ചെന്നൈ: തമിഴ്നാട്ടില് മുഖ്യമന്ത്രിയുടെ കാര്യത്തില് അനിശ്ചിതത്വം തുടരുമ്പോള് നടന് വിജയ് യുടെ ടിവികെയ്ക്ക് പിന്തുണയുമായി സിപിഐ. വിജയ്ക്ക് അവസരം നല്കണമെന്നും സര്ക്കാര് രൂപീകരിക്കാന് ടിവികെയെ ക്ഷണിക്കണമെന്നും സിപിഐയും സിപിഐഎമ്മും ഗവര്ണര് ആര്ലേക്കറോട് ആവശ്യപ്പെട്ടു. നാളെ ചേരുന്ന നേതൃയോഗത്തിന് ശേഷം പിന്തുണയില് നിലപാട് വ്യക്തമാക്കും.
കേവല ഭൂരിപക്ഷം തെളിയിക്കാന് ടിവികെയ്ക്ക് അവസരം നല്കണമെന്ന് സിപിഐ ആവശ്യപ്പെട്ടു. അതേസമയം കേവല ഭൂരിപക്ഷത്തിന് പത്തു സീറ്റിന് പിന്നില് നില്ക്കുന്ന ടി.വി.കെ. മറ്റു പാര്ട്ടികളുടെ പിന്തുണ തേടാന് ഓടിനടക്കുകയാണ്. വിജയ് യെ പിന്തുണയ്ക്കാന് കോണ്ഗ്രസ് തയ്യാറാണെന്ന് നേരത്തേ വ്യക്തമാക്കിയിരുന്നു. എന്നിരുന്നാലും സര്ക്കാര് ഉണ്ടാക്കാന് ഇനിയും സീറ്റുകള് വേണ്ടതുണ്ട്.
തമിഴ്നാട് രാഷ്ട്രീയത്തിലെ ഉദ്വേഗജനകമായ നീക്കങ്ങള് നാലാം ദിവസത്തിലേക്ക് കടന്നിരിക്കുകയാണ്. 234 അംഗ നിയമസഭയില് കേവല ഭൂരിപക്ഷത്തിന് ആവശ്യമായ 118 എന്ന മാന്ത്രികസംഖ്യ തൊടാന് വിജയ് കിണഞ്ഞുപരിശ്രമിക്കുകയാണ്. നിലവില് 108 സീറ്റുകളുള്ള ടി.വി.കെയ്ക്ക് അഞ്ച് എം.എല്.എ.മാരുള്ള കോണ്ഗ്രസ് പിന്തുണ പ്രഖ്യാപിച്ചിട്ടുണ്ടെങ്കിലും, സര്ക്കാര് രൂപീകരിക്കാന് ഇനിയും അഞ്ച് പേരുടെ കൂടി പിന്തുണ അനിവാര്യമാണ്. അതേസമയം 40 അംഗങ്ങളുള്ള എഐഎഡിഎംകെയും വിജയ് യെ പിന്തുണയ്ക്കാന് തയ്യാറാണ്.
ബുധനാഴ്ച തന്നെ സര്ക്കാര് രൂപവത്കരണത്തിനുള്ള അവകാശവാദം ഉന്നയിച്ച് വിജയ് ഗവര്ണര് രാജേന്ദ്ര ആര്ലേക്കറെ കണ്ടിരുന്നു. എന്നാല്, കൃത്യമായ ഭൂരിപക്ഷം തെളിയിക്കുന്ന രേഖകള് ഹാജരാക്കാതെ സത്യപ്രതിജ്ഞയ്ക്ക് അനുമതി നല്കാനാവില്ലെന്ന കര്ക്കശ നിലപാടിലാണ് ഗവര്ണര്. ഇതോടെ വിജയ്യുടെ സ്ഥാനാരോഹണം നീണ്ടുപോകുകയാണ്.
ഭൂരിപക്ഷം ഉറപ്പിക്കാന് വി.സി.കെ. ഉള്പ്പെടെയുള്ള ചെറിയ പാര്ട്ടികളുമായി ടി.വി.കെ. ചര്ച്ചകള് നടത്തുന്നുണ്ട്. രണ്ട് സീറ്റുകള് നേടിയ വി.സി.കെ. നിലപാട് വ്യക്തമാക്കാത്തത് വിജയിയെ സംബന്ധിച്ച് നിര്ണ്ണായകമാണ്. ഈ പ്രതിസന്ധികള്ക്കിടയില്, ഭാവി പരിപാടികള് ചര്ച്ച ചെയ്യാന് വിജയ് ഇന്ന് രാവിലെ പാര്ട്ടി ആസ്ഥാനത്ത് എം.എല്.എ.മാരുടെ അടിയന്തര യോഗം വിളിച്ചിട്ടുണ്ട്.
