ന്യൂഡൽഹി: തമിഴ്നാട്ടിൽ പശുക്കളെയും പശുക്കിടാവിനെയും കശാപ്പ് ചെയ്യുന്നത് നിരോധിച്ച മദ്രാസ് ഹൈക്കോടതിയുടെ ഉത്തരവിന് സുപ്രീം കോടതി സ്റ്റേ അനുവദിച്ചു. തമിഴ്നാട് സർക്കാർ സമർപ്പിച്ച പ്രത്യേക ഹർജിയിലാണ് സുപ്രീം കോടതിയുടെ ഇടക്കാല ഉത്തരവ്.
ബക്രീദിന്റെ തലേദിവസമായ മേയ് 27ന് മദ്രാസ് ഹൈക്കോടതി പുറപ്പെടുവിച്ച ഉത്തരവിൽ, ബക്രീദിനോ മറ്റേതെങ്കിലും ദിവസമോ സംസ്ഥാനത്ത് എവിടെയും പശുവിനെയോ പശുക്കിടാവിനെയോ അറുക്കുന്നില്ലെന്ന് ഉറപ്പാക്കാൻ ചീഫ് സെക്രട്ടറിയും ഡിജിപിയും നടപടി സ്വീകരിക്കണമെന്ന് നിർദേശിച്ചിരുന്നു. ഇതിനെതിരെയാണ് തമിഴ്നാട് സർക്കാർ സുപ്രീം കോടതിയെ സമീപിച്ചത്.
ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ചാണ് ഹർജി പരിഗണിച്ചത്. സംസ്ഥാനത്തുടനീളം സമ്പൂർണ നിരോധനം ഏർപ്പെടുത്തുന്ന ഹൈക്കോടതി നിർദേശത്തിന്റെ അവസാന ഭാഗത്തിനാണ് സ്റ്റേ അനുവദിച്ചത്.
നിശ്ചിത അറവുശാലകളിൽ മാത്രം മൃഗങ്ങളെ അറുക്കാമെന്ന ഹൈക്കോടതിയുടെ നിരീക്ഷണവും, ബക്രീദിലോ മറ്റേതെങ്കിലും ദിവസമോ പശുവിനെയും പശുക്കിടാവിനെയും എവിടെയും അറുക്കരുതെന്ന നിർദേശവും പരസ്പരവിരുദ്ധമാണെന്ന് തമിഴ്നാട് സർക്കാർ സുപ്രീം കോടതിയിൽ വാദിച്ചു.
കൂടാതെ, ഹൈക്കോടതിയുടെ ഉത്തരവ് തമിഴ്നാട് മൃഗസംരക്ഷണ നിയമം, 1958-ലെ വ്യവസ്ഥകൾക്ക് വിരുദ്ധമാണെന്നും സർക്കാർ ചൂണ്ടിക്കാട്ടി. നിയമപ്രകാരം, പത്ത് വയസ്സിന് മുകളിൽ പ്രായമുള്ളതും ജോലി ചെയ്യാനോ പ്രജനനത്തിനോ അനുയോജ്യമല്ലാത്തതുമായ കന്നുകാലികളെ ബന്ധപ്പെട്ട അധികാരിയുടെ സർട്ടിഫിക്കറ്റിന്റെ അടിസ്ഥാനത്തിൽ കശാപ്പ് ചെയ്യാൻ അനുമതിയുണ്ടെന്ന് സർക്കാർ വ്യക്തമാക്കി.
1976ലെ ഒരു വിധിയെ അടിസ്ഥാനമാക്കിയാണ് മദ്രാസ് ഹൈക്കോടതി ഉത്തരവിറക്കിയത്. പാൽ ഉൽപ്പാദനം സംരക്ഷിക്കുന്നതിനും ഗ്രാമീണ സമ്പദ്വ്യവസ്ഥയ്ക്ക് പിന്തുണ നൽകുന്നതിനുമായി പശുക്കളെ കൊല്ലുന്നത് നിയന്ത്രിക്കണമെന്നായിരുന്നു ആ വിധിയിലെ പ്രധാന നിരീക്ഷണം. സുപ്രീം കോടതിയുടെ സ്റ്റേയോടെ വിഷയത്തിൽ അന്തിമതീർപ്പുണ്ടാകുന്നതുവരെ ഹൈക്കോടതിയുടെ സമ്പൂർണ നിരോധന നിർദേശം പ്രാബല്യത്തിൽ ഉണ്ടാകില്ല.
