ലണ്ടന്: ഇംഗ്ളീഷ് പ്രീമിയര് ലീഗില് ആഴ്സണലിന് കിരീടം. എതിരാളികളായ മാഞ്ചസ്റ്റര് സിറ്റിയെ ബേണ്മൗത്ത് കുരുക്കിയതോടെയാണ് തത്വത്തില് ആഴ്സണലിന് ചാംപ്യന്മാരാകാന് കഴിഞ്ഞത്. അര്ട്ടേറ്റയുടെ ടീം 22 വര്ഷത്തെ കാത്തിരിപ്പാണ് അവസാനിപ്പിച്ചത്. സിറ്റി ബേണ്മൗത്തുമായി സമനിലയില് കുരുങ്ങിയതോടെ ഒരു മത്സരം മാത്രം ബാക്കിനില്ക്കെ ആഴ്സണല് 5 പോയിന്റിന്റെ ലീഡുമായി പട്ടികയില് ഒന്നാമതെത്തി.
മിക്കല് അര്ട്ടേറ്റയുടെ ടീം നിലവില് 82 പോയിന്റോടെയാണ് ഒന്നാമത് നില്ക്കുന്നത്. 69 ഗോളുകള് നേടുകയും 29 ഗോളുകള് വഴങ്ങുകയും ചെയ്ത അവര്ക്ക് +43 ഗോള് ഡിഫറന്സുമുണ്ട്. ഈ സീസണില് കളിച്ച 37 മത്സരങ്ങളില് 25 എണ്ണത്തില് അവര് വിജയിച്ചു. 7 മത്സരങ്ങള് സമനിലയിലായപ്പോള് 5 എണ്ണത്തില് പരാജയപ്പെട്ടു. അവസാന മത്സരത്തില് എന്ത് സംഭവിച്ചാലും മറ്റൊരു ടീമിനും ആഴ്സണലിനെ മറികടക്കാന് കഴിയില്ലെന്ന് ഗണിതശാസ്ത്രപരമായി ഉറപ്പായി. അതിനാല് ക്രിസ്റ്റല് പാലസിനെതിരെയുള്ള ആഴ്സണലിന്റെ അവസാന മത്സരം കേവലം ഒരു ചടങ്ങ് മാത്രമായി മാറി. ആഴ്സണല് നേടിയ 82 പോയിന്റ് എന്നത്, 2015/16 സീസണില് ലെസ്റ്റര് സിറ്റി 81 പോയിന്റോടെ കിരീടം നേടിയതിന് ശേഷം, പ്രീമിയര് ലീഗ് ചരിത്രത്തില് കിരീടം നേടുന്ന ഒരു ടീമിന്റെ ഏറ്റവും കുറഞ്ഞ പോയിന്റ് നിലയാണ്.
മാഞ്ചസ്റ്റര് സിറ്റി തങ്ങളുടെ പരിശീലകന് പെപ് ഗ്വാര്ഡിയോളയ്ക്ക് കീഴില് തുടര്ച്ചയായ അഞ്ചാം പ്രീമിയര് ലീഗ് കിരീടം ലക്ഷ്യമിട്ട് കുതിച്ചതോടെ ആഴ്സണലിന് കടുത്ത വെല്ലുവിളിയാണ് നേരിടേണ്ടി വന്നത്. പ്രീമിയര് ലീഗിലെ ആകെ 19 എതിരാളികളില് 17 പേരെയും ഒരു തവണയെങ്കിലും തോല്പ്പിക്കാന് ആഴ്സണലിന് സാധിച്ചു. ലിവര്പൂള്, മാഞ്ചസ്റ്റര് സിറ്റി എന്നീ ടീമുകളെ മാത്രമാണ് അവര്ക്ക് തോല്പ്പിക്കാന് കഴിയാതിരുന്നത്; ഈ രണ്ട് ടീമുകള്ക്കെതിരെയും ഓരോ സമനിലയും ഓരോ തോല്വിയുമായിരുന്നു ആഴ്സണലിന്റെ സമ്പാദ്യം.
ഈ വിജയം ആഴ്സണലിന്റെ നാലാമത്തെ പ്രീമിയര് ലീഗ് കിരീടമാണ്. മൊത്തത്തിലുള്ള ഇംഗ്ലീഷ് ഒന്നാം നിര ലീഗ് ചരിത്രത്തില് അവരുടെ 14-ാം കിരീടവും. ഒരൊറ്റ മത്സരത്തില് പോലും തോല്ക്കാതെ കിരീടം നേടിയ 2003/04ലെ പ്രശസ്തമായ 'ഇന്വിന്സിബിള്സ്' ടീമിന് ശേഷം ഇതാദ്യമായാണ് അവര് ചാമ്പ്യന്മാരാകുന്നത്. ഏറ്റവും കൂടുതല് ഇംഗ്ലീഷ് ലീഗ് കിരീടങ്ങള് നേടിയ ടീമുകളുടെ പട്ടികയില് 20 കിരീടങ്ങള് വീതമുള്ള ലിവര്പൂളിനും മാഞ്ചസ്റ്റര് യുണൈറ്റഡിനും തൊട്ടുപിന്നില് മൂന്നാം സ്ഥാനത്താണ് ആഴ്സണല്.
