കണ്ണൂര്: അഞ്ചരക്കണ്ടി മെഡിക്കല് കോളജിലെ ബി.ഡി.എസ് വിദ്യാര്ത്ഥി നിതിന് രാജിന്റെ ആത്മഹത്യയില് അതിശക്തമായ പ്രതികരണവുമായി മുഖ്യമന്ത്രി പിണറായി വിജയന്. ഒരു മിടുക്കനായ വിദ്യാര്ത്ഥിയെ മരണത്തിലേക്ക് നയിച്ച സാഹചര്യങ്ങള് മാപ്പര്ഹിക്കാത്ത കുറ്റമാണെന്നും അദ്ദേഹം വ്യക്തമാക്കി. ക്യാമ്പസുകളിലെ വിവേചനം തടയാന് 'രോഹിത് വെമുല ആക്റ്റ്' നടപ്പിലാക്കണമെന്നും പറഞ്ഞു.
ഡോ. ബി.ആര്. അംബേദ്കര് ജയന്തി ദിനത്തോടനുബന്ധിച്ച് സോഷ്യല് മീഡിയയില് പങ്കുവെച്ച കുറിപ്പിലാണ് കേരളത്തെ നടുക്കിയ ഈ സംഭവത്തെക്കുറിച്ച് അദ്ദേഹം മനസ്സ് തുറന്നത്. കേരളം പോലൊരു പുരോഗമന സമൂഹത്തിന് ഒട്ടും നിരക്കാത്ത കാര്യങ്ങളാണ് നിതിന് രാജിന്റെ മരണവുമായി ബന്ധപ്പെട്ട് പുറത്തുവരുന്നത്. ഉന്നത വിദ്യാഭ്യാസ മേഖലയില് പോലും ജാതീയമായ വിവേചനങ്ങള് തിരിച്ചുവരുന്നത് അങ്ങേയറ്റം ആശങ്കാജനകമാണ്. നമ്മള് നേടിയെടുത്ത സാമൂഹിക മൂല്യങ്ങള് നഷ്ടപ്പെടുന്നുണ്ടോ എന്ന് പുനര്ചിന്തനം നടത്തേണ്ട സമയമാണിത്.
ക്യാമ്പസുകളിലെ വിവേചനം തടയാന് 'രോഹിത് വെമുല ആക്റ്റ്' നടപ്പിലാക്കണമെന്ന ആവശ്യം കേന്ദ്ര സര്ക്കാര് അവഗണിക്കുകയാണെന്ന് മുഖ്യമന്ത്രി കുറ്റപ്പെടുത്തി. നിലവിലെ യു.ജി.സി മാര്ഗനിര്ദ്ദേശങ്ങള് സുപ്രീംകോടതി മരവിപ്പിച്ച സാഹചര്യവും അദ്ദേഹം ചൂണ്ടിക്കാട്ടി. ജാതി രഹിതവും സമത്വപൂര്ണ്ണവുമായ ഒരു സമൂഹത്തിനായി പോരാടിയ അംബേദ്കറുടെ ആശയങ്ങള് മുറുകെ പിടിക്കണം. വിദ്വേഷത്തിനും വിഭജനത്തിനുമെതിരെ ഒരുമിച്ച് നില്ക്കണമെന്നും അദ്ദേഹം ആഹ്വാനം ചെയ്തു.
തിരുവനന്തപുരം ഉഴമലക്കല് സ്വദേശിയായ നിതിന് രാജിന്റെ കുടുംബത്തിനൊപ്പമാണ് കേരളമെന്നും, കുറ്റക്കാര്ക്കെതിരെ കര്ശന നിലപാട് ഉണ്ടാകുമെന്ന സൂചനയും മുഖ്യമന്ത്രിയുടെ വാക്കുകളിലുണ്ട്. എല്ലാവര്ക്കും അംബേദ്കര് ജയന്തി ആശംസകള് നേര്ന്നിട്ടുണ്ട്.
