തിരുവനന്തപുരം: കേരള പോലീസിലെ ഐപിഎസ് തലപ്പത്ത് സര്ക്കാര് നടത്തിയ വന് അഴിച്ചുപണിയില് ഉദ്യോഗസ്ഥര്ക്കിടയില് പരസ്യ അതൃപ്തി. നിലവിലെ സ്ഥലംമാറ്റത്തില് അസൗകര്യം അറിയിച്ച് രണ്ട് മുതിര്ന്ന ഉദ്യോഗസ്ഥര് സര്ക്കാരിനെ സമീപിച്ചു. തൃശ്ശൂര് റേഞ്ച് ഡിഐജിയില് നിന്നും കണ്ണൂര് റേഞ്ച് ഡിഐജിയായി മാറ്റിയ ടി. നാരായണന് പുതിയ പദവി ഏറ്റെടുക്കാനാവില്ലെന്ന് സര്ക്കാരിനെ അറിയിച്ചിട്ടുണ്ട്. തിരുവനന്തപുരം സിറ്റി പൊലീസ് കമ്മീഷണര് സ്ഥാനത്തുനിന്നും തൃശ്ശൂര് റേഞ്ച് ഡിഐജിയായി മാറ്റിയ കെ. കാര്ത്തികും ഈ നിയമനത്തില് അതൃപ്തി അറിയിച്ച് വീണ്ടും സ്ഥലംമാറ്റം വേണമെന്ന് ആവശ്യപ്പെട്ടിട്ടുണ്ട്.
ഡിജിപി സമര്പ്പിച്ച ഔദ്യോഗിക പട്ടികയിലെ പല ഉദ്യോഗസ്ഥര്ക്കും അര്ഹമായ നിയമനം ലഭിച്ചില്ലെന്ന ആക്ഷേപം ശക്തമാണ്. പൊലീസ് ആസ്ഥാനം പോലുമറിയാതെയാണ് ആഭ്യന്തര വകുപ്പ് ഈ സ്ഥലംമാറ്റങ്ങള് തീരുമാനിച്ചതെന്ന ആരോപണവും ഉയരുന്നുണ്ട്. മറ്റ് ജില്ലാ പൊലീസ് മേധാവിമാര്ക്കും ഉടന് തന്നെ മാറ്റമുണ്ടാകുമെന്നാണ് സൂചന. അതേസമയം, ഉദ്യോഗസ്ഥരുടെ ഭാഗത്തുനിന്നുണ്ടായ പരാതികള് പ്രത്യേകമായി പരിഗണിക്കാനാണ് നിലവില് ആഭ്യന്തര വകുപ്പ് തീരുമാനിച്ചിരിക്കുന്നത്.
അതിനിടെ, ജില്ലാസ്റ്റേറ്റ് സ്പെഷ്യല് ബ്രാഞ്ചുകളിലെ അഴിച്ചുപണി വൈകുന്നതിനെതിരെ ഭരണപക്ഷ അനുകൂല സംഘടനാ നേതാക്കള് രംഗത്തെത്തിയിട്ടുണ്ട്. മുന് എല്ഡിഎഫ് സര്ക്കാര് നിയമിച്ച സ്പെഷ്യല് ബ്രാഞ്ച് ഉദ്യോഗസ്ഥരെ ഉടന് മാറ്റണമെന്ന ആവശ്യം ഉന്നയിച്ച് ഇവര് ആഭ്യന്തര മന്ത്രിയെ അതൃപ്തി അറിയിച്ചു. മുന് സര്ക്കാര് അധികാരമേറ്റ ദിവസങ്ങള്ക്കുള്ളില് തന്നെ ഇത്തരം മാറ്റങ്ങള് വരുത്തിയിരുന്നുവെന്നും, സ്പെഷ്യല് ബ്രാഞ്ചിലെ അഴിച്ചുപണി ഇനിയും വൈകിയാല് അത് സര്ക്കാരിന് വലിയ തലവേദനയാകുമെന്ന മുന്നറിയിപ്പും നേതാക്കള് നല്കുന്നു.
ക്രമസമാധാന ചുമതലയുള്ള എഡിജിപിയായി പി. വിജയനെ നിയമിച്ചതടക്കമുള്ള വലിയ മാറ്റങ്ങളാണ് കഴിഞ്ഞ ദിവസം പൊലീസ് തലപ്പത്ത് നടന്നത്. ക്രമസമാധാന ചുമതലയില് ഉണ്ടായിരുന്ന എച്ച്. വെങ്കിടേഷിനെ െ്രെകംബ്രാഞ്ച് മേധാവിയായും മാറ്റി നിയമിച്ചിരുന്നു. ഈ പ്രധാന മാറ്റങ്ങള്ക്ക് പിന്നാലെയാണ് ഇപ്പോള് ഡിഐജി റാങ്കിലുള്ള ഉദ്യോഗസ്ഥരുടെ അതൃപ്തിയും സ്പെഷ്യല് ബ്രാഞ്ച് പുനഃസംഘടനയെച്ചൊല്ലിയുള്ള തര്ക്കങ്ങളും പുറത്തുവരുന്നത്.
