ന്യൂഡൽഹി: ഡൽഹിയിലും ഉത്തരാഖണ്ഡിലും ഖാലിസ്താനി ഭീകരാക്രമണ സാധ്യതയുണ്ടെന്ന രഹസ്യാന്വേഷണ ഏജൻസികളുടെ മുന്നറിയിപ്പിനെ തുടർന്ന് ഇരു സംസ്ഥാനങ്ങളിലും അതീവ ജാഗ്രത പ്രഖ്യാപിച്ചു. വരും ദിവസങ്ങളിൽ ആക്രമണം ഉണ്ടായേക്കാമെന്ന് മുന്നറിയിപ്പ് നൽകുന്ന ഒരു ഭീഷണി ഇ-മെയിൽ ലഭിച്ചതിനെ തുടർന്നാണ് ഈ സുരക്ഷാ മുൻകരുതലുകൾ സ്വീകരിച്ചിരിക്കുന്നത്.
പ്രധാന ആരാധനാലയങ്ങൾ, പ്രത്യേകിച്ച് ചില പ്രധാന ക്ഷേത്രങ്ങൾ, സർക്കാർ ഓഫീസുകൾ, റെയിൽവേ സ്റ്റേഷനുകൾ, പോലീസ് സ്റ്റേഷനുകൾ എന്നിവയാണ് ഭീഷണി സന്ദേശത്തിൽ പരാമർശിച്ചിരിക്കുന്ന പ്രധാന ലക്ഷ്യങ്ങൾ. കൂടാതെ ചില പ്രമുഖ രാഷ്ട്രീയ നേതാക്കളെക്കുറിച്ചുള്ള പരാമർശങ്ങളും ഈ സന്ദേശത്തിലുണ്ടെന്നാണ് രഹസ്യാന്വേഷണ വിഭാഗം നൽകുന്ന സൂചന.
ഇതേത്തുടർന്ന് ഡൽഹി പോലീസും ഉത്തരാഖണ്ഡ് പോലീസും കേന്ദ്ര ഏജൻസികളും സംയുക്തമായി തന്ത്രപ്രധാന മേഖലകളിലും ആളുകൾ കൂടുതലായി എത്തുന്ന സ്ഥലങ്ങളിലും ഗതാഗത ഹബ്ബുകളിലും നിരീക്ഷണവും പരിശോധനയും കർശനമാക്കിയിട്ടുണ്ട്. പ്രാദേശിക പോലീസ് യൂണിറ്റുകളോട് അതീവ ജാഗ്രത പാലിക്കാനും പട്രോളിംഗ് ശക്തമാക്കാനും നിർദ്ദേശം നൽകിയിട്ടുണ്ട്.
അടുത്തിടെ ഉത്തരാഖണ്ഡിലെ രുദ്രപ്രയാഗ് ജില്ലയിലുള്ള നഗ്രാസു ഗുരുദ്വാരയിൽ നിഹാംഗ് സിഖുകാരും പ്രാദേശിക ഭരണകൂടവും തമ്മിൽ ചില തർക്കങ്ങളും സംഘർഷങ്ങളും നിലനിന്നിരുന്നു. ജൂൺ പതിനാറിന് കർണപ്രയാഗ് മാർക്കറ്റിൽ ഉണ്ടായ ഒരു തർക്കത്തെ തുടർന്ന് അറസ്റ്റിലായ നാല് അംഗങ്ങളെ വിട്ടയക്കണമെന്ന് ആവശ്യപ്പെട്ടായിരുന്നു ഈ പ്രതിഷേധം. ഈ തർക്കങ്ങൾ പിന്നീട് ഒത്തുതീർപ്പാവുകയും അറസ്റ്റിലായവർക്ക് കോടതി ജാമ്യം അനുവദിക്കുകയും ചെയ്തിരുന്നു. ഈ സംഭവങ്ങളുടെ പശ്ചാത്തലത്തിലാണ് പുതിയ സുരക്ഷാ ഭീഷണി ഉയർന്നിട്ടുള്ളതെങ്കിലും, ലഭിച്ച ഇമെയിലിന് ഈ സംഭവങ്ങളുമായി നേരിട്ട് ബന്ധമുണ്ടോ എന്ന് ഔദ്യോഗികമായി സ്ഥിരീകരിച്ചിട്ടില്ല.
നിലവിൽ ഡൽഹി പോലീസിന്റെ സൈബർ വിദഗ്ധർ ഇ-മെയിലിന്റെ ഡിജിറ്റൽ വിവരങ്ങൾ പരിശോധിച്ച് അതിന്റെ ഉറവിടം കണ്ടെത്താനും ഇത് വ്യാജമാണോ അതോ യഥാർത്ഥ ഭീഷണിയാണോ എന്ന് സ്ഥിരീകരിക്കാനുമുള്ള വിശദമായ അന്വേഷണം നടത്തിവരികയാണ്. ആക്രമണത്തിന്റെ സമയത്തെക്കുറിച്ചോ കൃത്യമായ സ്ഥലത്തെക്കുറിച്ചോ നിലവിൽ വ്യക്തമായ വിവരങ്ങൾ ലഭ്യമല്ലെങ്കിലും ഭീഷണിയുടെ ഗൗരവം കണക്കിലെടുത്ത് വിട്ടുവീഴ്ചയില്ലാത്ത സുരക്ഷാ ക്രമീകരണങ്ങളാണ് ഡൽഹിയിലും ഉത്തരാഖണ്ഡിലും ഏർപ്പെടുത്തിയിരിക്കുന്നത്
