ബംഗളൂരു: ഇഡ്ഡലി, വട, ദോശ തുടങ്ങിയ പുളിപ്പിച്ച ഭക്ഷണങ്ങൾ കഴിച്ച് 97 സ്വകാര്യ കമ്പനി ജീവനക്കാർ ആശുപത്രിയിൽ. വടക്കൻ ബംഗളൂരുവിലെ ദേവനഹള്ളിയിലുള്ള ഒരു സ്വകാര്യ കമ്പനിയിലെ ജീവനക്കാരെയാണ് കന്റീൻ ഭക്ഷണം കഴിച്ചതിനെ തുടർന്ന് അസ്വസ്ഥകൾ പ്രകടിപ്പിച്ചതു കാരണം ആശുപത്രിയിലായത്.
ഇഡ്ഡലി, ദോശ തുടങ്ങിയ പുളിപ്പിച്ച ഭക്ഷണങ്ങൾ പൊതുവെ ആരോഗ്യഭക്ഷണങ്ങളുടെ പട്ടികയിലാണ് ഉൾപ്പെടുത്തിയിരിക്കുന്നത്. ഇവ ദഹനത്തിനും ആരോഗ്യത്തിനും നല്ലതാണ്. എന്നാൽ, വേനൽക്കാലത്ത് അവ പെട്ടെന്ന് കേടാകാൻ സാധ്യതയുണ്ട്. ചൂടുകാലത്ത് ഇവയിൽ ബാക്ടീരിയകൾ വളരുന്നതിനും അതുവഴി ഭക്ഷ്യവിഷബാധയ്ക്കും കാരണമാകാം.
ഇത്തരം ഭക്ഷണങ്ങൾ കഴിക്കുമ്പോൾ ചൂടോടെയാണ് വിളമ്പുന്നതെന്ന് ഉറപ്പുവരുത്തണം. ഭക്ഷണത്തിന് ഉപയോഗിക്കുന്ന മാവ് ചൂടുകാലത്ത് അമിതമായി പുളിക്കുന്നതാണ് ബാക്ടീരിയകൾക്ക് അനുകൂല സാഹചര്യമാവുന്നത്. വട, ദോശ, ഇഡ്ഡലി തുടങ്ങിയവയ്ക്ക് ഒപ്പം കഴിക്കുന്ന ചട്നി തേങ്ങ ചേർത്തതാണെങ്കിലും ശ്രദ്ധിക്കേണ്ടതുണ്ട്. ഇത് രണ്ട് മണിക്കൂറിനുള്ളിൽ ഉപയോഗിക്കണമെന്നും അധികൃതർ പറയുന്നു.
