പത്തനംതിട്ട : ശബരിമല സ്വര്ണക്കൊള്ള കേസില് പ്രതിയായ സി.പി.എം. നേതാവും തിരുവിതാംകൂര് ദേവസ്വം ബോര്ഡ് മുന് പ്രസിഡന്റുമായ എ. പത്മകുമാര് ആത്മകഥയെഴുതാന് തയാറെടുക്കുന്നു.
പാര്ട്ടി പ്രവര്ത്തനത്തിന്റെ നാള്വഴികളും എം.എല്.എ, ദേവസ്വം ബോര്ഡ് പ്രസിഡന്റ്, സംസ്ഥാന സഹകരണ ഗ്യാരന്റി ബോര്ഡ് ചെയര്മാന് എന്നീ നിലകളില് പ്രവര്ത്തിച്ച അനുഭവങ്ങളും ക്രോഡീകരിച്ചശേഷം പുസ്തകരചനയിലേക്കു കടക്കും.
ദേവസ്വം ബോര്ഡ് പ്രസിഡന്റായുള്ള പ്രവര്ത്തനകാലയളവ് പത്മകുമാര് വിവരിക്കുമ്പോള് ആരുടെയൊക്കെ ഉറക്കം നഷ്ടപ്പെടുമെന്നതാണ് ഏറെ ആകാംക്ഷയുണര്ത്തുന്നത്. സ്വര്ണക്കൊള്ളയുമായി ബന്ധപ്പെട്ട് പത്മകുമാര് സൂചിപ്പിച്ച 'ദൈവതുല്യന്' ആരെന്നതിനും ആത്മകഥ ഉത്തരം നല്കിയേക്കും.
സ്വര്ണക്കൊള്ള കേസുമായി ബന്ധപ്പെട്ട ദേവസ്വം ബോര്ഡ് രേഖകളില് പത്മകുമാറിന്റേതല്ലാത്ത കുറിപ്പുകളുണ്ടെന്ന അഭ്യൂഹവും നിലനില്ക്കുന്നു. ശബരിമല മേല്ശാന്തി നിയമനവുമായി ബന്ധപ്പെട്ട ചില വെളിപ്പെടുത്തലുകളും യുവതീപ്രവേശവിഷയത്തില് താന് സ്വീകരിച്ച നിലപാടും പത്മകുമാര് ആത്മകഥയില് വിവരിച്ചേക്കും.
ശബരിമല സ്വര്ണക്കൊള്ള കേസില് പ്രതിയായിട്ടും പത്മകുമാറിനെ പുറത്താക്കാന് സി.പി.എം. തയാറായിരുന്നില്ല. എന്നാല്, അംഗത്വം പുതുക്കാതിരുന്നതോടെ നിലവില് സാങ്കേതികമായി അദ്ദേഹം പാര്ട്ടിക്കു പുറത്താണ്.
