ഗ്വാദലഹാര: ഫെര്ണാണ്ടോ മുസ്ലേരയുടെ മറ്റൊരു ഗുരുതരമായ പിഴവ് സ്പെയിനിനെതിരായ തോല്വിക്ക് കാരണമായതോടെ ഉറുഗ്വായ് ലോകകപ്പില് നിന്ന് പുറത്തായി. ഹാഫ് ടൈമില് തന്നെ ഇതിഹാസ ഗോള്കീപ്പറെ ഉറുഗ്വായ് മുഖ്യ പരിശീലകന് മാര്സെലോ ബിയല്സ സബ്സ്റ്റിറ്റിയൂട്ട് ചെയ്യുകയും ചെയ്തു. യൂറോപ്യന് ചാമ്പ്യന്മാരായ സ്പെയിന് കിക്ക്-ഓഫിന് മുമ്പ് തന്നെ അവസാന 32-ല് ഇടം ഉറപ്പിച്ചിരുന്നു.
ആദ്യ പകുതിയുടെ അവസാനത്തില് അലക്സ് ബീന നേടിയ ഗോള് അവര്ക്ക് ഗ്രൂപ്പ് എച്ചില് ഒന്നാം സ്ഥാനം നേടിക്കൊടുത്തു. പ്രീ-ക്വാര്ട്ടറില് അവര് ഗ്രൂപ്പ് ജെയിലെ രണ്ടാം സ്ഥാനക്കാരെ നേരിടും. ഇഞ്ചുറി ടൈമില് പൗ കുബാര്സിയെ ഫൗള് ചെയ്തതിന് മിഡ്ഫീല്ഡര് അഗസ്റ്റിന് കനോബിയോ ചുവപ്പ് കാര്ഡ് കണ്ട് പുറത്തായതോടെ ഉറുഗ്വായുടെ തകര്ച്ച പൂര്ത്തിയായി. ഈ വര്ഷം മുസ്ലേരയെ വിരമിക്കലില് നിന്ന് തിരികെ വിളിക്കാന് തീരുമാനിച്ചത് ബിയല്സയായിരുന്നു. എന്നാല് 1966 ന് ശേഷം ഒരു ലോകകപ്പില് ഗോളിന് കാരണമാകുന്ന മൂന്ന് പിഴവുകള് വരുത്തുന്ന ചരിത്രത്തിലെ ആദ്യ ഗോള്കീപ്പറായി മുസ്ലേര മാറി.
ഇതിഹാസ താരത്തെ ടീമിലെടുത്തതിന് വിമര്ശനം നേരിടുന്ന പരിശീലകന് ബിയെല്സ പകുതി സമയത്ത് താരത്തെ സബ്സ്റ്റിറ്റിയൂട്ട് ചെയ്യുകയും ചെയ്തു. തന്റെ 137-ാം അന്താരാഷ്ട്ര മത്സരം കളിക്കുകയായിരുന്ന മുസ്ലേരയെ ഹാഫ് ടൈമില് പിന്വലിച്ച് സെര്ജിയോ റോഷെറ്റിനെ കോച്ച് കളത്തിലിറക്കി. പൗ കുബാര്സിക്കെതിരെയുള്ള ഹൈ ചലഞ്ചിന് ഉറുഗ്വായ് മിഡ്ഫീല്ഡര് അഗസ്റ്റിന് കനോബിയോയ്ക്ക് മത്സരത്തിന്റെ അവസാന നിമിഷങ്ങളില് ചുവപ്പ് കാര്ഡ് ലഭിച്ചു. അടുത്ത ഘട്ടത്തിലേക്ക് യോഗ്യത നേടാന് ബിയല്സയുടെ ടീമിന് ഒരു അനുകൂല ഫലം ആവശ്യമായിരുന്നു. എന്നാല് ഈ തോല്വിയോടെ മൂന്ന് മത്സരങ്ങളില് നിന്ന് വെറും രണ്ട് പോയിന്റുമായി അവര് തുടര്ച്ചയായ രണ്ടാം തവണയും ലോകകപ്പ് ഗ്രൂപ്പ് ഘട്ടത്തില് തന്നെ പുറത്തായി. മത്സരത്തിന്റെ 42-ാം മിനിറ്റിലായിരുന്നു സ്പെയിനിന്റെ ഗോള് പിറന്നത്.
ബീന ബോക്സിനുള്ളില് വെച്ച് തിരിഞ്ഞുതിരിഞ്ഞ് തൊടുത്ത ലോ ഷോട്ട്, 40 കാരനായ ഗോള്കീപ്പര് മുസ്ലേരയുടെ ഇരു കൈകളിലും തട്ടിയാണെങ്കിലും വലയില് കയറി. തുടര്ച്ചയായ മൂന്ന് മത്സരങ്ങളില് ഗോളിന് കാരണമായ മൂന്നാമത്തെ പിഴവ് വരുത്തിയതോടെ താരത്തെ പിന്വലിക്കുകയും ചെയ്തു. എന്നാല് ഈ മാറ്റം കളിയില് വലിയ വ്യത്യാസമൊന്നും വരുത്തിയില്ല. രണ്ടാം പകുതിയില് സ്പെയിന് കളി നിയന്ത്രിച്ചെങ്കിലും അവര്ക്ക് രണ്ടാമതൊരു ഗോള് കണ്ടെത്താനായില്ല.
