ബോളിവുഡിന്റെ താരറാണിമാരായി തിളങ്ങി നില്ക്കുന്ന താരങ്ങളാണ് കങ്കണ റണൗട്ടും ദീപിക പദുകോണും. സിനിമാപാരമ്പര്യമില്ലാത്ത കുടുംബത്തില് നിന്നെത്തി സ്വപ്രയത്നം കൊണ്ടും കഷ്ടപ്പാടുകള് കൊണ്ടും ഇന്നത്തെ സ്ഥാനം നേടിയെടുത്ത അഭിനേത്രികളാണിവര്. വ്യത്യസ്തമായ സ്ത്രീ പ്രാധാന്യമുള്ള സിനിമകളില് കരുത്തുറ്റ കഥാപാത്രങ്ങള് അവതരിപ്പിച്ചാണ് കങ്കണയും ദീപികയും പ്രേക്ഷകമനസ്സിലിടം നേടിയെടുത്തത്. സ്വന്തം നിലപാടുകളും അഭിപ്രായങ്ങളും മുഖം നോക്കാതെ തുറന്നു പറയുന്നതിലും ഇവര് രണ്ടാളും ഒട്ടും പിറകോട്ടല്ല.
അടുത്തിടെ ദീപിക എട്ടു മണിക്കൂര് ഷിഫ്റ്റിനെക്കുറിച്ച് ദീപിക തുറന്നു പറഞ്ഞത് വലിയ വിവാദങ്ങള്ക്ക് വഴിവച്ചിരുന്നു. സന്ദീപ് റെഡ്ഡി വാംഗയുടെ സ്പിരിറ്റ്, കൽക്കി 2 എന്നീ ചിത്രങ്ങളിൽ നിന്ന് ദീപിക പിന്മാറിയതോടെയാണ് ബോളിവുഡിൽ ജോലിസമയത്തെക്കുറിച്ചുള്ള ചർച്ചകൾ ആരംഭിച്ചത്. പല അഭിനേത്രികളും ഇക്കാര്യത്തെക്കുറിച്ചുള്ള തങ്ങളുടെ അഭിപ്രായങ്ങള് തുറന്നു പറഞ്ഞിട്ടുണ്ട്.
ഇപ്പോഴിതാ ജോലിസമയത്തെച്ചൊല്ലി ബോളിവുഡിൽ നിലനിൽക്കുന്ന ചര്ച്ചകളെക്കുറിച്ച് തുറന്നു പറയുകയാണ് കങ്കണ റണൗട്ട്. സിനിമയിൽ എട്ടു മണിക്കൂർ ഷിഫ്റ്റ് വേണമെന്ന ദീപികയുടെ ആവശ്യത്തെ അനുകൂലിക്കുന്നതാണ് കങ്കണയുടെ അഭിപ്രായം. ആളുകൾ ദീപികയ്ക്കായി കാത്തിരിക്കാൻ തയ്യാറാകുന്ന അത്രയും ഉയരത്തിൽ അവർ എത്തിക്കഴിഞ്ഞെന്നും ഇത്രയും വലിയൊരു നടി എട്ടു മണിക്കൂർ ജോലി ചെയ്യാമെന്ന് പറഞ്ഞാൽ അതിൽ വിവാദമുണ്ടാക്കേണ്ട കാര്യമില്ലെന്നുമാണ് കങ്കണ പറയുന്നത്.
‘‘ദീപിക ഇന്ന് നിൽക്കുന്ന സ്ഥാനം അവർ കഠിനാധ്വാനം ചെയ്ത് നേടിയതാണ്. അവർക്ക് ഇപ്പോൾ ഒരു പെൺകുഞ്ഞുണ്ട്, ഒരു അമ്മയാണ്. എട്ടു മണിക്കൂർ ജോലി ചെയ്യാൻ അവർ ആഗ്രഹിക്കുന്നുണ്ടെങ്കിൽ അതിൽ യാതൊരു തെറ്റുമില്ല. ആളുകൾ അവർക്കായി കാത്തിരിക്കാൻ തയ്യാറാകുന്ന അത്രയും ഉയരത്തിൽ അവർ എത്തിക്കഴിഞ്ഞു. ഇത്രയും വലിയൊരു നടി എട്ടു മണിക്കൂർ ജോലി ചെയ്യാമെന്ന് പറഞ്ഞാൽ അതിൽ വിവാദമുണ്ടാക്കേണ്ട കാര്യമില്ല.
ദീപികയും ഞാനും ഒരുമിച്ചുള്ള ഒരു സന്ദര്ഭത്തില്, ഇംതിയാസിന്റെ സിനിമയിലോ മറ്റോ ജോലി ചെയ്യുന്നുണ്ടെന്ന് ദീപിക പറഞ്ഞു. ‘ഞങ്ങൾക്ക് 12 മണിക്കൂർ ഷിഫ്റ്റ് ഉണ്ട്...’ എന്നാണ് ദീപിക പറഞ്ഞത്. അതിനു മറുപടിയായി, ‘ഞാൻ 10 മണിക്കൂർ മാത്രമേ ജോലി ചെയ്യുന്നുള്ളൂ...’ എന്ന് ഞാൻ പറഞ്ഞു. ദീപികയത് പറയുന്നത് അതിശയകരമാണ്. അന്ന് ഞങ്ങൾ 12-14 മണിക്കൂറിൽ താഴെ ഒന്നും കൊണ്ട് തൃപ്തിപ്പെടില്ലായിരുന്നു, കാരണം ഞങ്ങളന്ന് അഗ്രസീവായിരുന്നു. ഞങ്ങൾക്ക് അത് വേണം. ഞങ്ങൾ അതിനായി തയ്യാറായിരുന്നു. വിജയിക്കണമെന്ന് ഞങ്ങൾ ആഗ്രഹിച്ചു, ഇതെല്ലാം നേടണമെന്ന് ആഗ്രഹിച്ചു...
ഞാന് പറഞ്ഞ് അവസാനിപ്പിക്കാന് ഇഷ്ടപ്പെടുന്നത് ഇതാണ്. നിങ്ങൾ പുതിയ ആളാകുമ്പോൾ, നിങ്ങൾ ഉയർന്നുവരുന്നു, നിങ്ങൾക്ക് പകരം വയ്ക്കാൻ ആളുകളുമുണ്ടാകും. നിങ്ങളുടെ സ്ഥാനം വ്യത്യസ്തമാണ്. ദീപിക ഇപ്പോള് എവിടെയാണോ, അക്കൂട്ടത്തില് ഒരു അമ്മയാണ്. പരിപാലിക്കാൻ ഒരു കുടുംബമുണ്ട്.
ഒരു നിമിഷം കാത്തിരിക്കൂ, തങ്ങള്ക്ക് അവരെത്തന്നെ വേണം എന്ന് ആളുകൾ പറയുന്ന ഒരു സ്ഥാനം അവർ നേടിയിട്ടുണ്ട്. അവൾ എട്ട് മണിക്കൂർ വന്നാലും കുഴപ്പമില്ല, കാരണം ഞങ്ങൾ അവരുടെ സമയത്തിന് ചുറ്റും ജോലി ചെയ്യും. അപ്പോൾ എന്തുകൊണ്ട് പാടില്ല? ഫെർട്ടിലിറ്റി നിരക്കിനെക്കുറിച്ചുള്ള എല്ലാ സംസാരങ്ങളും, വിവാഹങ്ങളെക്കുറിച്ചുള്ള എല്ലാ സംസാരങ്ങളും, ഇതെല്ലാം, നമ്മൾ എന്താണ് ചെയ്യുന്നത്? നമ്മൾ നമ്മുടെ സ്ത്രീകളുടെ മേൽ വളരെയധികം സമ്മർദ്ദം ചെലുത്തുന്നു. കുട്ടികളായതോടെ അവർക്ക് ഇരട്ടി ജോലിയാണ് ചെയ്യേണ്ടി വരുന്നത്. വിവാഹബന്ധങ്ങൾ തകരുന്നതിനെക്കുറിച്ചും പ്രത്യുൽപ്പാദന നിരക്ക് കുറയുന്നതിനെക്കുറിച്ചും സംസാരിക്കുന്നവർ, സ്ത്രീകൾക്ക് നൽകുന്ന ഈ അമിതഭാരം കാണുന്നില്ലേ? കരിയറിന്റെ തുടക്കത്തിൽ വിജയത്തിനായി തങ്ങൾ 12-ഉം 14-ഉം മണിക്കൂർ ജോലി ചെയ്തിരുന്നു. എന്നാൽ ഒരു ഘട്ടം കഴിഞ്ഞാൽ കുടുംബത്തിനും വ്യക്തിജീവിതത്തിനും സമയം സമയം നൽകേണ്ടത് ആവശ്യമാണ്...’’ കങ്കണ പറഞ്ഞു.
സന്ദീപ് റെഡ്ഡി വംഗയുടെ ‘സ്പിരിറ്റ്’, ‘കൽക്കി 2898 എഡി’യുടെ രണ്ടാം ഭാഗം എന്നിവയിൽ നിന്ന് എട്ടു മണിക്കൂർ ഷിഫ്റ്റ് എന്ന നിബന്ധനയെച്ചൊല്ലിയാണ് ദീപിക പിന്മാറിയത്. ഇൻഡസ്ട്രിയിലെ മുൻനിര പുരുഷ താരങ്ങൾ വർഷങ്ങളായി എട്ടു മണിക്കൂർ ഷിഫ്റ്റുകളിൽ മാത്രമാണ് ജോലി ചെയ്യുന്നതെന്നും താൻ ഒരു സ്ത്രീ ആയതിനാലാണ് തന്റെ ആവശ്യം വിവാദമാക്കിയതെന്നും ദീപിക നേരത്തെ പ്രതികരിച്ചിരുന്നു. ഷാരൂഖ് ഖാൻ ചിത്രം ‘കിംഗ്’, അല്ലു അർജുനൊപ്പമുള്ള ‘രാക’ എന്നിവയാണ് ദീപികയുടെ വരാനിരിക്കുന്ന ചിത്രങ്ങൾ.
