തിരുവനന്തപുരം: നിയമസഭാ തെരഞ്ഞെടുപ്പിലെ പരാജയത്തിന് പിന്നില് ഭരണപരമായ വീഴ്ചകള് ബാധിച്ചെന്ന് സിപിഐഎം വിലയിരുത്തല്. തുടര്ച്ചയായ പത്ത് വര്ഷത്തെ ഭരണം പാര്ട്ടി സംവിധാനങ്ങളില് മരവിപ്പുണ്ടാക്കിയതായി സംസ്ഥാന സമിതിയില് സമര്പ്പിച്ച റിപ്പോര്ട്ട് വ്യക്തമാക്കുന്നു. തെറ്റുകള് തിരുത്താന് മടിക്കുന്നവര്ക്കെതിരെ കര്ശന നിലപാട് സ്വീകരിക്കാനും പാര്ട്ടി തീരുമാനിച്ചിട്ടുണ്ട്.
പൊതുവായ ഒരു ഭരണവിരുദ്ധ തരംഗം ഉണ്ടായിരുന്നില്ലെങ്കിലും, സര്ക്കാരിന്റെ ചില തീരുമാനങ്ങളോടും നടപടികളോടും ജനങ്ങള്ക്കുണ്ടായ വിയോജിപ്പ് വോട്ടിങ്ങില് പ്രതിഫലിച്ചു. ദീര്ഘകാലത്തെ ഭരണം പാര്ട്ടിയുടെ താഴെത്തട്ടിലുള്ള പ്രവര്ത്തനങ്ങളെ ബാധിച്ചു. ജനങ്ങളുമായുള്ള സമ്പര്ക്കത്തില് വന്ന കുറവ് മൂലം പല വിഭാഗങ്ങളും പാര്ട്ടിയില് നിന്ന് അകന്നുപോയി. പാര്ട്ടിയില് ഒറ്റപ്പെട്ട മാറ്റങ്ങള് വരുത്തിയത് കൊണ്ട് മാത്രം കാര്യമില്ല.
എല്ലാ തലങ്ങളിലും സമഗ്രമായ തിരുത്തല് പ്രക്രിയ അനിവാര്യമാണ്. ഭരണവിരുദ്ധ വികാരവും ഒരു ഘടകമാണെന്ന് ഒടുവില് സിപിഐഎം ഔദ്യോഗികമായി സമ്മതിച്ചു. പാര്ട്ടിയെയും ഭരണത്തെയും നവീകരിക്കുന്നതിനായി സംസ്ഥാന പ്ലീനം വിളിച്ചുചേര്ക്കാനും ആലോചന യുണ്ട്.
പരാജയത്തിന്റെ ആഘാതം ഏതെങ്കിലും ഒരു വ്യക്തിയുടെ മേല് മാത്രം കെട്ടിവെക്കാന് സിപിഐഎം തയ്യാറായിട്ടില്ല. തോല്വിക്ക് പിന്നില് പാര്ട്ടി നേതൃത്വത്തിന്റെ കൂട്ടായ വീഴ്ചയാണെന്നാണ് സംസ്ഥാന സമിതിയുടെ വിലയിരുത്തല്. പോരായ്മകള് സ്വയം വിമര്ശനപരമായി കണ്ട് തിരുത്താന് എല്ലാവരും തയ്യാറാകണമെന്ന് റിപ്പോര്ട്ട് ആവശ്യപ്പെടുന്നു.
