കോഴിക്കോട് വിലങ്ങാട് സ്വദേശി സിജോ സ്കറിയയുടെ തിരോധാനക്കേസിൽ അന്വേഷണം നടത്താൻ കണ്ണൂർ, കോഴിക്കോട് റൂറൽ എസ്പിമാർക്ക് സംസ്ഥാന പൊലീസ് മേധാവി നിർദേശം നൽകി. സംഭവത്തിൽ ദുരൂഹത നിലനിൽക്കുന്നതായി ചൂണ്ടിക്കാട്ടി ബന്ധുക്കൾ മുഖ്യമന്ത്രിക്കും ഡിജിപിക്കും പരാതി നൽകിയിരുന്നു.
കണ്ണൂർ വാണിയപ്പാറയിലെ ഒരു പള്ളി സെമിത്തേരിയിലെ കല്ലറയിൽ അജ്ഞാത മൃതദേഹം കണ്ടെത്തിയതിനെ തുടർന്നാണ് സിജോയുടെ മാതാവും ബന്ധുക്കളും കേസിൽ ദുരൂഹത നീക്കണമെന്ന് ആവശ്യപ്പെട്ട് രംഗത്തെത്തിയത്.
വിവരങ്ങൾ പ്രകാരം 2014ൽ പിതാവുമായി ഉണ്ടായ വാക്കേറ്റത്തെ തുടർന്ന് സിജോ ഭാര്യയും മകനുമൊത്ത് കണ്ണൂർ കരിക്കോട്ടക്കരി വാണിയൻപാറയിലെ ഭാര്യവീട്ടിലേക്ക് പോയിരുന്നു. പിന്നീട് 2020ൽ ബന്ധുക്കൾ അന്വേഷിച്ചപ്പോൾ, മൂന്ന് വർഷം മുമ്പ് വീട്ടിൽ നിന്നുണ്ടായ വാക്കേറ്റത്തിന് ശേഷം കടയിലേക്ക് പോയതായാണ് അറിയിച്ചതെന്നും പിന്നീട് വിവരമില്ലായിരുന്നുവെന്നും കുടുംബം പറയുന്നു.
പൊലീസ് കേസെടുത്ത് അന്വേഷണം നടത്തിയെങ്കിലും ഒരു പുരോഗതിയും ഉണ്ടായിരുന്നില്ല. പിന്നീട് ഉണ്ണിഈശോ പള്ളി ഇടവകയിലെ സെമിത്തേരിയിൽ പായയിൽ പൊതിഞ്ഞ നിലയിൽ മൃതദേഹം കണ്ടെത്തിയെന്ന വാർത്ത പുറത്തുവന്നതോടെ, അത് സിജോയുടേതാകാമെന്ന സംശയം ബന്ധുക്കൾ ഉയർത്തി. മൃതദേഹം കണ്ടെത്തിയ കാലയളവും സിജോയുടെ താമസസ്ഥലവുമായി ബന്ധപ്പെട്ട സാഹചര്യങ്ങളും ഒത്തുനോക്കിയതോടെയാണ് അന്വേഷണം വീണ്ടും ശക്തമായത്.
