കൊല്ക്കത്ത: സൂപ്പര് ഓവറിലേക്ക് നീണ്ട നാടകീയമായ ഇന്ത്യന് പ്രീമിയര് ലീഗ് പോരാട്ടത്തില് ലഖ്നൗ സൂപ്പര് ജയന്റ്സിനെ മറികടന്ന് കൊല്ക്കത്ത നൈറ്റ് റൈഡേഴ്സ് വിജയം സ്വന്തമാക്കി. സൂപ്പര് ഓവറില് ആദ്യം ബാറ്റ് ചെയ്ത ലഖ്നൗവിനെ സുനില് നരെയ്ന് വരിഞ്ഞുമുറുക്കി. നിക്കോളാസ് പൂരനെയും എയ്ഡന് മാര്ക്രത്തെയും പുറത്താക്കിയ നരെയ്ന് ലഖ്നൗവിനെ വെറും ഒരു റണ്ണില് ഒതുക്കി. മറുപടി ബാറ്റിംഗില് റിങ്കുസിംഗിലൂടെ കൊല്ക്കത്ത വിജയം പിടിച്ചെടുത്തു. ഇരുടീമുകളും 20 ഓവറില് 158 ല് എത്തിയതോടെയാണ് സൂപ്പര് ഓവര് വന്നത്.
കെകെആര് ഉയര്ത്തിയ 155-8 എന്ന സ്കോര് പിന്തുടര്ന്ന ലഖ്നൗവിന്, കാര്ത്തിക് ത്യാഗി എറിഞ്ഞ അവസാന പന്തില് ജയിക്കാന് ഏഴ് റണ്സ് വേണമായിരുന്നു. എന്നാല് മുഹമ്മദ് ഷമി ആ പന്ത് സിക്സറിലേക്ക് പറത്തിയതോടെ മത്സരം ടൈ ആവുകയും സൂപ്പര് ഓവറിലേക്ക് നീങ്ങുകയും ചെയ്തു. മത്സരത്തിലുടനീളം നാല് ക്യാച്ചുകളുമായി ഫീല്ഡിംഗില് കൊല്ക്കത്തയുടെ റിങ്കുസിംഗ് തിളങ്ങി.
ടോസ് നേടി കൊല്ക്കത്തയെ ബാറ്റിംഗിനയച്ച ലഖ്നൗവിന് വേണ്ടി ഇടംകൈയ്യന് സീമര് മൊഹ്സിന് ഖാന് മികച്ച തുടക്കം നല്കി. തന്റെ ആദ്യ ഓവര് വിക്കറ്റ് മെയ്ഡനാക്കിയ അദ്ദേഹം 23 റണ്സിന് 5 വിക്കറ്റുകള് വീഴ്ത്തി. ഒരു ഘട്ടത്തില് കൊല്ക്കത്ത 73-6 എന്ന നിലയില് തകര്ന്നു. തകര്ച്ചയില് നിന്ന് കൊല്ക്കത്തയെ കരകയറ്റിയത് റിങ്കു സിംഗിന്റെ വെടിക്കെട്ട് ബാറ്റിംഗാണ്. അവസാന ഓവറില് തുടര്ച്ചയായ നാല് സിക്സറുകള് പറത്തിയ റിങ്കു, 51 പന്തില് 83 റണ്സുമായി പുറത്താകാതെ നിന്നു. ഇതോടെയാണ് കെകെആര് 155 റണ്സിലെത്തിയത്.
മറുപടി ബാറ്റിംഗില് കൃത്യമായ ഇടവേളകളില് വിക്കറ്റുകള് നഷ്ടമായത് ലഖ്നൗവിനെ സമ്മര്ദ്ദത്തിലാക്കി. എങ്കിലും ഋഷഭ് പന്തിന്റെ 42 റണ്സും, മാര്ക്രം, ആയുഷ് ബദോനി എന്നിവരുടെ പ്രകടനവും മത്സരത്തെ ആവേശകരമായ അന്ത്യത്തിലേക്ക് എത്തിച്ചു. ഈ വിജയത്തോടെ അഞ്ച് പോയിന്റുമായി കൊല്ക്കത്ത എട്ടാം സ്ഥാനത്തേക്ക് ഉയര്ന്നപ്പോള്, നാല് പോയിന്റുള്ള ലഖ്നൗ പട്ടികയില് അവസാന സ്ഥാനത്താണ്.
