റൈഡര്മാരുടെ സൗകര്യവും സുരക്ഷയും വര്ധിപ്പിക്കുന്നതിന്റെ ഭാഗമായി സ്കൂട്ടറുകള്ക്കായി വോയ്സ് കമാന്ഡുകള് അവതരിപ്പിച്ചിരിക്കുകയാണ് ബെംഗളൂരു ആസ്ഥാനമായുള്ള സ്റ്റാര്ട്ടപ്പ് ബ്രാന്ഡ് ഏഥര് എനര്ജി . ഫോണോ ടച്ച്സ്ക്രീനോ ഉപയോഗിക്കുന്നതിന് പകരം വോയ്സ് കമാന്ഡുകള് വഴി മിക്ക ജോലികളും പൂര്ത്തിയാക്കാന് ഉപയോക്താക്കളെ പ്രാപ്തരാക്കുക എന്നതാണ് പ്രാഥമിക ലക്ഷ്യം.
ഈ പുതിയ ഫീച്ചര് ഏതര്സ്റ്റാക്ക് 7 അപ്ഡേറ്റിന്റെ ഭാഗമാണെന്ന് ഏഥര് എനര്ജി പറയുന്നു.
ജെന് 3 ഹാര്ഡ്വെയറിനെയോ പുതിയ പതിപ്പുകളെയോ അടിസ്ഥാനമാക്കിയുള്ള ഏഥര് 450X, 450 അപെക്സ്, റിസ്ത Z എന്നീ ബ്രാന്ഡിന്റെ ഇലക്ട്രിക് സ്കൂട്ടറുകളില് ഇപ്പോള് വോയ്സ് കമാന്ഡ് പ്രവര്ത്തനം ലഭ്യമാണ്. OTA അപ്ഡേറ്റുകള് വഴിയാണ് വോയ്സ് കമാന്ഡ് സവിശേഷത അവതരിപ്പിച്ചിരിക്കുന്നത്. നിരവധി ഉപയോക്താക്കള്ക്ക് ഇതിനകം ഈ അപ്ഡേറ്റ് ലഭിച്ചിട്ടുണ്ട്. ലാര്ജ് ലാംഗ്വേജ് മോഡലുകള് (LLM) സ്വാഭാവിക ഭാഷാ പ്രോസസിംഗും ഉപയോഗിച്ചാണ് ഏഥറിന്റെ വോയ്സ് കമാന്ഡ് ഫീച്ചര് പ്രവര്ത്തിക്കുന്നത്. വോയ്സ് കമാന്ഡ് സിസ്റ്റത്തിന് ഇന്ത്യന് ആക്സന്റുകളും ഭാഷാഭേദങ്ങളും എളുപ്പത്തില് മനസിലാക്കാന് കഴിയുമെന്നും ഏഥര് ഉറപ്പാക്കിയിട്ടുണ്ട്.
ബ്രാന്ഡിന്റെ ഹാലോ സ്മാര്ട്ട് ഹെല്മെറ്റിനൊപ്പം പ്രവര്ത്തിക്കുന്നതിനാണ് ഏഥര് സ്കൂട്ടറുകള്ക്കുള്ള വോയ്സ് കമാന്ഡുകള് രൂപകല്പ്പന ചെയ്തിരിക്കുന്നത്. ഏത് സ്റ്റാന്ഡേര്ഡ് ബ്ലൂടൂത്ത് ഹെഡ്സെറ്റ് വഴിയും ഉപയോക്താക്കള്ക്ക് ഈ ഫീച്ചര് ആക്സസ് ചെയ്യാന് കഴിയുമെന്നതും ശ്രദ്ധേയമായ കാര്യമാണ്. നാവിഗേഷന്, കോളുകള്, വെഹിക്കിള് സെറ്റിംഗ്, മീഡിയ കണ്ട്രോളുകള് തുടങ്ങിയവയെല്ലാം വോയ്സ് കമാന്ഡിലൂടെ ക്രമീകരിക്കാന് കഴിയും.
പുതിയ ഫീച്ചര് എത്തിയതോടെ വണ്ടിയോടിക്കുന്നവര്ക്ക് ഇനി ഫോണ് ഉപയോഗിക്കേണ്ടതില്ല അല്ലെങ്കില് സ്ക്രീനില് ഇടയ്ക്കിടെ നോക്കേണ്ട ആവശ്യവും വരുന്നില്ല. ഇതിലൂടെ സുരക്ഷയും ഗണ്യമായി വര്ധിപ്പിക്കാനും കഴിയും. ഒരു പ്രത്യേക കീവേഡുകളാല് സിസ്റ്റം പരിമിതപ്പെടുത്തിയിട്ടില്ലാത്തതിനാല് മിക്ക ജോലികളും വോയ്സ് കമാന്ഡുകള് വഴി ചെയ്യാന് കഴിയും.
