തനിക്ക് ജന്മദിനാശംസകൾ നേർന്ന സുഹൃത്തുക്കൾക്കും ആരാധകർക്കും സോഷ്യൽ മീഡിയയിലൂടെ ഹൃദയം നിറഞ്ഞ നന്ദി അറിയിച്ച് നടൻ റഹ്മാൻ. ഇൻസ്റ്റഗ്രാമിൽ പങ്കുവെച്ച വൈകാരികമായ ഒരു കുറിപ്പിലൂടെയാണ് താരം തന്റെ സ്നേഹവും സന്തോഷവും പങ്കുവെച്ചത്. ജന്മദിനം ഇത്രയേറെ സവിശേഷമാക്കി മാറ്റിയതിന് എല്ലാവരോടും കടപ്പെട്ടിരിക്കുന്നുവെന്നം താരം കുറിച്ചു.
"ഇന്നലെ ശരിക്കും സവിശേഷമായ ഒന്നായിരുന്നു. എന്റെ സുഹൃത്തുക്കൾ, അഭ്യുദയകാംക്ഷികൾ, ആരാധകർ എന്നിവരിൽ നിന്ന് ലഭിച്ച സ്നേഹത്തിനും ആശംസകൾക്കും പ്രാർത്ഥനകൾക്കും മുന്നിൽ ഞാൻ അതിയായി സന്തോഷിക്കുന്നു. എന്റെ ഇൻബോക്സ് സന്ദേശങ്ങളാൽ നിറഞ്ഞിരിക്കുകയാണ്. എല്ലാവർക്കും വ്യക്തിപരമായി മറുപടി നൽകാൻ കഴിഞ്ഞില്ലെങ്കിലും, നിങ്ങളുടെ സ്നേഹം നിറഞ്ഞ മനസ്സോടെ ഞാൻ വായിച്ചറിഞ്ഞു. എന്റെ ജന്മദിനം മറക്കാനാവാത്ത ഒന്നാക്കി മാറ്റിയതിന് ഹൃദയത്തിന്റെ ആഴങ്ങളിൽ നിന്ന് നന്ദി," റഹ്മാന്റെ വാക്കുകള്.
തന്റെ ഇളയമകൾ അലീഷ റഹ്മാൻ ക്യാമറയിൽ പകർത്തിയ മനോഹരമായ പിറന്നാൾ ആഘോഷചിത്രങ്ങൾക്കൊപ്പമാണ് താരം ഈ ഹൃദ്യമായ കുറിപ്പ് പങ്കുവെച്ചിരിക്കുന്നത്. ചിത്രങ്ങളെടുത്ത മകൾക്ക് താരം പ്രത്യേകമായി നന്ദി പറയുകയും ചെയ്തു.
മലയാള സിനിമയിൽ ‘ ഹീറോ' ഇമേജോടെ കടന്നുവന്ന് പ്രേക്ഷകഹൃദയങ്ങൾ കീഴടക്കിയ താരമാണ് റഹ്മാൻ. 1983-ൽ പത്മരാജൻ സംവിധാനം ചെയ്ത 'കൂടെവിടെ' എന്ന ചിത്രത്തിലൂടെയായിരുന്നു അദ്ദേഹത്തിന്റെ സിനിമാ അരങ്ങേറ്റം. എൺപതുകളിൽ മമ്മൂട്ടി, മോഹൻലാൽ എന്നിവർക്കൊപ്പം നിരവധി സൂപ്പർഹിറ്റ് ചിത്രങ്ങളിൽ റഹ്മാൻ കേന്ദ്രകഥാപാത്രമായി തിളങ്ങി. മലയാളത്തിന് പുറമെ തമിഴ്, തെലുങ്ക് ഭാഷകളിലും വലിയൊരു ആരാധകവൃന്ദത്തെ സ്വന്തമാക്കാൻ താരത്തിന് സാധിച്ചു.
ഇടക്കാലത്ത് സിനിമയിൽ നിന്ന് ചെറിയൊരു ഇടവേളയെടുത്തെങ്കിലും 'ട്രാഫിക്', 'മുംബൈ പോലീസ്' തുടങ്ങിയ ചിത്രങ്ങളിലൂടെ ശക്തമായ തിരിച്ചുവരവാണ് അദ്ദേഹം നടത്തിയത്. മലയാളത്തിൽ റഹ്മാൻ ഒടുവിലായി അഭിനയിച്ച് തിയേറ്ററുകളിലെത്തിയ ചിത്രം 'സമാറ' ആണ്. മോഹൻലാൽ-ജീത്തു ജോസഫ് കൂട്ടുകെട്ടിന്റെ ബിഗ് ബജറ്റ് ചിത്രം 'റാം' ആണ് അണിയറയിൽ ഒരുങ്ങുന്ന റഹ്മാന്റെ പുതിയ മലയാളം സിനിമകളിൽ ഒന്ന്.
