ഒന്റാരിയോ: ജോലി ചെയ്യുന്നതിനിടെ, അപൂര്വമായി ഉണ്ടായ കരടി ആക്രമണത്തില് മിക്സഡ് മാര്ഷ്യല് ആര്ട്സ് താരമായ മലയാളി കാനഡയില് കൊല്ലപ്പെട്ടു. മൂന്ന് വര്ഷം മുമ്പ് കാനഡയില് എത്തിയ 27 കാരനായ ഹൃഷികേശ് കൊളോത്താണ് മരിച്ചത്. മെയ് 8ന് കാനഡയിലെ വടക്കന് സസ്കാച്ചവാനിലുള്ള ഉള്ഗ്രാമത്തിലെ യുറേനിയം ഖനന മേഖലയില് ജോലി ചെയ്യുമ്പോഴാണ് കടുവയുടെ ആക്രമണം ഉണ്ടായത്.
ബ്രിട്ടീഷ് കൊളംബിയയിലെ പെന്റിക്ടണിലുള്ള ജ്യേഷ്ഠന് അര്ജുനോടൊപ്പം താമസിക്കാനായി മൂന്ന് വര്ഷം മുമ്പാണ് ഹൃഷികേശ് കാനഡയിലേക്ക് കുടിയേറിയത്. ബോക്സിംഗില് മികവുണ്ടായിരുന്ന ഹൃഷികേശ് ആഗോള തലത്തിലെ പ്രമുഖ എം.എം.എ പോരാട്ടവേദിയായ യു.എഫ്.സിയില് മത്സരിക്കുകയെന്ന ലക്ഷ്യത്തോടെ കഴിഞ്ഞ പത്ത് വര്ഷത്തിലേറെയായി കഠിന പരിശീലനത്തിലായിരുന്നു.
സസ്കാറ്റൂണില് നിന്ന് ഏകദേശം 850 കിലോമീറ്റര് വടക്കുകിഴക്കായി നോര്ഡ്ബൈ തടാകത്തിന് സമീപം, വാന്കൂവര് ആസ്ഥാനമായി പ്രവര്ത്തിക്കുന്ന 'യുറേനിയം എക്സ് ഡിസ്കവറി കോര്പ്പറേഷന്' നടത്തുന്ന 'സൂ ബേ' പ്രോജക്റ്റില് കോണ്ട്രാക്ട് ടെക്നീഷ്യനായി ജോലി ചെയ്തുവരികയായിരുന്നു ഹൃഷികേശ്. ആക്രമണത്തിന് പിന്നാലെ, സൈറ്റിലുണ്ടായിരുന്ന മറ്റൊരു ജീവനക്കാരന് കരടിയെ വെടിവെച്ചുകൊന്നു.
ആക്രമണത്തിന്റെ കാരണം കണ്ടെത്തുന്നതിനായുള്ള അന്വേഷണത്തിന്റെ ഭാഗമായി, കരടിയുടെ ശാരീരികാവസ്ഥയും ആരോഗ്യനിലയും മറ്റ് തെളിവുകളും പരിശോധിക്കുന്നതിനായി അതിന്റെ ശരീരാവശിഷ്ടങ്ങള് സസ്കാറ്റൂണിലെ വെസ്റ്റേണ് കോളേജ് ഓഫ് വെറ്ററിനറി മെഡിസിനിലേക്ക് പോസ്റ്റ്മോര്ട്ടത്തിനായി മാറ്റിയിട്ടുണ്ട്. ഈ അപ്രതീക്ഷിത വിയോഗം അദ്ദേഹത്തിന്റെ കുടുംബത്തെ ഒന്നാകെ ഞെട്ടിച്ചിരിക്കുകയാണ്.
