നാടും വീടും വിട്ട് വർഷങ്ങളോളം വിദേശത്ത് താമസിച്ച ശേഷം ജന്മനാട്ടിലേക്ക് തിരികെയെത്തുന്ന പല ആളുകളുമുണ്ട്. നാട്ടിലെത്തിയ ആദ്യ ദിവസങ്ങളിൽ ചിലർക്കെങ്കിലും വലിയൊരു അപരിചിതത്വം ഫീൽ ചെയ്യാറുണ്ട്. എന്നാലത് കുറച്ചു ദിവസങ്ങൾ കൊണ്ടു മാറുകയും ചെയ്യും.
ഇപ്പോഴിതാ വിദേശത്തു വർഷങ്ങൾ ചിലവിട്ട ശേഷം ജന്മനാട്ടിലേക്ക് മടങ്ങിയെത്തുന്ന പലരെയും കാത്തിരിക്കുന്നത് വലിയൊരു 'കള്ച്ചർ ഷോക്ക്' ആണെന്ന് വെളിപ്പെടുത്തുകയാണ് പ്രവാസി യുവതി. ഫിൻലൻഡിലെ ശാന്തമായ ജീവിതത്തിന് ശേഷം ഇന്ത്യയിലേക്ക് മടങ്ങിയെത്തിയ ആയുഷി നഗ്വംശി എന്ന യുവതിയാണ് ‘റിവേഴ്സ് കള്ച്ചർ ഷോക്കി’ന്റെ അനുഭവങ്ങളാണ് യുവതി പറയുന്നത്.
ഇന്ത്യയിലെ കഠിനമായ ചൂടും റോഡുകളിലെ നിർത്താതെയുള്ള ഹോണ് അടിയും ജനത്തിരക്കും കണ്ട് സ്തംഭിച്ചുനില്ക്കുന്ന ആയുഷിയെ വീഡിയോയില് കാണാം. ‘നിങ്ങള് ഫിൻലൻഡില് വളരെക്കാലം താമസിച്ചു, ഇന്ത്യ എത്രത്തോളം തീവ്രമാണെന്ന് നിങ്ങള് മറന്നുപോയിരിക്കുന്നു...’ എന്ന ക്യാപ്ഷനൊപ്പമാണ് ആയുഷി വീഡിയോ പങ്കുവെച്ചിരിക്കുന്നത്. ഇതിനൊപ്പം നാട്ടിലെ സാഹചര്യങ്ങള് താൻ പൂർണ്ണമായും മറന്നുപോയെന്ന് ആയുഷി സമ്മതിക്കുന്നു.
‘ഫിൻലൻഡിൽ വളരെക്കാലം ജീവിച്ചതിനാല് എന്റെ ശരീരം ഇപ്പോഴും ഫിൻലൻഡിലെ തണുപ്പിനോടും അവിടുത്തെ നിശബ്ദതയോടും പൊരുത്തപ്പെട്ടാണ് ഇരിക്കുന്നത്. ചൂടിലും ഹോണിലും കുഴപ്പത്തിലും ഓടുന്ന ഇന്ത്യയെ ഞാന് മറന്നു പോയി... ഓരോ ചെറിയ ബുദ്ധിമുട്ട് നേരിടുമ്പോഴും, ‘എന്തിനായിരുന്നു ഈ മടക്കം’ എന്ന് സ്വന്തം മനസ്സ് തമാശയായി ചോദിക്കുന്നു....’’ ആയുഷി പറയുന്നു.
ആയുഷിയുടെ വീഡിയോ വൈറലായതോടെ താഴെ സമാന അനുഭവങ്ങള് പങ്കുവെച്ച് നിരവധി പ്രവാസികളാണ് രംഗത്തെത്തി. ‘യൂറോപ്പിലെ താമസത്തിന് ശേഷം നാട്ടിലെ ഹോണ് അടി കേള്ക്കുമ്പോള് ഒരു മ്യൂസിക് കണ്സേർട്ട് പോലെ തോന്നും...’ എന്നാണ് ഒരാള് രസകരമായി കുറിച്ചത്. ‘നാട്ടിലില്ലാത്തപ്പോള് നമ്മള് ഇന്ത്യയെ മിസ്സ് ചെയ്യും, തിരികെ എത്തുമ്പോള് എന്തിനാണ് പോയതെന്ന് ഇന്ത്യ നമ്മളെ ഓർമ്മിപ്പിക്കും...’ എന്ന് കുറിച്ചവരുമുണ്ട്. ഇതിനിടയില് ‘ചൂടും ചായയും ബഹളവുമുള്ള നാട്ടിലേക്ക് സ്വാഗതം....’ എന്ന് കുറിച്ച് യുവതിയെ സ്വീകരിക്കുന്നവരും കുറവല്ല.
