രാം ചരണിനെ നായകനാക്കി ബുച്ചി ബാബു സന സംവിധാനം ചെയ്ത ചിത്രമാണ് ' പെദ്ധി'. സിനിമയിലെ രാം ചരണിന്റെ പ്രകടനത്തിന് പ്രശംസകളും കയ്യടികളുമാണ് ലഭിക്കുന്നത്. എന്നാല് ചിത്രത്തില് നായികയായി എത്തിയ ജാന്വി കപൂറിന് വിമര്ശനങ്ങളും ട്രോളുകളുമാണ് നേരിടേണ്ടി വന്നത്. ഇപ്പോഴിതാ പെദ്ധിയുമായി ബന്ധപ്പെട്ട വിവാദങ്ങളില് ജാന്വി കപൂറിന് പിന്തുണയറിയിച്ചിരിക്കുകയാണ് നടി മധുബാല.
ചിത്രങ്ങളില് സ്ത്രീ കഥാപാത്രങ്ങളെ ചിത്രീകരിക്കുന്ന രീതിയില് നടിമാര്ക്ക് ഉത്തരവാദിത്തമുണ്ടോയെന്ന ചോദ്യത്തിന് ഒരു അഭിമുഖത്തില് പ്രതികരിക്കുകയായിരുന്നു മധുബാല. പെദ്ധിയുടെ കാര്യത്തില് എന്താണ് ഉണ്ടായതെന്ന് അറിയില്ലെന്ന് പറഞ്ഞ മധു, പലപ്പോഴും നടിമാര് എങ്ങനെയാണ് ചിത്രീകരിക്കപ്പെടുന്നത് എന്നതില് തങ്ങള്ക്ക് പൂര്ണമായി അറിവുണ്ടാവാറില്ലെന്നും വ്യക്തമാക്കി.
'ഞങ്ങൾ നൃത്തംചെയ്യും. അത് മനോഹരമായും ലൈംഗികവത്കരിച്ചും കാണിക്കാം. അതെല്ലാം ക്യാമറ ആംഗിളിനെ ആശ്രയിച്ചിരിക്കും. ചിലപ്പോൾ നടിമാർക്ക് അക്കാര്യത്തിൽ അറിവുണ്ടാവില്ല. എന്നാൽ, നിങ്ങൾക്ക് അക്കാര്യത്തിൽ ബോധ്യമുണ്ടാവുകയും അതിൽ വിയോജിപ്പുമുണ്ടെങ്കിൽ, ഇത് ശരിയല്ല ഞാൻ ചെയ്യില്ല എന്ന് പറയാൻ സാധിക്കണം', മധുബാല പറഞ്ഞു. നടി എന്ന നിലയിൽ ജാൻവിയെ ഇഷ്ടമാണെന്നും അവർ നല്ലൊരു നർത്തകിയാണെന്നും ഓരോ സിനിമ കഴിയുന്തോറും അവർ വളരുകയാണെന്നും മധുബാല കൂട്ടിച്ചേർത്തു.
ജൂണ് നാലിനാണ് ' പെദ്ധി' തിയേറ്ററുകളിലെത്തിയത്. ചിത്രത്തിലെ ജാന്വിയുടെയും രാം ചരണിന്റെയും പ്രണയരംഗങ്ങള്ക്കെതിരെ കനത്ത വിമര്ശനമാണ് ഉയര്ന്നത്. പ്രേക്ഷകരില് നിന്ന് ഇത്തരമൊരു പ്രതികരണം താന് പ്രതീക്ഷിച്ചില്ലെന്ന് സംവിധായകന് ബുച്ചി ബാബു സന പിന്നീട് സമ്മതിച്ചിരുന്നു. രാം ചരണിന്റെയും ജാന്വിയുടെയും കഥാപാത്രങ്ങള്ക്കിടയിലെ മനോഹരമായ ഒരു പ്രണയമാണ് താന് ഉദ്ദേശിച്ചതെന്നും, എന്നാല് ചില ദൃശ്യങ്ങള് തെറ്റിദ്ധാരണാജനകമായിരുന്നുവെന്നും അദ്ദേഹം വ്യക്തമാക്കി. പ്രേക്ഷകരുടെ ഭാഗത്തുനിന്നും വിമര്ശനം ഉയര്ന്നതിനെ തുടര്ന്ന് ചിത്രത്തിലെ അത്തരം ദൃശ്യങ്ങള് നീക്കം ചെയ്തതായും സംവിധായകന് അറിയിച്ചു.
