കേന്ദ്ര ആഭ്യന്തര മന്ത്രാലയത്തിന് കീഴിലുള്ള ഇന്ത്യൻ സൈബർ ക്രൈം കോർഡിനേഷൻ സെന്റർ (I4C) സി-പാനൽ, WHM എന്നിവയുമായി ബന്ധപ്പെട്ട സുരക്ഷാ പ്രശ്നങ്ങളെ കുറിച്ച് മുന്നറിയിപ്പ് നൽകി. ഗുരുതരമായ സുരക്ഷാ പിഴവുകൾ ഹാക്കർമാർക്ക് പാസ്വേഡ് ഇല്ലാതെ തന്നെ സെർവറുകളുടെ അഡ്മിൻ പാനലിലേക്ക് പ്രവേശിക്കാനുള്ള സാധ്യത ഉണ്ടാക്കുമെന്നാണ് മുന്നറിയിപ്പ്.
ഈ ദൗർബല്യം ഉപയോഗിച്ച് റാൻസംവെയർ, മാൽവെയർ ആക്രമണങ്ങൾ, ഡാറ്റ മോഷണം എന്നിവ നടക്കാൻ സാധ്യതയുണ്ടെന്നും ഇത് വെബ്സൈറ്റുകൾ, ഇമെയിൽ സംവിധാനങ്ങൾ, സെർവറുകൾ എന്നിവയെ അപകടത്തിലാക്കാമെന്നും I4C വ്യക്തമാക്കി. ഇതേ വിഷയത്തിൽ ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം (CERT-In)യും മുന്നറിയിപ്പ് നൽകിയിട്ടുണ്ട്.
ബാധിക്കപ്പെട്ട സി-പാനൽ, WHM പതിപ്പുകൾ ഉടൻ അപ്ഡേറ്റ് ചെയ്യണമെന്നും മൾട്ടി-ഫാക്ടർ ഓഥന്റിക്കേഷൻ സജീവമാക്കണമെന്നും, സ്ഥിരമായി ബാക്കപ്പുകൾ സൂക്ഷിക്കണമെന്നും, അഡ്മിനിസ്ട്രേറ്റർ ആക്സസ് നിയന്ത്രിക്കണമെന്നും അധികൃതർ നിർദ്ദേശിച്ചു.
സൈബർ തട്ടിപ്പുകൾക്കോ ആക്രമണങ്ങൾക്കോ ഇരയായാൽ ഉടൻ 1930 എന്ന നമ്പറിലോ cybercrime.gov.in എന്ന വെബ്സൈറ്റിലോ വിവരം അറിയിക്കണമെന്ന് I4C അറിയിച്ചു.
