മെക്സിക്കോസിറ്റി: ചെക് റിപ്പബ്ലിക്കിനെ ലോകകപ്പില് നിന്ന് പുറത്താക്കി ഗ്രൂപ്പില് മൂന്ന് മത്സരങ്ങളും ജയിച്ച് മെക്സിക്കോ ആദ്യ 32 ല് ഇടം പിടിച്ചു. അവസാന മത്സരത്തില് ചെക്ക് റിപ്പബ്ളിക്കിനെ ഏകപക്ഷീയമായ മൂന്ന് ഗോളുകള്ക്ക് പരാജയപ്പെടുത്തിയാണ് മെക്സിക്കോ ഗ്രൂപ്പ് ഘട്ടത്തില് മുഴുവന് പോയിന്റും പിടിച്ചത്.
മെക്സിക്കന് മധ്യനിരയില് 17 കാരനായ ഗില്ബെര്ട്ടോ മോറ തിളങ്ങിയപ്പോള്, 40 കാരനായ ഗോള്കീപ്പര് ഗില്ലെര്മോ ഒച്ചോവ അവസാന നിമിഷങ്ങളില് സബ്സ്റ്റിറ്റിയൂട്ടായി കളത്തിലിറങ്ങി. രണ്ടാം പകുതിയിലായിരുന്നു മെക്സിക്കോ മൂന്ന് ഗോളുകളും നേടിയത്. മാറ്റിയോ ഷാവേസ്, ജൂലിയന് ക്വിനോണസ്, അല്വാരോ ഫിഡാല്ഗോ എന്നിവര് മെക്സിക്കോയ്ക്കായി ഗോള് നേടി.
മാറ്റങ്ങളോടെ ടീമിലെത്തിയ അഞ്ച് കളിക്കാരില് ഒരാളായ ലെഫ്റ്റ് ബാക്ക് മാറ്റിയോ ഷാവേസ്, രണ്ടാം പകുതി ആരംഭിച്ച് തൊട്ടുപിന്നാലെ തന്റെ ആദ്യ അന്താരാഷ്ട്ര ഗോള് നേടി. മോറ നല്കിയ പാസിലൂടെ ഹോര്ഹെ സാഞ്ചസ് ഗോള് നേടാനുള്ള ശ്രമം നടത്തി. തുടര്ന്ന് ചെക് ബോക്സിനുള്ളില് നടന്ന നാടകീയമായ നീക്കങ്ങള്ക്കൊടുവില് ക്വിനോണസ് പന്ത് വലയിലാക്കി സ്കോര് രണ്ടാക്കി.
17 വയസ്സും 253 ദിവസവും പ്രായമുള്ള മോറ, പുരുഷന്മാരുടെ ലോകകപ്പ് മത്സരത്തില് ആദ്യ ഇലവനില് കളിക്കുന്ന ചരിത്രത്തിലെ ഏറ്റവും പ്രായം കുറഞ്ഞ ആറാമത്തെ കളിക്കാരനായും മെക്സിക്കോയുടെ ഏറ്റവും പ്രായം കുറഞ്ഞ കളിക്കാരനായും മാറി. 72-ാം മിനിറ്റില് മോറയെ പിന്വലിച്ചപ്പോള് ഗാലറിയില് നിന്ന് വലിയ കയ്യടിയാണ് ലഭിച്ചത്. അദ്ദേഹത്തിന് പകരം കളത്തിലിറങ്ങിയ അല്വാരോ ഫിഡാല്ഗോ 15 വാര അകലെ നിന്ന് പന്ത് ഗോള്വലയുടെ മുകള് മൂലയിലേക്ക് എത്തിച്ച് മെക്സിക്കോയുടെ ഗോള്പട്ടിക തികച്ചു.
ഗോളുകള്ക്ക് പുറമെ, ആസ്ടെക്ക സ്റ്റേഡിയത്തില് ഏറ്റവും വലിയ ഹര്ഷാരവം ഉയര്ന്നത് 40 കാരനായ മെക്സിക്കന് ഗോള്കീപ്പര് ഗില്ലെര്മോ ഒച്ചോവ സബ്സ്റ്റിറ്റിയൂട്ടായി കളത്തിലിറങ്ങിയപ്പോഴാണ്. പോര്ച്ചുഗലിന്റെ ക്രിസ്റ്റ്യാനോ റൊണാള്ഡോ, അര്ജന്റീനയുടെ ലയണല് മെസ്സി എന്നിവര്ക്കൊപ്പം ഒച്ചോവയുടെയും ആറാമത്തെ ലോകകപ്പ് ടൂര്ണമെന്റാണിത്. 2006, 2010 ലോകകപ്പുകളില് ടീമില് ഉണ്ടായിരുന്നെങ്കിലും കളിക്കാന് അവസരം ലഭിക്കാത്തതിനാല് നാല് ലോകകപ്പുകളില് മാത്രമാണ് അദ്ദേഹം കളത്തിലിറങ്ങിയത്.
