കോഴിക്കോട്: സംസ്ഥാനത്ത് ഉടനീളം പാമ്പുകടിയും ജീവന് നഷ്ടമാകലും വാര്ത്തയാകുമ്പോള് പാമ്പിനെ പോക്കറ്റിലിട്ട് അതിഥി തൊഴിലാളിയുടെ അഭ്യാസം. അരീക്കോടാണ് സംഭവം. പാന്റിന്റെ പോക്കറ്റില് പാമ്പിനെ ഇട്ടുകൊണ്ട് അങ്ങാടിയില് ചായകുടിക്കാന് എത്തുകയായിരുന്നു. വിവരമറിഞ്ഞ നാട്ടുകാര് പാമ്പിനെ ഒരു കവറിലിട്ടുകൊണ്ട് അന്യസംസ്ഥാന തൊഴിലാളിയെ നാട്ടുകാര് ആശുപത്രിയില് എത്തിച്ചു.
പാമ്പുമായി ചായകുടിക്കാന് എത്തിയ ഇയാളുടെ പോക്കറ്റില് എന്തോ ഇളകുന്നത് ആള്ക്കാരുടെ ശ്രദ്ധയില് പെടുകയായിരുന്നു. ഇയാള് പാമ്പിനെ വലിച്ചു പോക്കറ്റില് നിന്നും പുറത്തേക്ക് ഇട്ടു കാണിക്കുകയും ചെയ്തിരുന്നു. പോക്കറ്റില് കയ്യിട്ട ഇയാള്ക്ക് പല തവണ പാമ്പിന്റെ കടിയേല്ക്കുകയും ചെയ്തിരുന്നു. കൊണ്ടുനടന്ന പാമ്പ് അണലിയായിരുന്നെന്നാണ് നാട്ടുകാര് സംശയിക്കുന്നത്.
പലതവണ കടിയേറ്റെങ്കിലും ഇയാളുടെ ആരോഗ്യനില തൃപ്തികരമാണെന്നാണ് വിവരം. അതേസമയം ലഹരിപ്പുറത്താണോ ഇയാളുടെ സാഹസമെന്നും സംശയമുണ്ട്. മദ്യത്തിന്റെയോ മയക്കുമരുന്നിന്റേയോ സ്വാധീനത്തിലാണോ ഇയാള് ഇത് ചെയ്തതെന്നാണ് സംശയം. കേരളത്തില് ഉടനീളം പാമ്പുകടിയുമായി ബന്ധപ്പെട്ട വാര്ത്തകളാണ് പ്രചരിച്ചുകൊണ്ടിരിക്കുന്നത്. ഇന്നലെ പാമ്പുകടിയേറ്റ് രണ്ടുപേരാണ് മരണമടഞ്ഞത്.
ചിറയിന്കീഴില് അഴൂര് മൂലേല് വീട്ടില് ദിലീപ്-അനു ദമ്പതികളുടെ മൂത്ത മകന് ദിക്ഷല് എന്ന രണ്ടാം ക്ലാസ് വിദ്യാര്ഥിയാണ് മരണമടഞ്ഞവരില് ഒരാള്. ഇന്നലെ പുലര്ച്ചെ രണ്ടരയോടെയാണ് വീടിനുള്ളില് ഉറങ്ങിക്കിടന്ന ദിക്ഷലിനെ പാമ്പ് കടിച്ചത്. വീട്ടില് നടത്തിയ തെരച്ചിലില്മൂര്ഖന് പാമ്പിനെ പിടികൂടി. കായംകുളത്ത് യുവതി ബന്ധുവിന്റെ വിവാഹ സത്കാരത്തില് പങ്കെടുത്ത് മടങ്ങുന്നതിനിടെ പാമ്പുകടിയേറ്റ വീട്ടമ്മ മരിച്ചു. ആറാട്ടുപുഴ കാപ്പൂരിക്കാട്ടില് നാജിമിന്റെ ഭാര്യ സലീന (42) യാണ് മരണമടഞ്ഞ രണ്ടാമത്തെയാള്.
അണലിയാണ് കടിച്ചതെന്ന് കരുതുന്നു. വിവാഹ സത്കാരത്തിന് എത്തിയ സെലീന സമീപത്തെ ആളൊഴിഞ്ഞ പറമ്പിലായിരുന്നു ഇരുചക്ര വാഹനം പാര്ക്ക് ചെയ്തിരുന്നത്. സത്കാരം കഴിഞ്ഞ് മടങ്ങാനായി വാഹനമെടുക്കാന് പോയപ്പോള് പാമ്പ് കടിക്കുകയായിരുന്നു.
നേരമത്ത സഹോദരനൊപ്പം വീട്ടില് കിടന്നുറങ്ങുന്നതിനിടെ പാമ്പ് കടിയേറ്റ് ചികിത്സയില് കഴിയുന്ന അനോഷി(10)ന്റെ നില കൂടുതല് മെച്ചപ്പെട്ടു. കറുകുറ്റി അപ്പോളോ അഡ്ലക്സ് ആശുപത്രിയില് ചികിത്സയിലുള്ള കുട്ടി അപകടനില തരണം ചെയ്തു. ഇന്നു മുറിയിലേക്കു മാറ്റുമെന്ന് ആശുപത്രി അധികൃതര് മെഡിക്കല് ബുള്ളറ്റിനില് വ്യക്തമാക്കി. കഴിഞ്ഞ 18 നു രാത്രിയിലാണ് അനോഷിനും ഇളയ സഹോദരന് അല്ജോക്കും ഉറക്കത്തില് പാമ്പ് കടിയേറ്റത്. അല്ജോ 19 നു രാവിലെ മരണത്തിനു കീഴടങ്ങിയിരുന്നു.
അമ്മുമ്മയുടെ വീട്ടില്നിന്നു സ്വന്തം വീട്ടിലേക്കു മടങ്ങുന്നതിനിടെ തിരുവനന്തപുരത്തു പോത്തന്കോട് വേങ്ങോട് സ്വദേശിനി ദുര്ഗ(18)യാണ് പാമ്പുകടിയേറ്റിട്ടും രക്ഷപ്പെട്ട രണ്ടാമത്തെയാള്. ഉടന്തന്നെ ആറ്റിങ്ങല് വലിയകുന്ന് ആശുപത്രിയില് കൊണ്ടുപോയി പ്രാഥമിക ശുശ്രൂഷ നല്കി. പ്രാഥമിക ചികിത്സ നല്കിയശേഷം വിദഗ്ധ പരിശോധനകള്ക്കായി തിരുവനന്തപുരം മെഡിക്കല് കോളജ് ആശുപത്രിയിലേക്കു മാറ്റി.
