കൊൽക്കത്ത: പാർട്ടിക്കുള്ളിൽ വലിയ വിമതനീക്കം ഉണ്ടായിട്ടും പിന്മാറില്ലെന്ന നിലപാടിൽ തൃണമൂൽ കോൺഗ്രസ് അധ്യക്ഷ മമത ബാനർജി. ഭൂരിഭാഗം എംഎൽഎമാരും എംപിമാരും പുതിയ ഗ്രൂപ്പുമായി രംഗത്തെത്തിയ സാഹചര്യത്തിൽ, തനിക്കെതിരെ നിന്നവരെ 'ദ്രോഹികൾ' എന്ന് വിശേഷിപ്പിച്ച മമത, രാഷ്ട്രീയമായി തടയാൻ ശ്രമിക്കുന്നവർക്ക് തന്നെ കൊല്ലേണ്ടിവരുമെന്ന് വെല്ലുവിളിച്ചു.
പാർട്ടിയുടെ ഔദ്യോഗിക ചിഹ്നം വിശ്വസ്തർക്കൊപ്പമായിരിക്കുമെന്നും അത് നിലനിർത്താൻ ആവശ്യമായ നിയമപോരാട്ടം ഏതറ്റം വരെയും നടത്താൻ തയ്യാറാണെന്നും അവർ പറഞ്ഞു. "പാർട്ടി ചിഹ്നം മറ്റൊരിടത്തേക്കും പോകില്ല. എന്നെ തടയണമെങ്കിൽ നിങ്ങളെന്നെ കൊല്ലേണ്ടിവരും," എന്നാണ് മമതയുടെ പ്രതികരണം.
അതേസമയം, മമതയുടെ അടുത്ത അനുയായികളിൽ ഒരാളും തൃണമൂൽ കോൺഗ്രസിന്റെ ബംഗാൾ ഘടകം അധ്യക്ഷയുമായിരുന്ന ചന്ദ്രിമ ഭട്ടാചാര്യ ശനിയാഴ്ച പാർട്ടി പദവി രാജിവെച്ചു. തുടർന്ന് നിയമസഭയിലെ പ്രതിപക്ഷ നേതാവ് ഋതബ്രത ബാനർജിയുടെ നേതൃത്വത്തിലുള്ള വിമത വിഭാഗത്തിൽ അവർ ചേർന്നു. ഇതിനുമുമ്പ് കൊൽക്കത്തയിലെ പാർട്ടി ആസ്ഥാനത്തിന്റെ നിയന്ത്രണവും വിമതർ ഏറ്റെടുത്തിരുന്നു.
