ഇന്തോനേഷ്യയില് പര്വ്വതാരോഹണം നടക്കുന്നതിനിടെ അഗ്നിപര്വ്വതം പൊട്ടിത്തെറിച്ച് വിദേശികള് അടക്കം മൂന്ന് പേര് മരിച്ചു. നിരവധി പര്വ്വതാരോഹകര് കുടുങ്ങി. ഇവരില് ഭൂരിഭാഗം പേരെയും സുരക്ഷിതമായി താഴെയെത്തിക്കുകയും ആശുപത്രിയിലേക്ക് മാറ്റുകയും ചെയ്തതായാണ് വിവരം . പര്വതഗര്ത്തത്തില് നിന്ന് അഗ്നിപര്വ്വത അവശിഷ്ടങ്ങള് ഇപ്പോഴും പുറന്തള്ളുന്നതായി രക്ഷാപ്രവര്ത്തകര് പറഞ്ഞു.
ഇന്തോനേഷ്യയിലെ ഡുകോണോ പര്വതമാണ് അപ്രതീക്ഷിതമായി പൊട്ടിത്തെറിച്ചത്. നോര്ത്ത് മലുക്കു ദ്വീപിലാണ് ഈ അഗ്നിപര്വ്വതം. കഴിഞ്ഞ മാര്ച്ചിന് ശേഷം ഇരുന്നൂറിലധികം തവണയാണ് ഈ അഗ്നിപര്വ്വതം പൊട്ടിത്തെറിച്ചത്. ഇവിടെ പര്വതാരോഹണം നടത്തരുതെന്ന് മുന്നറിയിപ്പ് നല്കിയിരുന്നതായി അധികൃതര് പറഞ്ഞു.
വിലക്ക് വകവെയ്ക്കാതെ മല കയറിയ സിംഗപ്പൂര്, ഇന്തോനേഷ്യന് പൗരന്മാര് അടങ്ങുന്ന 20 പര്വതാരോഹകരാണ് പെട്ടെന്നുണ്ടായ അഗ്നിപര്വത സ്ഫോടനത്തില് കുടുങ്ങിയത്. ഇവരില്പ്പെട്ട രണ്ട് സിംഗപ്പൂര് സ്വദേശികളും ഒരു ഇന്തോനേഷ്യന് പൗരനുമാണ് മരിച്ചത്.
