തിരുവനന്തപുരം: വാല്പ്പാറയിലുണ്ടായ ദാരുണമായ വാഹനാപകടത്തില് ഇരയായവര്ക്ക് സാമ്പത്തിക സഹായം നല്കാന് സംസ്ഥാന മന്ത്രിസഭ തീരുമാനം. അപകടത്തില് മരിച്ച അഞ്ച് പേരുടെ കുടുംബങ്ങള്ക്ക് 10 ലക്ഷം രൂപ വീതം നല്കും. ഇന്ഷുറന്സ് പരിരക്ഷ ലഭ്യമല്ലാത്ത നൗഷാദ് അലി (ഡ്രൈവര്), സാജിത, റുഖിയ, ഷക്കീല, വിദ്യാര്ത്ഥിയായ മുഹമ്മദ് ഹിഷാം എന്നിവരുടെ ആശ്രിതര്ക്കാണ് ഈ തുക ലഭിക്കുക.
പരിക്കേറ്റ് ചികിത്സയില് കഴിയുന്ന മുഹമ്മദ് ഷഹാദിന്, മസ്നീന്, ഡ്രൈവര് മുഹമ്മദ് ഫാഹിസ് എന്നിവരുടെ മുഴുവന് ചികിത്സാ ചെലവുകളും സര്ക്കാര് വഹിക്കും. ഇന്ഷുറന്സ് പരിരക്ഷയുള്ളവര്ക്ക്, അത് കൂടാതെ ചികിത്സയ്ക്കായി അധികം തുക ചെലവായിട്ടുണ്ടെങ്കില് അതും സര്ക്കാര് നല്കും. മുഖ്യമന്ത്രിയുടെ ദുരിതാശ്വാസ നിധിയില് നിന്നാണ് ഈ തുക അനുവദിക്കുന്നത്. കഴിഞ്ഞ ഏപ്രില് 17-നാണ് മലപ്പുറം പാങ്ങ് പള്ളിപ്പറമ്പ് ഗവണ്മെന്റ് എല്.പി. സ്കൂളിലെ ജീവനക്കാരും അധ്യാപകരും സഞ്ചരിച്ച വാന് വാല്പ്പാറയില് വെച്ച് അപകടത്തില്പ്പെട്ടത്.
സ്കൂളില് നിന്നുള്ള വിനോദയാത്രാ സംഘമായിരുന്നു ഇത്. വാനിലുണ്ടായിരുന്ന 13 പേരില് പത്തുപേര്ക്ക് ജീവന് നഷ്ടമായി. പ്രധാനാധ്യാപിക അജിത ഉള്പ്പെടെയുള്ള അധ്യാപകരും സ്കൂള് ജീവനക്കാരും മരിച്ചവരില് ഉള്പ്പെടുന്നു. ചുരം റോഡിലെ പരിചയക്കുറവും ഡ്രൈവിംഗിലെ അശ്രദ്ധയുമാണ് അപകടത്തിന് പ്രധാന കാരണമെന്ന് റിപ്പോര്ട്ട് ചൂണ്ടിക്കാട്ടുന്നു. വാഹനത്തിന് യാന്ത്രിക തകരാറുകള് ഒന്നും തന്നെ ഉണ്ടായിരുന്നില്ല. ഇറക്കത്തില് ഗിയര് മാറ്റുന്നതില് വന്ന പിഴവും വളവുകളിലെ ജാഗ്രതക്കുറവും അപകടത്തിന്റെ ആഘാതം വര്ധിപ്പിച്ചു.
