പാലക്കാട്: ജവാൻ എന്ന ജനപ്രിയ റമ്മിനു പിന്നാലെ, “മിന്നൽ മാജിക്” എന്ന ബ്രാൻഡിയും കേരളത്തിലെ മദ്യവിപണിയിലേക്ക്. പുതിയ ബ്രാൻഡി ഈ മാസം വിപണിയിൽ എത്തുമെന്ന് അധികൃതർ അറിയിച്ചു. സംസ്ഥാന സർക്കാരിന്റെ ഉടമസ്ഥതയിലുള്ള മലബാർ ഡിസ്റ്റലറീസ് ആണ് ഉത്പാദനം നടത്തുന്നത്.
അരലിറ്റർ കുപ്പികൾ മാത്രമാണ് ബെവ്കോ ഔട്ട്ലെറ്റുകളിലൂടെ വിൽക്കുക. അര ലിറ്ററിന് 400 രൂപയായിരിക്കും വില. പ്രാരംഭ ഘട്ടത്തിൽ 9,000 കെയ്സ് മദ്യമാണ് ദിവസവും വിപണിയിലെത്തുക. പിന്നീട് 13,000 കെയ്സായി വിപണനം വർദ്ധിപ്പിക്കാൻ ലക്ഷ്യമിടുന്നു. പ്രതിദിനം 13,500 കെയ്സ് മദ്യം ഉത്പാദിപ്പിക്കാനുള്ള ശേഷിയാണ് പ്ലാന്റിനുള്ളത്.
നേരത്തെ, പുതിയ ബ്രാൻഡിന് പേരു നിർദേശിക്കാനുള്ള അവസരം പൊതുജനങ്ങൾക്ക് മുന്നിൽ മത്സരമായി അവതരിപ്പിച്ചിരുന്നു. അതിലൂടെ ‘മലബാർ മിസ്റ്ററി’ എന്ന പേർ ലഭിച്ചുവെങ്കിലും മത്സരത്തിനെതിരെ കേസ് ഫയൽ ചെയ്തതിനാൽ ഉപയോഗിക്കാനായില്ല.
(നിയപരമായ മുന്നറിയിപ്പ്: മദ്യപാനം ആരോഗ്യത്തിനു ഹാനികരം)
