തിരുവനന്തപുരം: യുഡിഎഫ് സര്ക്കാരിന്റെ ധവളപത്രത്തിനെതിരെ എല്ഡിഎഫ് ഇന്ന് ബദല് ധവളപത്രം പുറത്തിറക്കും. സര്ക്കാര് പുറത്തിറക്കിയ രാഷ്ട്രീയപ്രഖ്യാപന രേഖയിലെ പൊള്ളത്തരങ്ങള് തുറന്നുകാട്ടാനാണ് എകെജി പഠന ഗവേഷണ കേന്ദ്രം ഈ ബദല് രേഖ തയ്യാറാക്കിയിരിക്കുന്നത്. വൈകിട്ട് നാലിന് എകെജി മിനിഹാളില് നടക്കുന്ന ചടങ്ങില് പ്രതിപക്ഷ നേതാവ് പിണറായി വിജയന് പ്രകാശനകര്മം നിര്വഹിക്കും.
ചടങ്ങില് സിപിഐഎം സംസ്ഥാന സെക്രട്ടറി എം.വി. ഗോവിന്ദന്, കെ.എന്. ബാലഗോപാല് എംഎല്എ തുടങ്ങിയ പ്രമുഖ നേതാക്കള് പങ്കെടുക്കും. സംസ്ഥാനം കടക്കെണിയിലാണെന്ന യുഡിഎഫ് പ്രചാരണങ്ങളെ പ്രതിരോധിക്കുകയാണ് ധവളപത്രത്തിലൂടെ ലക്ഷ്യമിടുന്നത്. കഴിഞ്ഞ 10 വര്ഷത്തിനിടെ എല്ഡിഎഫ് സര്ക്കാരിന് കീഴില് സംസ്ഥാനം കൈവരിച്ച വികസന പ്രവര്ത്തനങ്ങളും ജനങ്ങളുടെ മുന്പില് അവതരിപ്പിക്കും.
അതേസമയം, സംഘടനാ കാര്യങ്ങള് ചര്ച്ച ചെയ്യുന്നതിനായി സിപിഐഎം സംസ്ഥാന സെക്രട്ടേറിയേറ്റ് ഇന്ന് ചേരും. ഡല്ഹിയില് നടന്ന കേന്ദ്ര കമ്മിറ്റി യോഗത്തിന്റെ തുടര്ച്ചയായി ചെയ്യേണ്ട സംഘടനാ കാര്യങ്ങളാണ് യോഗത്തിന്റെ പ്രധാന അജണ്ട. വിഴിഞ്ഞം തുറമുഖത്തിന്റെ ഓഹരി കൈമാറ്റത്തിന് എതിരായ പ്രക്ഷോഭ പരിപാടികള്ക്കും യോഗം രൂപം നല്കും. എല്ഡിഎഫ് എന്ന നിലയിലുള്ള സമരപരിപാടികളാണ് പാര്ട്ടി ആസൂത്രണം ചെയ്യുന്നത്.
ഇതിനിടെ, വിഴിഞ്ഞം തുറമുഖ പദ്ധതിയുടെ ഓഹരി കൈമാറ്റത്തിനെതിരെ നിയമനടപടി സ്വീകരിക്കുന്നതില് തീരുമാനമെടുക്കാന് സിപിഐ സംസ്ഥാന എക്സിക്യൂട്ടീവും ഇന്ന് ചേരുന്നുണ്ട്. സര്ക്കാരിന്റെ മുന്കൂര് അനുമതിയില്ലാതെ ഓഹരി കൈമാറിയതിനെതിരെ പൊതുതാല്പര്യഹര്ജി നല്കണമെന്നാണ് ഇന്നലെ നടന്ന സംസ്ഥാന സെക്രട്ടേറിയേറ്റില് ഉണ്ടായ ധാരണ. കൂടാതെ, പ്രതിപക്ഷ ഉപനേതാവ് സ്ഥാനം വേണമെന്ന ആവശ്യത്തില് യാതൊരു വിട്ടുവീഴ്ചയും വേണ്ടെന്നാണ് സിപിഐയുടെ നിലപാട്.
