തിരുവനന്തപുരം: ബാറില് വെച്ചുണ്ടായ തര്ക്കത്തിന് പിന്നാലെ യുവാവിനെ നടുറോഡിലിട്ട് സഹോദരങ്ങള് കൊലപ്പെടുത്തി. തിരുവല്ലം വണ്ടിത്തടം സ്വദേശിയായ സുമന് (38)ആണ് കൊല്ലപ്പെട്ടത്. വിഴിഞ്ഞത്ത് ഇന്നലെ രാത്രിയായിരുന്നു സംഭവം. രാത്രി 12 മണിയോടെയായിരുന്നു സംഭവം. ബൈക്കില് കടന്നുകളഞ്ഞ പ്രതികളെ പോലീസ് പിന്നാലെ പോയി സാഹസീകമായി പിടികൂടി.
പുലര്ച്ചെ രണ്ടരയോടെ അച്ചുവിനെയൂം അനന്തുവിനെയും സംഭവം നടന്നതിന് തൊട്ടടുത്ത ജംഗ്ഷനില് വെച്ച് പോലീസ് പിന്നാലെ പോയി പ്രതികള് സഞ്ചരിച്ച് സ്കൂട്ടറില് ജീപ്പ് ഇടിച്ചു വീഴ്ത്തയാണ് പിടികൂടിയത്. മദ്യപിച്ച് നിരന്തരം സംഘര്ഷത്തില് പെടുന്നവരാണ് പ്രതികളെന്നാണ് പോലീസ് പറയുന്നത്. ബാറില് രണ്ട് സഹോദരങ്ങള് തമ്മില് വാക്കുതര്ക്കമുണ്ടായിരുന്നു. ഇത് കണ്ട ഇവരുടെ സുഹൃത്ത് കൂടിയായ സുമന് ഇടപെടുകയായിരുന്നു. ഒടുവില് സഹോദരങ്ങള് ചേര്ന്ന് സുമനെ മര്ദിക്കുകയായിരുന്നു. ആദ്യം ബാറില് വെച്ചും പിന്നീട് റോഡില് വെച്ചുമാണ് യുവാക്കള് മര്ദിക്കുന്നത്. അവശ നിലയിലായ സുമനെ റോഡില് ഉപേക്ഷിച്ച് ഇവര് കടന്നുകളഞ്ഞു.
ഇതിനിടെ അതുവഴി വന്ന കാര് യാത്രികന് സുമനെ വിഴിഞ്ഞം ആശുപത്രിയിലെത്തിച്ചെങ്കിലും രക്ഷിക്കാനായില്ല. ബാറില് ഉള്ളവര് നോക്കിനില്ക്കെയായിരുന്നു അക്രമം. ഇടിച്ചും തൊഴിച്ചുമാണ് കൊലപാതകം നടത്തിയിരിക്കുന്നത്. സംഭവത്തിന്റെ ഞെട്ടിക്കുന്ന സിസിടിവി ദൃശ്യങ്ങള് പുറത്തുവരുന്നുണ്ട്. ബാറിനുള്ളില് ഉണ്ടായ സംഘര്ഷം പുറത്ത് എത്തി കൊലപാതകത്തില് അവസാനിക്കുകയായിരുന്നു.
