കരുനാഗപ്പള്ളി: മന്തിയുടെ അളവ് കുറഞ്ഞുപോയെന്ന കാരണത്തെച്ചൊല്ലി കരുനാഗപ്പള്ളിയില് യുവാവിന്റെ പരാക്രമം. മദ്യക്കുപ്പിയുമായി ഹോട്ടലില് അതിക്രമിച്ചു കയറിയ ഇയാള് ഹോട്ടല് അടിച്ചു തകര്ത്തു. ഇന്നലെ രാത്രിയാണ് നാടിനെ ഞെട്ടിച്ച സംഭവം നടന്നത്. ആക്രമണത്തില് ഹോട്ടല് ജീവനക്കാര്ക്കും ഭക്ഷണം കഴിക്കാനെത്തിയവര്ക്കും പരിക്കേറ്റിട്ടുണ്ട്.
കൈയില് മദ്യക്കുപ്പിയുമായി ഹോട്ടലിലേക്ക് ഇരച്ചുകയറിയ യുവാവ് യാതൊരു പ്രകോപനവുമില്ലാതെ അക്രമം അഴിച്ചുവിടുകയായിരുന്നു. ഹോട്ടലിലെ സാധനങ്ങളും പാത്രങ്ങളും ഇയാള് അടിച്ചുതകര്ത്തു. അക്രമാസക്തനായ യുവാവിനെ കണ്ട് ജീവനക്കാരും ഉപഭോക്താക്കളും ജീവനുംകൊണ്ട് പുറത്തേക്ക് ഭയന്നോടി. സംഭവത്തില് ഹോട്ടലിന് കാര്യമായ നാശനഷ്ടം സംഭവിച്ചിട്ടുണ്ട്.
ബഹളം കേട്ട് ഓടിയെത്തിയ നാട്ടുകാര് ചേര്ന്ന് സാഹസികമായാണ് ഇയാളെ കീഴ്പ്പെടുത്തിയത്. തുടര്ന്ന് കരുനാഗപ്പള്ളി പോലീസില് വിവരമറിയിക്കുകയും ചെയ്തു. സ്ഥലത്തെത്തിയ പോലീസ് സംഘം യുവാവിനെ കസ്റ്റഡിയിലെടുത്തു സ്റ്റേഷനിലെത്തിച്ചു. കഴിഞ്ഞ തവണ ഇവിടെനിന്ന് കഴിച്ച മന്തിയുടെ അളവ് കുറഞ്ഞുപോയതാണ് തന്നെ പ്രകോപിപ്പിച്ചതെന്നാണ് യുവാവ് പോലീസിന് നല്കിയ മൊഴി. സംഭവത്തില് പോലീസ് കൂടുതല് അന്വേഷണം നടത്തിവരികയാണ്.
