ന്യൂഡല്ഹി: കേരളത്തിലെ മുഖ്യമന്ത്രി കസേരയുമായി ബന്ധപ്പെട്ട് വി.ഡി. സതീശനെ പേര് മുഖ്യമന്ത്രി സ്ഥാനത്ത് ഹൈക്കമാന്റ് പ്രഖ്യാപിച്ചതോടെ നീങ്ങിയത് ദിവസങ്ങള് നീണ്ടുനിന്ന അനിശ്ചിതത്വം. പത്തുദിവസത്തെ പ്രതിസന്ധി ഹൈക്കമാന്റ് അവസാനിപ്പിച്ച് കെ.സി. വേണുഗോപാലിനെ അനുനയിപ്പിച്ചത് ദേശീയനേതൃത്വത്തില് വലിയ സ്ഥാനം വാഗ്ദാനം ചെയ്തെന്ന് സൂചന.
എഐസിസി ദേശീയ അദ്ധ്യക്ഷസ്ഥാനം വാഗ്ദാനം ചെയ്താണ് കെ.സി.യെ സമ്മതിപ്പിച്ചതെന്നാണ് വിവരം. മല്ലികാര്ജ്ജുന ഖര്ഗേയുടെ ടേം അവസാനിക്കുന്നതോടെ ഇന്ന് രാവിലെ 12 മണിയോടെ കേരളത്തിന്റെ ചുമതലയുള്ള ദേശീയ സെക്രട്ടറി ദീപാദാസ് മുന്ഷി നടത്തിയ വാര്ത്താസമ്മേളനത്തിലാണ് പ്രഖ്യാപനം ഉണ്ടായത്. രണ്ടുമണിക്കൂര് നീണ്ടു നിന്ന ചര്ച്ചയില് എഐസിസി അദ്ധ്യക്ഷസ്ഥാനം വാഗ്ദാനം ചെയ്തെന്ന് സ്ഥിരീകരിക്കാത്ത റിപ്പോര്ട്ടുണ്ട്. ഇന്ന് രാവിലെ രാഹുലിന്റെ വീട്ടിലേക്ക് കെ.സി. വേണുഗോപാലിനെ വിളിച്ചു വരുത്തിയിരുന്നു.
അതേസമയം കേരളത്തിന്റെ നിയുക്ത മുഖ്യമന്ത്രി വി.ഡി. സതീശനെ പൂര്ണ്ണസന്തോഷത്തോടെ സ്വാഗതം ചെയ്യുന്നെന്നും ഹൈക്കമാന്റിന്റെ തീരുമാനത്തെ പൂര്ണ്ണമനസ്സോടെ അംഗീകരിക്കുന്നെന്നും ആയിരുന്നു കെ.സി. വേണുഗോപാലിന്റെ ആദ്യ പ്രതികരണം. ഏതാനും ദിവസമായി രാജ്യം ചര്ച്ച ചെയ്ത കാര്യത്തില് പാര്ട്ടി ഹൈക്കമാന്റ ഒടുവില് തീരുമാനം എടുത്തിരിക്കുകയാണെന്നും പറഞ്ഞു.
ഹൈക്കമാന്റ് എല്ലാം പരിശോധിച്ചായിരിക്കാം തീരുമാനം എടുത്തിട്ടുണ്ടാകുക. േകരളത്തിലെ ജനങ്ങള് പ്രതീക്ഷയോടെ അധികാരത്തിലേറ്റിയ സര്ക്കാരിനൊപ്പം പ്രവര്ത്തിക്കും. ജനങ്ങളുടെ പ്രതീക്ഷ അനുസരിച്ചുള്ള ഒരു യുഡിഎഫ് സര്ക്കാരിന് എല്ലാവിധ പിന്തുണയും വാഗ്ദാനം ചെയ്യുന്നതായും പറഞ്ഞു. ഹൈക്കമാന്റിന്റെ തീരുമാനം ശിരസാവഹിക്കുന്നു ആ തീരുമാനം നടപ്പാക്കേണ്ടത് തന്റെ കൂടി ഉത്തരവാദിത്വമാണ്. താന് അടിയുറച്ച കോണ്ഗ്രസ് പ്രവര്ത്തകനാണ്. സര്ക്കാരിനെ മുമ്പോട്ട് കൊണ്ടുപോകാന് എല്ലാവിധ സഹായവും ഉണ്ടാകുമെന്നും പറഞ്ഞു.
