തിരുവനന്തപുരം: സംസ്ഥാനത്ത് വൈദ്യുതി നിയന്ത്രണം ഒഴിവാക്കാന്‍ കഴിയാത്ത സാഹചര്യമുണ്ടെന്ന് വൈദ്യുതിമന്ത്രി സണ്ണിജോസഫ്. സംസ്ഥാനത്ത് വൈദ്യുതി പ്രതിസന്ധിയുണ്ടെന്ന് തുറന്നുസമ്മതിച്ച അമദ്ദഹം വൈദ്യുതി ഉല്‍പ്പാദനം കുറഞ്ഞതും ഉപഭോഗം കൂടിയതും സംസ്ഥാനത്ത് വലിയ പ്രതിസന്ധിയായി മാറിയിട്ടുണ്ടെന്നും പറഞ്ഞു.
ഉല്‍പ്പാദനം കുറയുകയൂം ഉപഭോഗം കൂടുകയും ചെയ്ത സാഹചര്യത്തിലാണ് നിയന്ത്രണം വേണ്ടി വന്നിരിക്കുന്നത്. വൈദ്യുതിപ്രതിസന്ധി പരിഹരിക്കാന്‍ സോളാര്‍ അടക്കമുള്ള സാധ്യത തേടുന്നുണ്ട്. രാത്രിയില്‍ വൈദ്യുതി ഉപഭോഗം കുറയ്ക്കണമെന്നും അനാവശ്യമായ അലങ്കാര ലൈറ്റുകള്‍ ഒഴിവാക്കണമെന്നും അദ്ദേഹം ജനങ്ങളോട് അഭ്യര്‍ത്ഥിച്ചു. വരും ദിവസങ്ങളിലും മഴയ്ക്ക് സാധ്യതയില്ലാത്ത സാഹചര്യത്തില്‍ വൈദ്യുതി ഉല്‍പ്പാദനം ഗണ്യമായി കുറഞ്ഞു. കാലാവസ്ഥാവ്യതിയാനം വലിയ തിരിച്ചടിയായിരിക്കുകയാണ്. ഡാമുകളില്‍ ജലനിരപ്പ് പകുതിയായി കുറഞ്ഞു. മാര്‍ച്ച്, ഏപ്രില്‍ മാസങ്ങളില്‍ മഴ ലഭിച്ചിട്ടില്ല. സോളാര്‍ വൈദ്യുതി ശേഖരണം വര്‍ദ്ധിപ്പിക്കാനുള്ള നീക്കത്തിലാണ് സര്‍ക്കാരെന്നും മന്ത്രി സണ്ണിജോസഫ് വ്യക്തമാക്കി.
പ്രതിസന്ധി പരിഹരിക്കാന്‍ സര്‍ക്കാരിന് മുന്നിലുള്ളത് ഹൃസ്വകാല, സ്വാപ് കരാറുകളാണ് സെപ്തംബര്‍ വരെ സമയമുണ്ട്. എന്നാല്‍ സ്വാപ് അടിസ്ഥാനത്തില്‍ വാങ്ങിയ വൈദ്യുതി തിരികെ കൊടുക്കേണ്ടതുണ്ട്. ഏറ്റവും ഉയര്‍ന്ന നിരക്കിലാണ് വൈദ്യുതി വാങ്ങിയിട്ടുപോലും അതും പര്യാപ്തമാകുന്നില്ല. ഏതു വഴിയിലൂടെ വൈദ്യുതി എത്തിക്കാന്‍ കഴിയുമെന്ന ആലോചനയാണ് സര്‍ക്കാര്‍ നടത്തുന്നത്.
തൃശൂരില്‍ എരുമപ്പെട്ടിയില്‍ ഇന്നലെ ലോകകപ്പ് ഫുട്‌ബോള്‍ നടക്കുന്ന സമയത്ത് കറന്റ് പോയതില്‍ ഡിവൈഎഫ്‌ഐ യുടെ നേതൃത്വത്തില്‍ കെ.എസ്.ഇ.ബി. ഓഫീസില്‍ പ്രതിഷേധം സംഘടിപ്പിച്ചു. എരുമപ്പെട്ടി കെ.എസ്.ഇ.ബി ഓഫസീലെത്തിയായിരുന്നു പ്രതിഷേധിച്ചത്.
Comments