തിരുവനന്തപുരം: തിയേറ്ററുകളില് പ്രദര്ശനം തുടരന്ന വാഴ 2 ചിത്രത്തിലെ ഒരു രംഗത്തിനെതിരെ വിമര്ശനവുമായി ആയുര്വേദ മെഡിക്കല് അസോസിയേഷന് ഓഫ് ഇന്ത്യ (AMAI). ചിത്രത്തില് ബിജുക്കുട്ടന്റെ കഥാപാത്രത്തിന് വരുന്ന അസുഖം ആയുര്വേദത്തെ കുറിച്ച് തെറ്റായ സന്ദേശം നല്കുന്നു എന്നാണ് ആയുര്വേദ ഡോക്ടര്മാര് വിമര്ശിക്കുന്നത്.
ബിജുക്കുട്ടന്റെ കഥാപാത്രത്തിന് കരള് രോഗം വരുന്നത് അരിഷ്ടം കഴിച്ചത് കൊണ്ടാണ് എന്ന രീതിയില് ചിത്രത്തില് കാണിക്കുന്നു എന്നും അത് തെറ്റായ സന്ദേശമാണ് എന്നുമാണ് ആയുര്വേദ മെഡിക്കല് അസോസിയേഷന് ഓഫ് ഇന്ത്യ ( AMAI) പറയുന്നത്. ചിത്രത്തിനെതിരെ നിയമ നടപടി സ്വീകരിക്കുമെന്നും എഎംഎഐ അറിയിച്ചു. ചിത്രത്തിലെ ഈ രംഗത്തെ വിമര്ശിച്ച് സമൂഹമാധ്യമങ്ങളിലൂടെ ആയുര്വേദ ഡോക്ടര്മാര് നേരത്തെ രംഗത്തെത്തിയിരുന്നു. അതേസമയം, ചിത്രത്തിലെ ഈ രംഗത്തെക്കുറിച്ച് ഉയരുന്ന വിമര്ശനങ്ങളില് അണിയറ പ്രവര്ത്തകര് പ്രതികരിച്ചിട്ടില്ല.
തിയേറ്ററുകളില് മികച്ച അഭിപ്രായമാണ് വാഴ 2- വിന് ലഭിക്കുന്നത്. ഏഴ് ദിവസം കൊണ്ട് ചിത്രം 100 കോടി ക്ലബ്ബിലെത്തി. സവിന് എസ് എ സംവിധാനം ചെയ്തിരിക്കുന്ന ചിത്രത്തില് സോഷ്യല് മീഡിയ താരങ്ങളായ ഹാഷിര്, അലന് ബിന് സിറാജ്, അജന് ജോയ്, വിനായക് എന്നിവരാണ് പ്രധാന വേഷങ്ങളിലെത്തുന്നത്. സംവിധായകന് വിപിന് ദാസ് ആണ് വാഴ പോലെ വാഴ 2- വിന്റേയും തിരക്കഥ ഒരുക്കിയിരിക്കുന്നത്. സിനിമയ്ക്ക് മൂന്നാം ഭാഗവും അണിയറപ്രവര്ത്തകര് പ്രഖ്യാപിച്ചിട്ടുണ്ട്. വാഴ 3 പെണ്കുട്ടികളുടെ കഥയാണെന്നാണ് വിപിന്ദാസ് കുറിച്ചിരിക്കുന്നത്.
