18ാം വയസ്സില് ലോകസുന്ദരിപ്പട്ടം ചൂടിയത് മുതല് ഹോളിവുഡ് വരെയെത്തി നില്ക്കുന്ന തന്റെ അസാധാരണ വളര്ച്ചയെക്കുറിച്ചും മാതൃത്വത്തെക്കുറിച്ചും മനസ്സ് തുറന്ന് നടി പ്രിയങ്ക ചോപ്ര. ഇൻസ്റ്റാഗ്രാമിലെ പുതിയ ട്രെൻഡിന്റെ ഭാഗമായി തന്റെ ജീവിതത്തിലെ വിവിധ ഘട്ടങ്ങൾ കോർത്തിണക്കിയ ചിത്രങ്ങൾ പങ്കുവെച്ചുകൊണ്ടാണ് താരം ഗൃഹാതുരത്വമുണർത്തുന്ന കുറിപ്പ് പങ്കുവെച്ചത്. ‘ഈ ട്രെൻഡ് എനിക്ക് ഇഷ്ടപ്പെട്ടു’ എന്നാണ് പോസ്റ്റിന് അടിക്കുറിപ്പായി താരം നല്കിയിരിക്കുന്നത്.
18-ാം വയസ്സിൽ കിരീടം ചൂടിയപ്പോൾ എന്റെ ജീവിതം മാറി, മിസ് വേൾഡ്?? ഞാനോ???" എന്ന് അത്ഭുതപ്പെട്ടുകൊണ്ടാണ് താരം തന്റെ കുറിപ്പ് ആരംഭിച്ചത്. തന്റെ കുട്ടിക്കാല ചിത്രവും മിസ് വേൾഡ് വേദിയിലെ ചിത്രവും താരം ഇതിനോടൊപ്പം പങ്കുവെച്ചു. ഒരു സാധാരണ പെൺകുട്ടിയിൽ നിന്ന് അന്താരാഷ്ട്ര തലത്തിൽ അറിയപ്പെടുന്ന നടിയും സംരംഭകയുമായി മാറിയ തന്റെ മാറ്റത്തെ താരം നന്ദിയോടെയാണ് ഓർക്കുന്നത്.
തന്റെ കരിയറിനൊപ്പം തന്നെ മകൾ മാൾട്ടി മേരിയുടെ അമ്മയാകാൻ കഴിഞ്ഞതിലുള്ള സന്തോഷവും പ്രിയങ്ക പങ്കുവെച്ചു. "ഏറ്റവും വലിയ ഹൃദയവും അവസാനിക്കാത്ത കൗതുകവുമുള്ള ആവേശഭരിതയായ ഒരു കുഞ്ഞു മനുഷ്യന്റെ അമ്മയാണ് ഞാൻ. എനിക്ക് മനോഹരമായ ഒരു കുടുംബമുണ്ട്," പ്രിയങ്ക കുറിച്ചു. ഭർത്താവ് നിക് ജോനാസിനും മകൾക്കുമൊപ്പമുള്ള ചിത്രങ്ങളും താരം പോസ്റ്റ് ചെയ്തിട്ടുണ്ട്.
അഭിനയത്തിന് പുറമെ ഒരു നിർമ്മാതാവ് എന്ന നിലയിലും എഴുത്തുകാരി എന്ന നിലയിലുമുള്ള തന്റെ നേട്ടങ്ങളെക്കുറിച്ചും താരം വാചാലയായി. തന്റെ മെമ്മോയര് ( ഒരാളുടെ സ്വന്തം ജീവിതാനുഭവങ്ങളെയും ഓര്മ്മകളെയും ആസ്പദമാക്കി എഴുതുന്ന പുസ്തകം)'അൺഫിനിഷ്ഡ്' പൂർത്തിയാക്കാൻ എടുത്ത പ്രയത്നത്തെക്കുറിച്ചും താരം ഓർത്തെടുത്തു. ഏതായാലും പ്രിയങ്കയുടെ പോസ്റ്റ് സോഷ്യല് മീഡിയയില് ശ്രദ്ധനേടുകയാണ്.
അതേസമയം ദ ബ്ലഫ് ആണ് പ്രിയങ്കയുടേതായി ഏറ്റവും ഒടുവില് പുറത്തിറങ്ങിയ ചിത്രം. എസ്.എസ്. രാജമൗലി സംവിധാനം ചെയ്യുന്ന ബ്രഹ്മാണ്ഡ ചിത്രം വാരണാസിയിലൂടെ തെലുങ്ക് സിനിമയിൽ അരങ്ങേറ്റം കുറിക്കാൻ ഒരുങ്ങുകയാണ് പ്രിയങ്ക. മന്ദാകിനി എന്ന കഥാപാത്രത്തെയാണ് പ്രിയങ്ക ചിത്രത്തില് അവതരിപ്പിക്കുന്നത്. മഹേഷ് ബാബുവും പൃഥ്വിരാജ് സുകുമാരനും പ്രധാന വേഷങ്ങളിലെത്തുന്ന ഈ ചിത്രം 2027 ഏപ്രിൽ 7-ന് റിലീസ് ചെയ്യുമെന്നാണ് റിപ്പോർട്ടുകൾ. കൂടാതെ, 'സിറ്റാഡല്'വെബ് സീരീസിന്റെ രണ്ടാം ഭാഗത്തിലും താരം അഭിനയിക്കുന്നുണ്ട്.
