അങ്കാറ: ഇറാന്റെ ഔദ്യോഗിക നാമമായ 'ഇസ്ലാമിക് റിപ്പബ്ലിക് ഓഫ് ഇറാന്' എന്നതിന് പകരം 'ഇസ്ലാമിക് റിപ്പബ്ലിക് ഓഫ് ജപ്പാന്' എന്ന് മാറിപ്പറഞ്ഞ് യു.എസ് പ്രസിഡന്റ് ഡോണള്ഡ് ട്രംപ്. തുര്ക്കിയിലെ അങ്കാറയില് നടക്കുന്ന നാറ്റോ ഉച്ചകോടിക്കിടെ മാധ്യമങ്ങളോട് സംസാരിക്കുമ്പോഴായിരുന്നു ട്രംപിന്റെ നാക്കുപിഴ.
ഇതിന്റെ വീഡിയോ ദൃശ്യങ്ങള് സമൂഹമാധ്യമങ്ങളില് വൈറലാണ്.
അമേരിക്കന് വിമാനവാഹിനിക്കപ്പലായ 'യു.എസ്.എസ് ഏബ്രഹാം ലിങ്കന്' നേരെ ഇറാന് നടത്തിയ മിസൈല് ആക്രമണത്തെക്കുറിച്ച് സംസാരിക്കവേയാണ് ട്രംപിന് അബദ്ധം പിണഞ്ഞത്.
"ഇസ്ലാമിക് റിപ്പബ്ലിക് ഓഫ് ജപ്പാന് നമുക്ക് നേരെ 111 മിസൈലുകളാണ് തൊടുത്തത്. ഒരു മണിക്കൂറിലധികം അവര് നമ്മുടെ വിമാനവാഹിനിക്കപ്പലിന് നേരെ വെടിയുതിര്ത്തു. എന്നാല് ആ മിസൈലുകളെല്ലാം നമ്മള് തകര്ത്തു കളഞ്ഞു" -ട്രംപ് പറഞ്ഞു. മുസ്ലിം ജനസംഖ്യ വളരെ കുറവുള്ള, അമേരിക്കയുടെ അടുത്ത സഖ്യകക്ഷിയായ ജപ്പാനെ 'ഇസ്ലാമിക് റിപ്പബ്ലിക്' എന്ന് ട്രംപ് വിശേഷിപ്പിച്ചത് സമൂഹമാധ്യമങ്ങളില് വലിയ പരിഹാസങ്ങള്ക്കും ചര്ച്ചകള്ക്കും വഴിവച്ചിട്ടുണ്ട്.
ഇറാനുമായി നിലവിലുണ്ടായിരുന്ന താല്ക്കാലിക സമാധാന കരാര് അവസാനിച്ചതായി പ്രഖ്യാപിച്ചതിന് തൊട്ടുപിന്നാലെയാണു ട്രംപ് നാറ്റോ ഉച്ചകോടിയില് സംസാരിച്ചത്. ഇറാനുമായി ഇനി യാതൊരുവിധ കരാറിനും താല്പര്യമില്ലെന്നും അദ്ദേഹം വ്യക്തമാക്കി. ആവശ്യമെങ്കില് ഇറാനുമേല് വീണ്ടും ശക്തമായ ആക്രമണം നടത്താന് അമേരിക്ക മടിക്കില്ലെന്ന് ട്രംപ് മുന്നറിയിപ്പ് നല്കി. പുതിയ സംഭവവികാസങ്ങളുടെ പശ്ചാത്തലത്തില് ഇരുരാജ്യങ്ങളും തമ്മിലുള്ള ബന്ധം കൂടുതല് വഷളായിരിക്കുകയാണ്.
