ടി 20 ലോകകപ്പിൽ ഇന്ത്യയെ കിരീടത്തിലേക്കെത്തിച്ച നായകനാണ് സൂര്യകുമാർ യാദവ്. ഐപിഎല് പോരാട്ടങ്ങളിലും സൂര്യകുമാര് യാദവിന്റെ തകര്പ്പന് ഷോട്സുകള് ക്രിക്കറ്റ് മൈതാനിയെ ആവേശം കൊള്ളിപ്പിച്ചിട്ടുണ്ട്. ഗ്രൗണ്ടിന്റെ ഏത് ഭാഗത്തേക്കും ഷോട്ടുതിർക്കുന്ന കളിക്കളത്തിലെ ‘മിസ്റ്റർ 360’യാണ് സൂര്യകുമാര് യാദവ്.
മുപ്പതാമത്തെ വയസ്സിൽ ഇന്ത്യൻ ടീമിലെത്തി കേവലം രണ്ടുകൊല്ലം കൊണ്ട് ലോക ടി 20 ബാറ്റർമാരുടെ പട്ടികയിൽ ഒന്നാം സ്ഥാനത്ത് കയറിയിരുന്ന ഇന്ത്യയുടെ ഇടിവെട്ട് ബാറ്ററാണ്. സൂര്യകുമാർ യാദവ് എന്ന പേരിനെ ചുരുക്കി സ്കൈ എന്നാണ് ആരാധകര് സ്നേഹത്തോടെ വിളിക്കുന്നത്. ഐപിഎല്ലില് മുംബൈ ഇന്ത്യൻസ് ടീമിലാണ് താരം കളിക്കുന്നത്.
ഇപ്പോഴിതാ ഐപിഎല് പോരാട്ടങ്ങളുടെ ആവേശത്തിനിടെ തങ്ങളുടെ ജീവിതത്തിലേക്ക് ഒരു കുഞ്ഞുമാലാഖ എത്തിയതിന്റെ ആഹ്ലാദം പങ്കിടുകയാണ് സൂര്യകുമാര് യാദവും ഭാര്യ ദേവിഷ ഷെട്ടിയും. നീണ്ട കാത്തിരിപ്പിനൊടുവില് തങ്ങളുടെ ജീവിതത്തിലേക്ക് എത്തിയ കുഞ്ഞുമാലാഖയെ വരവേല്ക്കുന്നതിന്റെ സന്തോഷം ഇക്കഴിഞ്ഞ ദിവസം ഇന്സ്റ്റാഗ്രാമിലൂടെയാണ് സൂര്യകുമാര് പങ്കുവെച്ചത്.
‘‘ചിരിയും കൊഞ്ചലുകളും സ്വപ്നങ്ങളുമായി ഞങ്ങളുടെ പെണ്കുഞ്ഞിനെ ഞങ്ങള് വരവേല്ക്കുന്നു...’’ എന്നാണ് സൂര്യകുമാര് യാദവ് ഹൃദ്യമായ ഒരു ചിത്രം പങ്കിട്ട് കുറിച്ചിരിക്കുന്നത്. അച്ഛന്റെയും അമ്മയുടെയും വിരലുകളില് തന്റെ കുരുന്ന് കൈ കൊണ്ട് ഇവരുടെ കുഞ്ഞു മാലാഖ മുറുകെ പിടിച്ചിരിക്കുന്ന ഹൃദയസ്പര്ശിയായ ചിത്രം നിമിഷനേരം കൊണ്ടാണ് വൈറലായി മാറിയത്.
ഈ സന്തോഷ വാര്ത്ത പങ്കുവെച്ച സൂര്യകുമാറിനെ ‘ഗേള് ഡാഡ്’ ക്ലബ്ബിലേക്ക് സ്വാഗതം ചെയ്താണ് ബോളിവുഡ് താരം രണ്വീര് സിംഗ് ആശംസിച്ചത്. വരുണ് ധവാന്, വിക്കി കൗശല്, ആതിയ ഷെട്ടി, പൂജ ഹെഗ്ഡെ, രാജ്കുമാര് റാവു, അര്ജുന് കപൂര് തുടങ്ങിയ താരങ്ങളും നിരവധി ആരാധകരും സൂര്യകുമാറിനും ദേവിഷയ്ക്കും ആശംസകള് നേരുന്നുണ്ട്.
2016 ല് വിവാഹിതരായ സൂര്യകുമാറും ദേവിഷയും കഴിഞ്ഞ മാര്ച്ചിലാണ് തങ്ങളുടെ ബേബി ഷവര് ആഘോഷിച്ചത്. നിലവില് ഐപിഎല് 2026-ന്റെ തിരക്കുകളിലാണെങ്കിലും, ജീവിതത്തിലെ ഈ സുപ്രധാന നിമിഷം കുടുംബത്തോടൊപ്പമാണ് സൂര്യകുമാര് ചെലവഴിച്ചത്. മുംബൈ ഇന്ത്യന്സ് താരമായ സൂര്യകുമാര് കഴിഞ്ഞ ആഴ്ച റായ്പൂരിലേക്ക് നടന്ന യാത്രയില് ടീമിനൊപ്പം ചേരാതിരുന്നത് ദേവിഷയുടെ പ്രസവസമയത്ത് കൂടെയുണ്ടാകാനായിരുന്നു.
മെയ് 10-ന് റോയല് ചലഞ്ചേഴ്സ് ബെംഗളൂരുവുമായാണ് മുംബൈ ഇന്ത്യന്സിന്റെ അടുത്ത മത്സരം. കുഞ്ഞ് പിറന്ന പശ്ചാത്തലത്തില് ഈ മത്സരത്തില് താരം കളിക്കളത്തിലിറങ്ങുമോ എന്ന കാര്യത്തില് ഇതുവരെ ഔദ്യോഗിക സ്ഥിരീകരണം വന്നിട്ടില്ല. ഇന്ത്യന് ട്വന്റി-20 ടീം ക്യാപ്റ്റനും മുംബൈ ഇന്ത്യന്സിന്റെ വൈസ് ക്യാപ്റ്റനുമായ സൂര്യകുമാറിന്റെ ജീവിതത്തിലെ ഈ പുതിയ ഇന്നിംഗ്സിന് ആരാധകര് വലിയ പിന്തുണ നല്കുന്നുണ്ട്.
