ഗായികയും ഡബ്ബിംഗ് ആര്ട്ടിസ്റ്റുമൊക്കെയായ അമൃത സുരേഷിന്റെ സഹോദരിയായിട്ടാണ് അഭിരാമി സുരേഷിനെ ആരാധകര് കണ്ടറിഞ്ഞു തുടങ്ങിയത്. എന്നാലതിനൊക്കെ മുകളിലായി ഗായിക, സംഗീതസംവിധായിക, വീഡിയോ ജോക്കി വ്ലോഗര്, സംരംഭക എന്നീ നിലകളിലൊക്കെ തിളങ്ങി നില്ക്കുന്ന സോഷ്യല് മീഡിയ താരമാണ് അഭിരാമി സുരേഷ്. അമൃതം ഗമയ എന്ന ബാന്ഡിലൂടെ സഹോദരി അമൃതയ്ക്കൊപ്പം നാട്ടിലും വിദേശത്തുമായി നിരവധി കൺസേർട്ടുകള് അഭിരാമി നടത്താറുണ്ട്. തന്റെ യൂട്യൂബ് ചാനല് വഴിയും ഗായിക എല്ലാ വിശേഷങ്ങളും പങ്കിടാറുണ്ട്. ഒരു ബിസിനസ് വുമണ് കൂടിയായ അഭിരാമി സോഷ്യല് മീഡിയയില് നിറഞ്ഞു നില്ക്കുന്ന താരമാണ്.
ഇപ്പോഴിതാ സാമ്പത്തിക തട്ടിപ്പുമായി ബന്ധപ്പെട്ട് താൻ പങ്കുവെച്ച പോസ്റ്റ് പ്രണയത്തകർച്ചയായി വളച്ചൊടിക്കരുതെന്ന് കുറിക്കുകയാണ് ഗായിക അഭിരാമി സുരേഷ്. തന്നെ ചതിച്ച വ്യക്തിയുമായി തനിക്ക് യാതൊരു ബന്ധവുമില്ലെന്നും ആറോ ഏഴോ മാസങ്ങൾക്ക് മുമ്പ് മാത്രമാണ് ഈ വ്യക്തിയെ കണ്ടുമുട്ടിയതെന്നും അഭിരാമി ഇൻസ്റ്റഗ്രാമില് കുറിച്ചു.
‘‘വിഷയം പ്രണയമല്ല...
ഞാൻ പരാമർശിക്കുന്ന വ്യക്തിയുമായി എനിക്ക് വ്യക്തിപരമായ ഒരു ബന്ധവുമില്ല. ഏകദേശം ആറേഴ് മാസം മുമ്പ് പൂർണ്ണമായും ഔദ്യോഗിക ആവശ്യത്തിന് വേണ്ടി മാത്രമാണ് ഞാൻ അവരെ കണ്ടത്. അതുകൊണ്ട് ഈ സാമ്പത്തിക തട്ടിപ്പിനെ ഒരു ‘തകർന്ന പ്രണയകഥ’ അല്ലെങ്കിൽ വഞ്ചനാപരമായ വിവരണമാക്കി വളച്ചൊടിക്കുന്നത് ദയവായി നിർത്തുക. അത് പൂർണ്ണമായും തെറ്റും തെറ്റിദ്ധരിപ്പിക്കുന്നതുമാണ്. പ്രൊഫഷണൽ ഇടങ്ങളിൽ പ്രവർത്തിക്കുന്ന ഇത്തരം തട്ടിപ്പുകാരെക്കുറിച്ച് സംരംഭകര്ക്കും സംരംഭം സ്വപ്നം കാണുന്നവർക്കും മുന്നറിയിപ്പ് നൽകാൻ ബോധവാന്മാരാക്കാനും വേണ്ടി മാത്രമാണ് ഞാൻ അതിനെക്കുറിച്ച് സംസാരിച്ചത്...’’ എന്നാണ് അഭിരാമി കുറിച്ചത്.
കഴിഞ്ഞ ദിവസമാണ് ബിസിനസിൽ നേരിട്ട വലിയ വഞ്ചനയെ കുറിച്ച് അഭിരാമി സോഷ്യൽ മീഡിയയിൽ കുറിപ്പ് പങ്കുവെച്ചത്. സാമ്പത്തികമായും മാനസികമായും താൻ ആകെ തകർന്നുവെന്നും തിരിച്ചുവരവിന്റെ പാതയിലാണെന്നും അവർ കുറിച്ചിരുന്നു. ബിസിനസ് വിപുലീകരിക്കാൻ പണം നൽകാമെന്ന് വാഗ്ദാനം നൽകി സമീപിച്ച വ്യക്തി ഒടുവിൽ പണം നൽകേണ്ട ദിവസം മുങ്ങിയെന്ന് അഭിരാമി കുറിച്ചിരുന്നു.
തന്റെ ബിസിനസ്സ് വ്യാപിപ്പിക്കാനും വർഷങ്ങളായി താൻ കണ്ട സ്വപ്നങ്ങളിലേക്ക് നടന്നുടുക്കാനും ശ്രമിക്കുന്നതിനിടയിൽ, ചെന്നുവീണത് ഒരു സാമ്പത്തിക കെണിയിലായിരുന്നുവെന്നും. അങ്ങേയറ്റം വിശ്വസ്തനും മാന്യനും പ്രൊഫഷണലുമായി തോന്നിച്ച ഒരാളാണ് ഈ കെണിയൊരുക്കിയതെന്നും ഇൻസ്റ്റഗ്രാമിലൂടെ അഭിരാമി കുറിച്ചിരുന്നു.
‘‘കഴിഞ്ഞ കുറച്ചു മാസങ്ങളായി പലരും എന്നോട് ചോദിച്ചുകൊണ്ടിരിക്കുകയാണ് ഞാൻ എങ്ങോട്ടാണ് അപ്രത്യക്ഷയായതെന്ന്, എന്തുകൊണ്ടാണ് ഞാൻ ഇത്രയധികം അകന്നുപോയതെന്ന്, എന്തുകൊണ്ടാണ് മുൻപത്തെപ്പോലെ ഞാൻ ആളുകൾക്കിടയിലേക്ക് വരാത്തതെന്ന്. ഇതാണ് അതിനുള്ള എന്റെ മറുപടി. കഴിഞ്ഞ വർഷത്തിന്റെ അവസാനത്തിലും ഈ വർഷത്തിന്റെ തുടക്കത്തിലുമായി, എന്റെ ബിസിനസ്സ് വ്യാപിപ്പിക്കാനും വർഷങ്ങളായി ഞാൻ കണ്ട സ്വപ്നങ്ങളിലേക്ക് നടന്നുടുക്കാനും ശ്രമിക്കുന്നതിനിടയിൽ, ഞാൻ ചെന്നുവീണത് ഒരു സാമ്പത്തിക കെണിയിലായിരുന്നു. അങ്ങേയറ്റം വിശ്വസ്തനും മാന്യനും പ്രൊഫഷണലുമായി തോന്നിച്ച ഒരാളാണ് ഈ കെണിയൊരുക്കിയത്.
ഈ വ്യക്തിയുടെ പേരുവിവരങ്ങൾ ഞാൻ ഇപ്പോൾ വെളിപ്പെടുത്തുന്നില്ല; കാരണം നിയമപരമായ നടപടികൾ പുരോഗമിക്കുകയാണ്, എനിക്കും ചില കാര്യങ്ങളിൽ കൂടുതൽ വ്യക്തത വരാനുണ്ട്. എന്നാൽ, ഇതൊരു സ്ഥിരം രീതിയാണെന്നും എന്നെപ്പോലെ കൂടുതൽ ആളുകൾ ഇയാളുടെ വഞ്ചനയ്ക്ക് ഇരയായിട്ടുണ്ടെന്നും ബോധ്യപ്പെട്ടാൽ, മറ്റാരും ഇത്തരമൊരു കുഴിയിൽ വീഴാതിരിക്കാൻ ഞാൻ തീർച്ചയായും പരസ്യമായി മുന്നോട്ടുവരിക തന്നെ ചെയ്യും.
വളരാൻ ആഗ്രഹിക്കുന്ന ഏതൊരു സംരംഭകനെയും പോലെ, തികച്ചും ആത്മാർത്ഥമായ ഒരു അവസരമായാണ് ഞാൻ അതിനെ കണ്ടത്. വാഗ്ദാനങ്ങൾ വളരെ വലുതായിരുന്നു. അവരുടെ സമീപനം വളരെ ചിട്ടയായതും, വിശ്വസനീയവും, ഏതാണ്ട് ഒരു ബാങ്ക് ഇടപാട് പോലെയുമായിരുന്നു. വലിയ സ്വപ്നങ്ങളുമായി, സ്വന്തം നിലയിൽ എന്തെങ്കിലും കെട്ടിപ്പടുക്കാൻ ശ്രമിക്കുന്ന, എന്റെ സ്വപ്നങ്ങൾ യാഥാർത്ഥ്യമാക്കാൻ സഹായിച്ച പ്രിയപ്പെട്ട മനുഷ്യർക്ക് അർഹമായത് നൽകി എല്ലാറ്റിനെയും കൂടുതൽ വ്യവസ്ഥാപിതമാക്കാൻ ആഗ്രഹിച്ച ഒരാളെ സംബന്ധിച്ച് -ഞാൻ പ്രാർത്ഥിച്ചുകൊണ്ടിരുന്ന ആ വലിയ വഴിത്തിരിവാണ് ഇതെന്നാണ് എനിക്ക് തോന്നിയത്.
അതുകൊണ്ട് ഞാൻ അത് വിശ്വസിച്ചു. ആ വിശ്വാസത്തിന് ഞാൻ വലിയ വില നൽകേണ്ടി വന്നു. ആ വാഗ്ദാനങ്ങളുടെ പുറത്ത് ഞാൻ പലർക്കും ഉറപ്പുകൾ നൽകി. ബിസിനസ്സ് വിപുലീകരിക്കാൻ പദ്ധതികൾ തയാറാക്കി. ഫണ്ടുകൾ സമാഹരിച്ചു. ആളുകൾക്ക് എന്റെ വാക്ക് നൽകി. ഈ പിന്തുണ വന്നുചേരുമെന്ന പൂർണ്ണ പ്രതീക്ഷയിൽ ഞാൻ എന്റെ ഭാവി മുഴുവൻ അതിനനുസരിച്ച് ക്രമീകരിച്ചു. എന്നാൽ, കൃത്യമായി ആ തുക കൈമാറേണ്ട ദിവസം, ആ വ്യക്തി അപ്രത്യക്ഷനായി. വെറുതെ അങ്ങനെ, പെട്ടെന്ന്.
പക്ഷേ, അയാൾക്കൊപ്പം എന്റെ ബാധ്യതകൾ അപ്രത്യക്ഷമായില്ല. ഞാൻ വളരെ ശ്രദ്ധയോടെ ആസൂത്രണം ചെയ്തതെല്ലാം ഒരൊറ്റ നിമിഷം കൊണ്ട് തകർന്നു വീണു. എന്റെ സാമ്പത്തിക അടിത്തറ തകർന്നു. എന്റെ വിശ്വാസ്യത ചോദ്യം ചെയ്യപ്പെട്ടു. പൂർണ്ണമായ ആത്മാർത്ഥതയോടെ ഞാൻ നൽകിയ വാക്കുകൾ പാലിക്കാൻ കഴിയാതെ വന്നു. എല്ലാറ്റിനെയും കൂട്ടിപ്പിടിക്കാൻ ശ്രമിക്കുന്നതിനും മുങ്ങിത്താഴാതിരിക്കാൻ പോരാടുന്നതിനുമിടയിൽ, ഞാൻ മാനസികമായി പൂർണ്ണമായും തകർന്നുപോയി.
ഞാൻ ഫോണുകൾ എടുക്കുന്നത് നിർത്തി. ചടങ്ങുകളിൽ പങ്കെടുക്കുന്നത് അവസാനിപ്പിച്ചു. എന്റെ കണ്ടന്റ് ക്രിയേഷൻ നിർത്തിവെച്ചു. സോഷ്യൽ മീഡിയയിൽ നിന്ന് ഞാൻ അപ്രത്യക്ഷയായി. എന്നെ ബന്ധപ്പെടാൻ സാധിച്ചിരുന്ന നമ്പറുകൾ പോലും ഞാൻ ഉപയോഗിക്കാതായി; കാരണം ദിവസേന ആളുകളെയും അവരുടെ ചോദ്യങ്ങളെയും പ്രതീക്ഷകളെയും നിരാശയെയും നേരിടാനുള്ള ശേഷി എനിക്കിനി അവശേഷിച്ചിരുന്നില്ല. ആളുകൾ പുറംലോകം മാത്രം കണ്ട് എല്ലാം സാധാരണ നിലയിലാണെന്ന് കരുതി. എന്നാൽ അണിയറയിൽ സമ്മർദ്ദം, ഭയം, കുറ്റബോധം, നാണക്കേട്, ഉത്കണ്ഠ, നിരാശ എന്നിവയോട് ഒരേസമയം ഞാൻ നിശ്ശബ്ദമായി പോരാടുകയായിരുന്നു. ഇത് വെറുമൊരു സാമ്പത്തിക നഷ്ടം മാത്രമായിരുന്നില്ല; ഇതൊരു വലിയ മാനസിക ആഘാതമായിരുന്നു.
ഞാൻ ജീവിതത്തിൽ മുൻപും വേദനകളിലൂടെ കടന്നുപോയിട്ടുണ്ട്. എന്നാൽ ബിസിനസ്സിലുണ്ടാകുന്ന ആഘാതം നൽകുന്ന വേദന തികച്ചും വ്യത്യസ്തമാണ്. നിങ്ങളുടെ ഉദ്ദേശ്യങ്ങൾ ശുദ്ധമായിരുന്നു എന്ന് നിങ്ങൾക്കറിയാമെങ്കിലും, സ്വന്തം വിശ്വാസ്യത തകരുന്നത് നോക്കിനിൽക്കേണ്ടി വരുന്നത് നിങ്ങളുടെ ഉള്ളിലെന്തിനെയോ ഇല്ലാതാക്കും. ഞാൻ പൂർണ്ണമായും എന്നിലേക്ക് തന്നെ ചുരുങ്ങി. എന്റെ ചുറ്റുമുള്ള എല്ലാവരിൽ നിന്നും ഞാൻ സ്വയം ഒറ്റപ്പെട്ടു. എനിക്ക് എന്ത് പറ്റിയെന്ന് എന്റെ കുടുംബം പോലും പതുക്കെ അത്ഭുതപ്പെടാൻ തുടങ്ങി.
സത്യസന്ധമായി പറഞ്ഞാൽ, അത് എന്നെ കൂടുതൽ വേദനിപ്പിച്ചു; കാരണം ഞാൻ സ്നേഹിക്കുന്ന മനുഷ്യർക്ക് ഒരു ഭാരമാകാൻ ആഗ്രഹിക്കാതെ എന്റെ പോരാട്ടങ്ങൾ എന്നും നിശ്ശബ്ദമായി തനിയെ ചുമക്കാൻ ഇഷ്ടപ്പെടുന്ന ഒരാളായിരുന്നു ഞാൻ. യഥാർത്ഥത്തിൽ, ഈ ഘട്ടത്തിന്റെ ചില വശങ്ങൾ ഞാൻ ഇപ്പോഴും അവരോട് പോലും പൂർണ്ണമായി വെളിപ്പെടുത്തിയിട്ടില്ല.
എല്ലാം ഒറ്റയ്ക്ക് പരിഹരിക്കാൻ കഴിയുമെന്ന് ഞാൻ എന്നെത്തന്നെ വിശ്വസിപ്പിച്ചു കൊണ്ടിരുന്നു. ഉത്തരങ്ങൾക്കും പ്രതീക്ഷകൾക്കും പിന്നാലെ ഞാൻ ഓടിക്കൊണ്ടേയിരുന്നു...എന്റെ ജീവിതത്തെ ഈ വലിയ പ്രതിസന്ധിയിലാക്കി പെട്ടെന്ന് അപ്രത്യക്ഷനായ ആ മനുഷ്യന് പിന്നാലെ. അങ്ങനെ പതുക്കെ, ഞാൻ പോലും അറിയാതെ, എനിക്ക് എന്നെത്തന്നെ നഷ്ടപ്പെട്ടു. ഒരു തെറ്റായ തീരുമാനം, ഒരു വ്യക്തി, ഒരു വ്യാജ വാഗ്ദാനം എന്നിവയ്ക്ക് വർഷങ്ങളുടെ കഠിനാധ്വാനത്തെയും വിശ്വാസത്തെയും സ്ഥിരതയെയും എങ്ങനെയാണ് ഇങ്ങനെ ഉലയ്ക്കാൻ കഴിയുക എന്ന് ചിന്തിച്ച് ഭ്രാന്ത് പിടിക്കുന്ന അവസ്ഥയിലായ ദിവസങ്ങളുണ്ടായിരുന്നു. എന്നാൽ ഈ ഇരുട്ടിന്റെ നടുവിലും ഞാൻ ഒരു കാര്യം തിരിച്ചറിഞ്ഞു: വേദനകൾ ഒളിച്ചുവെച്ചാൽ അത് ഇല്ലാതാകില്ല. അത് നിങ്ങളെ പതുക്കെ കാർന്നുതിന്നും. അതുകൊണ്ട് തന്നെയാണ് ഇപ്പോൾ സംസാരിക്കാൻ ഞാൻ തീരുമാനിച്ചതും.
ഞാൻ ദുർബലയായതുകൊണ്ടല്ല, മറിച്ച് ഒടുവിൽ ഒളിച്ചിരിക്കുന്നത് അവസാനിപ്പിക്കാനുള്ള കരുത്ത് ഞാൻ സംഭരിച്ചതുകൊണ്ടാണ്. എല്ലാം തകർന്നിട്ടും, എന്നെ രക്ഷിച്ചത് എന്റെ കർമ്മവും തൊഴിൽ സംസ്കാരവും എന്റെ സ്വപ്നങ്ങൾക്കായി ഞാൻ വർഷങ്ങളോളം ഒഴുക്കിയ ആത്മാർത്ഥമായ പരിശ്രമവുമാണെന്ന് ഞാൻ ഉറച്ചു വിശ്വസിക്കുന്നു. ദൈവാനുഗ്രഹത്താൽ, ഈ കൊടുങ്കാറ്റിനിടയിലും ഞാൻ ഒരു പുതിയ കാര്യത്തിൽ ശ്രദ്ധ കേന്ദ്രീകരിക്കാൻ തുടങ്ങി.
അതിശയകരമെന്നു പറയട്ടെ, അതും വളരെ മനോഹരമായി തഴച്ചുവളരാൻ തുടങ്ങിയിരിക്കുന്നു. വലിയ തകർച്ചകൾക്കും ഇരുട്ടിനുമിടയിലും, എല്ലാമൊന്നും നഷ്ടപ്പെട്ടിട്ടില്ലെന്ന് ജീവിതം എന്നെ നിശ്ശബ്ദമായി ഓർമ്മിപ്പിച്ചു. ഈ പോസ്റ്റ് സഹതാപത്തിന് വേണ്ടിയുള്ളതല്ല. ഇത് സത്യത്തിന്റെ തുറന്നുപറച്ചിലാണ്. അതിലുപരി, ഇത് അതിജീവനത്തിന്റെ പ്രഖ്യാപനമാണ്.
സ്വപ്നങ്ങൾക്ക് പിന്നാലെ പായുന്ന എല്ലാവരോടും, പ്രത്യേകിച്ച് യുവസംരംഭകരോടും സ്വന്തം നിലയിൽ എന്തെങ്കിലും കെട്ടിപ്പടുക്കാൻ ശ്രമിക്കുന്ന സ്ത്രീകളോടും എനിക്ക് പറയാനുള്ളത് ഇതാണ്: വിജയം എപ്പോഴും ആകർഷകമായിരിക്കില്ല. സ്വപ്നം എത്ര വലുതാണോ, അത്രയും കഠിനമായിരിക്കും പരീക്ഷണം. മിനുക്കിയ വാക്കുകളുമായും പ്രൊഫഷണൽ രേഖകളുമായും തികഞ്ഞ വാഗ്ദാനങ്ങളുമായും നിങ്ങളുടെ അടുക്കൽ വരുന്ന എല്ലാവരുടെയും ഉദ്ദേശ്യങ്ങൾ നല്ലതാകണമെന്നില്ല. വൈകാരികമായി ചൂഷണം ചെയ്യുന്ന വേട്ടക്കാർ ഈ ലോകത്തുണ്ട്. സാമ്പത്തികമായി ഇരപിടിക്കുന്നവരും ഉണ്ട്. ദയവായി സ്വയം സംരക്ഷിക്കുക.
പിന്നെ, എന്നെ ഈ അവസ്ഥയിലാക്കിയ ആ വ്യക്തിയോട്... ഞാൻ ഒന്നേ പറയാൻ ആഗ്രഹിക്കുന്നുള്ളൂ: ഒരു സ്വപ്നം കെട്ടിപ്പടുക്കാൻ ശ്രമിക്കുന്ന ഓരോ സംരംഭകന് പിന്നിലും ഉത്തരവാദിത്തങ്ങളും വികാരങ്ങളും സമ്മർദ്ദങ്ങളും കുടുംബവും വർഷങ്ങളുടെ കഠിനാധ്വാനവുമുള്ള ഒരു യഥാർത്ഥ മനുഷ്യനുണ്ട്. നിങ്ങൾ ആ സാഹചര്യത്തിൽ നിന്ന് അപ്രത്യക്ഷനായിട്ടുണ്ടാകാം, പക്ഷേ മറ്റൊരാളുടെ ജീവിതത്തിൽ നിങ്ങൾ എങ്ങനെയുള്ളൊരു കൊടുങ്കാറ്റാണ് അവശേഷിപ്പിച്ചു പോയതെന്ന് നിങ്ങൾക്ക് ഒരു ഊഹവുമില്ല.
നിങ്ങൾക്കും അമ്മമാരും സഹോദരിമാരും കസിൻസും അമ്മായിമാരുമൊക്കെ അടങ്ങുന്ന ഒരു കുടുംബമുണ്ട്; നാളെ അവരും സ്വന്തം നിലയിൽ എന്തെങ്കിലും ചെയ്യാനും സ്വപ്നങ്ങൾക്ക് പിന്നാലെ സഞ്ചരിക്കാനും ആഗ്രഹിച്ചേക്കാം. അങ്ങനെയൊരാളെ മറ്റാരെങ്കിലും ഇതേപോലെയുള്ള മാനസിക, വൈകാരിക, സാമ്പത്തിക തകർച്ചയിലേക്ക് തള്ളിവിട്ടാൽ എങ്ങനെയുണ്ടാകുമെന്ന് ചിന്തിച്ചു നോക്കുക.
നിങ്ങളുടെ പേരിനൊപ്പം ഒരു കുടുംബവും അതിന്റെ ആഘാതങ്ങളും ഉള്ളതുകൊണ്ട് മാത്രമാണ് ഞാൻ ഇപ്പോഴും നിങ്ങളുടെ പേരുവിവരങ്ങൾ പരസ്യമാക്കാത്തത്. വെറുമൊരു ദേഷ്യത്തിന്റെയോ വികാരത്തിന്റെയോ പുറത്ത് മറ്റൊരാളെ തകർക്കാൻ ഞാൻ ആഗ്രഹിക്കുന്നില്ല. ഒന്നുമില്ലായ്മയിൽ നിന്ന് ഞാൻ ഒരിക്കൽ എന്നെ കെട്ടിപ്പടുത്തതാണ്. ആവശ്യമെങ്കിൽ ഇനിയും ഞാൻ അത് ചെയ്യും.ഈ ഘട്ടം എന്നെ പലവിധത്തിൽ തകർത്തു കളഞ്ഞു, പക്ഷേ ഉള്ളിൽ ഞാൻ എത്രത്തോളം വലിയ കരുത്ത് ചുമക്കുന്നുണ്ടെന്ന് അത് എനിക്ക് കാണിച്ചുതന്നു...’’ എന്നായിരുന്നു അഭിരാമി കുറിച്ചത്.
