ലഖ്നൗ: ലഖ്നൗവിലെ അലിഗഞ്ചിൽ ആ മൂന്നുനില കെട്ടിടത്തിൽനിന്ന് കറുത്ത പുകച്ചുരുളുകൾ ആകാശത്തേക്ക് ഉയർന്നപ്പോൾ, അതിനേക്കാൾ വേഗത്തിൽ ആ അമ്മയുടെ നെഞ്ച് ഉരുകിത്തീരുകയായിരുന്നു. "എന്റെ മോന്റെ അടുത്തേക്ക് എന്നെ ഒന്നു വിടൂ..." എന്ന് നിലവിളിച്ചുകൊണ്ട് കത്തുന്ന ആ കെട്ടിടത്തിലേക്ക് ഓടിക്കയറാൻ ശ്രമിച്ച ആ അമ്മയെ തടഞ്ഞുനിർത്താൻ പോലീസുകാർ പോലും പ്രയാസപ്പെട്ടു. ഉള്ളിൽ വേനലവധിക്കാലത്തെ ആനിമേഷൻ ക്ലാസിനെത്തിയ ഒരുപാടു കുട്ടികൾ മരണഭയത്തോടെ ശ്വാസം മുട്ടുകയായിരുന്നു.
മൂന്നാം നിലയിൽ 3D ആർട്ടിസ്റ്റായി ജോലി ചെയ്തിരുന്ന ആദിത്യ ശ്രീവാസ്തവ എന്ന യുവാവ് തന്റെ സുഹൃത്തായ ധീരജിനെ ഫോണിൽ വിളിച്ച് തന്നെ എങ്ങനെയെങ്കിലും രക്ഷിക്കണം എന്ന് അപേക്ഷിച്ചപ്പോളാണ് പുറത്തുള്ളവർ ആ ദുരന്തത്തിന്റെ ആഴം അറിഞ്ഞത്. എന്നാൽ, ഫോണിലൂടെ സുഹൃത്തിന്റെ നിലവിളി കേട്ട് ഓടിയെത്തിയ ധീരജിന് പുകപടലങ്ങൾക്കിടയിലേക്ക് നോക്കി നിൽക്കാനേ കഴിഞ്ഞുള്ളൂ, ഒന്നും ചെയ്യാൻ സാധിച്ചില്ല.
ഫയർഫോഴ്സ് എത്തുന്നതിനും മുൻപ് തന്നെ നാട്ടുകാർ തങ്ങളാലാവുന്നത് ചെയ്യാൻ തുടങ്ങി. അവർ ജനൽച്ചില്ലുകൾ വടികൊണ്ട് അടിച്ചുതകർത്തു. കെട്ടിടത്തിന്റെ മുകളിൽനിന്ന് ജീവൻ രക്ഷിക്കാൻ താഴേക്ക് ചാടിയ ഒരു വിദ്യാർത്ഥിയെ, താഴെ കിടക്കകൾ വിരിച്ച് നാട്ടുകാർ നെഞ്ചോട് ചേർത്തുപിടിച്ചു. ആ വഴി കടന്നുപോയ ലാൻസ് നായിക് ഛബി റാം എന്ന ജവാൻ തന്റെ ഔദ്യോഗിക പരിചയം വച്ച് രക്ഷാപ്രവർത്തനത്തിന് ഇറങ്ങിത്തിരിച്ചെങ്കിലും, കൺമുന്നിൽ ഒരുപിടി ജീവനുകൾ പൊലിയുന്നത് അദ്ദേഹത്തിനും നോക്കിനിൽക്കേണ്ടി വന്നു.
താഴത്തെ നിലയിലുണ്ടായിരുന്ന പെറ്റ് ക്ലിനിക്കിലെ മിണ്ടാപ്രാണികളെയും കരിപുരണ്ട ശരീരത്തോടെ രക്ഷാപ്രവർത്തകർ പുറത്തെത്തിച്ചു. വൈകുന്നേരം ആറുമണിയോടെ തീ നിയന്ത്രണവിധേയമായപ്പോൾ ആ വലിയ കെട്ടിടം ഒരു ശ്മശാനമായി മാറിക്കഴിഞ്ഞിരുന്നു. കിംഗ് ജോർജ്ജ് മെഡിക്കൽ യൂണിവേഴ്സിറ്റിയിലെ ട്രോമ സെന്ററിന് മുന്നിൽ പ്രിയപ്പെട്ടവരുടെ ജീവനറ്റ ശരീരങ്ങൾക്കായി കാത്തുനിന്ന ബന്ധുക്കളുടെ കണ്ണീർ ആരുടെയും നെഞ്ച് പൊള്ളിക്കുമായിരുന്നു.
