ഹിന്ദി സിനിമയിലൂടെ അരങ്ങേറ്റം കുറിച്ച് പിന്നീട് തമിഴ്, മലയാളം ഭാഷകളിലും സജീവമായി തിളങ്ങിയ താരമാണ് ജ്യോതിക. തുടക്കം ഹിന്ദിയിലെങ്കിലും പിന്നീട് താരത്തിന് ഏറെ സ്വീകാര്യത ലഭിച്ചത് തമിഴകത്തു നിന്നാണ്. വാലി, ഖുഷി, തെനാലി, പൂവെല്ലാം ഉൻ വാസം, കാക്ക കാക്ക, പേരഴകൻ, വേട്ടയാട് വിളൈയാട്, മൊഴി...തുടങ്ങിയ സിനിമകളിലൂടെ താരത്തിന്റെ കരിയർഗ്രാഫ് ഉയരുകയും ചെയ്തു.
കരിയറിന്റെ പീക്ക് ടൈമിലാണ് താരം തമിഴകത്തിന്റെ പ്രിയതാരം സൂര്യയെ പ്രണയിച്ച് വിവാഹം ചെയ്തത്. പിന്നീട് സൂര്യയുടെയും മക്കളുടെയും കാര്യങ്ങള് നോക്കി കുടുംബിനിയായി താരം ഒതുങ്ങിക്കൂടി. മക്കള് ഒരു പ്രായമെത്തിക്കഴിഞ്ഞപ്പോള് താരം വീണ്ടും കരിയറിലേക്ക് ഫോക്കസ് ചെയ്തു. ആ സമയത്ത് കരുത്തും പിന്തുണയുമായി സൂര്യയുമുണ്ടായിരുന്നു. സിനിമാലോകത്തിലെ മാതൃക ദമ്പതിമാരാണ് സൂര്യയും ജ്യോതികയും. ബിഗ് സ്ക്രീനിലേക്ക് മടങ്ങിയെത്തിയ താരം സോഷ്യല് മീഡിയയിലും സജീവമാണ്. തന്റെ ഫിറ്റ്നെസ് വീഡിയോകളും താരം അതിലൂടെ പങ്കിടാറുണ്ട്.
ഇപ്പോഴിതാ മഞ്ഞ സാരിയില് അതിസുന്ദരിയായി തിളങ്ങി നില്ക്കുന്ന ചിത്രങ്ങള് പങ്കിടുകയാണ് ജ്യോതിക. മഞ്ഞ സാരിയും സ്ലീവ്ലെസ് ബ്ലൗസും കൈ നിറയെ പച്ച കുപ്പിവളകളും ധരിച്ച താരം ട്രഡീഷണല് ലുക്കില് എലഗന്റാണ്. മഞ്ഞ കാഞ്ചീവരം സിൽക്ക് സാരി സൂക്ഷ്മവും സ്വയം നെയ്തതുമായ മോട്ടിഫുകളാൽ അലങ്കരിച്ചിട്ടുണ്ട്. അതിലോലമായ പച്ച സെൽവെഡ്ജ് അല്ലെങ്കിൽ ട്രിം ഉപയോഗിച്ച് മനോഹരമായി ഫ്രെയിം ചെയ്തിരിക്കുകയാണ് സാരി. പല്ലുവിൽ സങ്കീർണ്ണമായ സ്വർണ്ണ സാരി വർക്കാണുള്ളത്. ശുദ്ധമായ മൾബറി സിൽക്കിൽ നിന്ന് നിർമ്മിച്ച ഈ സാരി ഒരു ആഡംബര ഡ്രാപ്പും സുഖകരമായ അനുഭവവും നൽകുന്നു.
‘‘സൂര്യൻ പ്രകാശിക്കുന്നു, ജീവിതം പ്രകാശിക്കുന്നു,
കാലം നീങ്ങുന്ന ശബ്ദത്തിൽ പകലുകൾ പൂക്കുന്നു.
നിന്റെ പുഞ്ചിരി എന്നെ തൊടുന്ന നിമിഷം,
ലോകം മുഴുവൻ വെളിച്ചത്തിൽ നനഞ്ഞിരിക്കുന്നു....ഞങ്ങളുടെ മനോഹരമായ വെയിൽ കാഞ്ചീപുരം സാരിയിൽ ജ്യോതിക...
ഗ്രാമീണ ഇന്ത്യയിലെ നൂറുകണക്കിന് കുട്ടികൾക്ക് വിദ്യാഭ്യാസത്തെ പിന്തുണയ്ക്കുകയും പുഞ്ചിരി സമ്മാനിക്കുകയും ചെയ്തുകൊണ്ട് മറ്റൊരു പുതുവർഷം ആരംഭിക്കുന്നതിൽ സന്തോഷമുണ്ട്. ഈ മനോഹരമായ യാത്രയുടെ ഭാഗമായതിന് ജ്യോതികയ്ക്ക് നന്ദി....’’ എന്ന ക്യാപ്ഷന് നല്കി മാധുര്യ ക്രിയേഷന്സ് തങ്ങളുടെ സന്തോഷം പ്രകടിപ്പിച്ചിരിക്കുന്നത്.
ചിത്രങ്ങള് ശ്രദ്ധിക്കപ്പെട്ടതോടെ കമന്റുകളും നിറയുന്നുണ്ട്. ‘മഞ്ഞ സാരിയിൽ ജ്യോതികയെ കാണാൻ പ്രത്യേക ഭംഗി, ഇന്നും ജ്യോതികയുടെ ഭംഗിക്ക് കോട്ടം വന്നിട്ടില്ല, സൂര്യയെ പോലെ പ്രായമാകുന്തോറും ജ്യോതികയ്ക്കും ഭംഗി കൂടുകണ്, 47 കാരിയായ ജ്യോതിക ഈ പ്രായത്തിലും സുന്ദരിയാണ്....’ എന്നതടക്കമാണ് കമന്റുകള്. സൗന്ദര്യത്തിന്റെ രഹസ്യം എന്തെന്ന് ചോദിച്ചപ്പോൾ ഭർത്താവ് എന്നെ നന്നായി സ്നേഹിക്കുന്നു എന്നാണ് ജ്യോതിക ഒരിക്കൽ മറുപടി നൽകിയത്. നീണ്ട 25 വർഷങ്ങൾക്കുശേഷം ജോ ബോളിവുഡിൽ തിരിച്ചെത്തിയ ‘ശൈത്താൻ’ ഏറെ പ്രശംസയും കൈയടികളും ഏറ്റുവാങ്ങിയിരുന്നു.
