തമിഴ്നാട് മുഖ്യമന്ത്രി വിജയ്യുമായുള്ള കൂടിക്കാഴ്ചയുടെ ചിത്രങ്ങൾ പങ്കുവെച്ച് നടൻ സിമ്പു. മുഖ്യമന്ത്രിയോടുള്ള ആദരവും പിന്തുണയും വ്യക്തമാക്കുന്ന കുറിപ്പോടെയാണ് താരം ചിത്രങ്ങൾ സാമൂഹികമാധ്യമങ്ങളിൽ പങ്കുവെച്ചത്.
"ബഹുമാനപ്പെട്ട മുഖ്യമന്ത്രി വിജയ് അണ്ണനെ ഇന്ന് കാണാൻ സാധിച്ചതിൽ വലിയ സന്തോഷം. തമിഴ്നാട്ടിലെ ജനങ്ങളെ സേവിക്കുന്ന അദ്ദേഹത്തിന് സർവ്വശക്തന്റെ അനുഗ്രഹവും കരുത്തും വിജയവും ഉണ്ടാകട്ടെ എന്ന് ആശംസിക്കുന്നു,"- സിമ്പു കുറിച്ചു. വിജയിയെ 'അണ്ണാ' എന്ന് അഭിസംബോധന ചെയ്തുകൊണ്ടുള്ള സിമ്പുവിന്റെ പോസ്റ്റ് ആരാധകർ ഇതിനകം തന്നെ ഏറ്റെടുത്തുകഴിഞ്ഞു.
ഇരുതാരങ്ങളും തമ്മിലുള്ള ഊഷ്മളമായ സൗഹൃദവും പരസ്പര ബഹുമാനവും വ്യക്തമാക്കുന്നതാണ് പുറത്തുവന്ന ചിത്രങ്ങൾ. ഒരു ചിത്രത്തിൽ ഇരുവരും പരസ്പരം കെട്ടിപ്പിടിക്കുന്നതും, മറ്റൊരു ചിത്രത്തിൽ വളരെ ലളിതമായ അന്തരീക്ഷത്തിൽ സംസാരിച്ചിരിക്കുന്നതുമാണ് കാണാൻ കഴിയുന്നത്.
ചിത്രങ്ങൾ പുറത്തുവന്നതിന് പിന്നാലെ സോഷ്യൽ മീഡിയയിൽ ഇവരുടെ ആത്മബന്ധത്തെ പുകഴ്ത്തിക്കൊണ്ട് കമന്റുകളുടെ പ്രവാഹമാണ്. തമിഴകത്തെ രണ്ട് പ്രിയതാരങ്ങളെ ഒന്നിച്ചു കാണാനായതിന്റെ സന്തോഷത്തിലാണ് ആരാധകർ.
