മിനിസ്ക്രീന് പ്രേക്ഷകര്ക്ക് സുപരിചിത മുഖങ്ങളാണ് ഗോവിന്ദ് പദ്മസൂര്യയും ഗോപിക അനിലും. ഇവര് തമ്മിലുള്ള വിവാഹം ആരാധകര് ഏറ്റെടുത്തതാണ്. സമൂഹമാധ്യമങ്ങളില് സജീവമായ ഈ താരദമ്പതികള് തങ്ങളുടെ ജീവിതത്തിലെ വിശേഷങ്ങളെല്ലാം ആരാധകരുമായി പങ്കുവയ്ക്കാറുണ്ട്. ഇപ്പോള് ജിപിയുടെ പിറന്നാള് ദിനത്തില് ഗോപിക പങ്കുവച്ച കുറിപ്പാണ് ശ്രദ്ധേയമാകുന്നത്. തന്റെ ജീവിതത്തിലെ ഏറ്റവും വലിയ കരുത്തും ഭാഗ്യവുമാണ് ജിപി എന്ന് ഗോപിക സമൂഹമാധ്യമങ്ങളില് കുറിച്ചു.
'' ഹാപ്പി ബര്ത്ത്ഡേ ചേട്ടാ. നിങ്ങളോടൊപ്പമുളള ജീവിതം സന്തോഷവും, ചിരിയും, തമാശകളും, സാഹസികതകളും, പിന്നെ എന്തിനെയും ഏതിനെയും ഒന്നിച്ച് തൊട്ടറിയുന്നതിന്റെ ആഹ്ളാദവുമാണ്. ഓരോ നിമിഷവും നിങ്ങളോടൊപ്പം പങ്കിടാന് കഴിയുമ്പോഴാണ് അത് മനോഹരമായൊരു ഓര്മ്മയായി മാറുന്നത്. എനിക്ക് എന്തൊക്കെയാണ് വേണ്ടതെന്ന് ഞാന് പോലും അറിയുന്നതിന് മുന്പേ അതെല്ലാമായി എന്റെ ജീവിതത്തിലേക്ക് വന്നതിന് നന്ദി. നിങ്ങള് ആണ് എന്റെ ഏറ്റവും വലിയ കരുത്തും, എനിക്ക് ലഭിച്ച ഏറ്റവും വലിയ ഭാഗ്യവും, ഈ ജീവിതത്തെ ഇത്രയേറെ അര്ത്ഥവത്താക്കുന്ന ഒരേയൊരു വ്യക്തിയും.
നിങ്ങളുടെ മുഖത്ത് പുഞ്ചിരി വിരിയിക്കുന്ന എല്ലാ കാര്യങ്ങളും, ആയുസ്സും ആരോഗ്യവും, ഒരുപാട് സ്നേഹവും സന്തോഷവും ജീവിതകാലം മുഴുവന് നിങ്ങള്ക്കുണ്ടാകട്ടെ എന്ന് ഞാന് ആശംസിക്കുന്നു. ഇത് നിങ്ങള്ക്കുളളതാണ്, നമ്മള്ക്കായുള്ളതാണ്. ഒന്നിച്ച് നടത്താനിരിക്കുന്ന എല്ലാ യാത്രകള്ക്കും, മനോഹരമായ നിമിഷങ്ങള്ക്കും, ഇനി വരാനിരിക്കുന്ന ഒരുപാട് ജന്മദിനങ്ങള്ക്കും വേണ്ടിയുള്ളതാണ്. സ്നേഹവും ജീവനും നിറഞ്ഞ പ്രിയപ്പെട്ടവന് ജന്മദിനാശംസകള്. ഐ ലവ് യു'' , ഗോപിക കുറിച്ചു.
ഗോപികയുടെ പോസ്റ്റിന് താഴെ നിരവധിപ്പേര് ജിപിയ്ക്ക് ജന്മദിനാശംസകള് നേര്ന്ന് എത്തി. 2024 ജനുവരി 28 നായിരുന്നു ജിപിയുടെയും ഗോപികയുടെയും വിവാഹം.
എം.ജി. ശശി സംവിധാനം ചെയ്ത ' അടയാളങ്ങള്' എന്ന ചിത്രത്തിലൂടെയാണ് ഗോവിന്ദ് പദ്മസൂര്യ സിനിമയില് അരങ്ങേറ്റം കുറിച്ചത്. ഡാഡികൂള്, ഐജി, വര്ഷം, പ്രേതം 2 എന്നിവയാണ് പ്രധാന സിനിമകള്. കീ എന്ന ചിത്രത്തിലൂടെ തമിഴിലും ' അല വൈകുണ്ഠപുരമുലു' എന്ന ചിത്രത്തിലൂടെ തെലുങ്കിലും അഭിനയിച്ചു. അവതാരകനായും സജീവമാണ് താരം. ബാലതാരമായിട്ടാണ് ഗോപിക സിനിമയില് എത്തിയത്. സാന്ത്വനം സീരിയല് ആണ് ഗോപികയെ കൂടുതല് ശ്രദ്ധേയയാക്കിയത്.
