മുംബൈ: നീറ്റ് യു.ജി. 2026 ചോദ്യക്കടലാസ് ചോര്ച്ച സംബന്ധിച്ച കൂടുതല് വിവരങ്ങള് പുറത്ത്. ഗ്രേസ് മാര്ക്കിന്റെ സഹായത്തോടെ പന്ത്രണ്ടാം ക്ലാസ് കടന്നുകൂടിയ മകനുവേണ്ടിയാണ് കഴിഞ്ഞ ദിവസം അറസ്റ്റിലായ യുവമോര്ച്ച, ബി.ജെ.പി. നേതാവ് ദിനേഷ് ബിവാള് ചോദ്യക്കടലാസ് ചോര്ത്തിയതെന്ന് അന്വേഷണത്തില് വ്യക്തമായി.
ദിനേഷ് ബിവാളിന്റെ മകന് ഋഷി ബിവാള് 2026-ലെ രാജസ്ഥാന് ബോര്ഡ് ഓഫ് സെക്കന്ഡറി എജ്യുക്കേഷന് (ആര്.ബി.എസ്.ഇ) സീനിയര് സെക്കന്ഡറി പരീക്ഷയില് ഗ്രേസ് മാര്ക്കിന്റെ സഹായത്തോടെ രണ്ടാം ഡിവിഷന് ഗ്രേഡ് നേടിയത്.
ആകെയുള്ള 500 മാര്ക്കില് ഋഷിക്കു ലഭിച്ചത് 254 മാര്ക്കാണ്. ആകെ 50.80 ശതമാനം സ്കോര്. ഹിന്ദിയ്ക്ക് 32, ഇംഗ്ലീഷ് 51, ഫിസിക്സ് 51, കെമിസ്ട്രി 58, ബയോളജി 62 എന്നിങ്ങനെയാണ് വിവിധ വിഷയങ്ങള്ക്ക് ലഭിച്ച മാര്ക്ക്. ഋഷി ഈ വര്ഷത്തെ നീറ്റ് യു.ജി. പരീക്ഷ എഴുതിയിരുന്നതായും മകനുവേണ്ടിയാണ് ദിനേഷ് ബിവാള് ചോദ്യക്കടലാസ് വാങ്ങിയതെന്നും അന്വേഷണ ഉദ്യോഗസ്ഥര് പറഞ്ഞു.
കേസില് രാജസ്ഥാന് സ്വദേശി ദിനേഷ് ബിവാളിനെക്കൂടാതെ സഹോദരന് മംഗിലാല് ബിവാളിനെയും സി.ബി.ഐ. അറസ്റ്റ് ചെയ്തിരുന്നു. ഹരിയാന സ്വദേശിയായ ഒരാളില്നിന്ന് 15 ല്ക്ഷം രൂപയ്ക്കാണ് ഇവര് ചോദ്യക്കടലാസ് വാങ്ങിയത്. തുടര്ന്ന് സിക്കറിലെ നിരവധി വിദ്യാര്ഥികള്ക്ക് ഇവര് ചോദ്യക്കടലാസ് മറിച്ചുവിറ്റതായും അന്വേഷണത്തില് കണ്ടെത്തി.
ജയ്പൂര് റൂറല് ജില്ലയിലെ ജാംവ രാംഗഡ് സ്വദേശികളായ ദിനേഷ്-മംഗിലാല് സഹോദരങ്ങളുടെ കുടുംബത്തിലുള്ളവരുടെ പരീക്ഷാവിജയവും സംശയനിഴലിലാണ്. ഈ കുടുംബത്തിലെ അഞ്ചുപേര് കഴിഞ്ഞ വര്ഷത്തെ നീറ്റ് പരീക്ഷയില് ഒന്നിച്ച് വിജയിച്ചിരുന്നു. ദിനേഷിന്റെ മകന്, മംഗിലാലിന്റെ രണ്ടു മക്കള്, പരേതനായ മൂത്ത സഹോദരന്റെ രണ്ടു പെണ്മക്കള് എന്നിവരാണു നീറ്റ് വിജയിച്ചത്.
നിലവില് ഇവര് സര്ക്കാര് മെഡിക്കല് കോളജുകളില് പഠിക്കുകയാണ്. ഒരേ കുടുംബത്തില്നിന്ന് ഇത്രയധികം പേര് വിജയിച്ചതാണ് അന്വേഷണ ഉദ്യോഗസ്ഥരില് സംശയമുണര്ത്തിയത്. മുന്വര്ഷങ്ങളിലും ഇവര് ചോദ്യക്കടലാസ് ചോര്ത്തുന്നതില് പങ്കാളികളായിരുന്നെന്ന നിഗമനത്തിലാണ് സി.ബി.ഐ. ഉദ്യോഗസ്ഥര്. ഇതുസംബന്ധിച്ചും അന്വേഷണം നടത്തുമെന്നാണു വിവരം.
ദിനേശിന്റെ മകള് ഗുഞ്ചന് നീറ്റ് പാസായശേഷം ബനാറസ് മെഡിക്കല് കോളജിലാണു പഠിക്കുന്നത്. ദിനേശിന്റെയും മംഗിലാലിന്റെയും മൂത്ത സഹോദരന് ഘനശ്യാമിന്റെ പെണ്മക്കളായ പാലക്, സോണിയ എന്നിവരും നീറ്റ് പാസായിരുന്നു . സോണിയ മുംബൈയിലെ ഒരു മെഡിക്കല് കോളജിലും മംഗിലാലിന്റെ മകള് പ്രകൃതി ദൗസ മെഡിക്കല് കോളജിലുമാണ് പഠിക്കുന്നത്.
രാജസ്ഥാനിലെ സിക്കാറിലെ കോച്ചിങ് സെന്ററുകള് കേന്ദ്രീകരിച്ചും സി.ബി.ഐ. അന്വേഷണം നടത്തുന്നുണ്ട്. സിക്കാറില് നീറ്റിന് തയ്യാറെടുത്തിരുന്ന യാഷ് വികാസ് എന്ന വിദ്യാര്ഥിയുമായി ദിനേശും മംഗിലാലും ബന്ധപ്പെട്ടിരുന്നതായി അന്വേഷണസംഘത്തിനു വിവരം ലഭിച്ചു.
സിക്കാറിലെ വിവിധ കോച്ചിങ് സെന്ററുകളിലെ വിദ്യാര്ഥികള്ക്ക് പരീക്ഷയ്ക്ക് ഏകദേശം 15 മണിക്കൂര് മുമ്പ് ചോദ്യക്കടലാസ് ലഭിച്ചതായി റിപ്പോര്ട്ടുകള് സൂചിപ്പിക്കുന്നു. ജാംവ രാംഗഡിലെ മറ്റു ചില വിദ്യാര്ഥികള്ക്കും ചോദ്യക്കടലാസ് ലഭിച്ചിരുന്നു. അന്തര്സംസ്ഥാന ശൃംഖലയിലെ പ്രധാനകണ്ണി സിക്കാര് സ്വദേശി രാകേഷ് മണ്ഡവാരിയയെ അന്വേഷണസംഘം ചോദ്യംചെയ്തുവരികയാണ്.
അതേസമയം, സ്പെഷല് ഓപ്പറേഷന്സ് ഗ്രൂപ്പ് സി.ബി.ഐക്കു കൈമാറിയ രണ്ടു ഡസനോളം വിദ്യാര്ഥികളെയും രക്ഷിതാക്കളെയും ചോദ്യംചെയ്യലിന് ശേഷം വിട്ടയച്ചു. ആവശ്യമെങ്കില് ഇവരെ വീണ്ടും ചോദ്യംചെയ്യലിനായി വിളിപ്പിക്കുമെന്നും ഉദ്യോഗസ്ഥര് പറഞ്ഞു.
