട്ടുകാര് പറഞ്ഞു. വിവരമറിഞ്ഞയുടന് കുറുക്കോളി ബൂത്തുകളിലെ സന്ദര്ശനം നിര്ത്തിവച്ച് പോലീസ് സ്റ്റേഷനിലെത്തി. യു.ഡി.എഫ്. ഭാരവാഹികളായ ഫൈസല് എടശേരി, ലത്തീഫ് പള്ളത്ത് എന്നിവരുമുണ്ടായിരുന്നു. കുറുക്കക്കോളിയെത്തിയപ്പോള് പിടിച്ചു കൊണ്ടുവന്ന പ്രവര്ത്തകരെ പോലീസ് സ്റ്റേഷനില് എത്തിച്ചിട്ടുണ്ടായിരുന്നില്ല. എസ്.എച്ച്.ഒയുമായി കുറുക്കോളി ഫോണില് ബന്ധപ്പെട്ട് യു.ഡി.എഫ്. പ്രവര്ത്തകരെ വിട്ടുകിട്ടണമെന്നാവശ്യപ്പെടുകയായിരുന്നു.
ചാനലുകള് വാര്ത്ത സംപ്രേക്ഷണം ചെയ്തു തുടങ്ങിയതോടെ പോലീസ് നിലപാടില് അയവ് വരുത്തി. കുറുക്കോളി എസ്.പി. അടക്കമുള്ള ഉന്നത ഉദ്യോഗസ്ഥരുമായി ഫോണില് ബന്ധപ്പെടുകകൂടി ചെയ്തതോടെ പോലീസ് യുവാക്കളെ വിട്ടയച്ചു. തിരൂര് നിയോജക മണ്ഡലം യു.ഡി.എഫ്. ജനറല് കണ്വീനര് വെട്ടം ആലിക്കോയയുടെ നേതൃത്വത്തില് യു.ഡി.എഫ്. പ്രവര്ത്തകരും പോലീസ് സ്റ്റേഷനിലെത്തിയിരുന്നു.
