തിരുവനന്തപുരം: സംസ്ഥാന ബജറ്റ് തയ്യാറാക്കുന്നതിനുള്ള തിരക്കുകളെ തുടർന്ന് മുഖ്യമന്ത്രി വി ഡി സതീശനെ ജൂൺ 19 (വെള്ളിയാഴ്ച) വരെ നേരിട്ട് കാണാൻ സാധിക്കില്ലെന്ന് മുഖ്യമന്ത്രിയുടെ ഓഫീസ് അറിയിച്ചു. ഈ കാലയളവിൽ സന്ദർശക നിയന്ത്രണം ഏർപ്പെടുത്തിയിരിക്കുന്നതായും ഓഫീസ് വ്യക്തമാക്കി.
പൊതുജനങ്ങൾക്കും മറ്റ് സന്ദർശകർക്കും ഉണ്ടാകുന്ന താൽക്കാലിക ബുദ്ധിമുട്ടിൽ ഖേദം പ്രകടിപ്പിച്ച ഓഫീസ്, എല്ലാവരുടെയും സഹകരണം അഭ്യർത്ഥിക്കുകയും ചെയ്തു. “നാടിന്റെ സമഗ്ര വികസനവും ജനക്ഷേമവും ലക്ഷ്യമിട്ടുള്ള ബജറ്റ് തയ്യാറാക്കുന്നതിനുള്ള തിരക്കുകളിലാണ് മുഖ്യമന്ത്രി. അതിനാൽ ഈ ദിവസങ്ങളിൽ നേരിട്ടുള്ള സന്ദർശനങ്ങൾ സാധ്യമല്ല. ഈ താൽക്കാലിക ബുദ്ധിമുട്ടിൽ സഹകരണം പ്രതീക്ഷിക്കുന്നു” എന്നായിരുന്നു അറിയിപ്പ്.
അതേസമയം, യുഡിഎഫ് സർക്കാരിന്റെ ബജറ്റ് വെള്ളിയാഴ്ച അവതരിപ്പിക്കാനിരിക്കുകയാണ്. ‘സദ്ഭരണം, സഹാനുഭൂതി’ എന്നതാണ് ബജറ്റിന്റെ പ്രമേയം. അന്താരാഷ്ട്ര വികസന കാഴ്ചപ്പാട് പ്രതിഫലിക്കുന്ന ബജറ്റായിരിക്കും ഇതെന്നും, ‘ഇന്ദിരാ ഗാരന്റി’ നടപ്പാക്കുന്നതിനുള്ള വകയിരുത്തലുകളും ഉണ്ടാകുമെന്നുമാണ് പ്രതീക്ഷ.
