‘വാസവദത്തയും ആദിക്കുട്ടനും ചമയങ്ങളില്ലാതെ അങ്ങനെ തട്ടീം മുട്ടീം .....’; നടൻ സാഗർ സൂര്യക്കൊപ്പമുള്ള ചിത്രങ്ങൾ പങ്കുവെച്ച് മനീഷ

നടൻ സാഗർ സൂര്യക്കൊപ്പമുള്ള ചിത്രങ്ങൾ പങ്കുവെച്ച് നടിയും ഗായികയുമായ കെ.എസ് മനീഷ. "വാസവദത്തയും ആദിക്കുട്ടനും ചമയങ്ങളില്ലാതെ അങ്ങനെ തട്ടീം മുട്ടീം" എന്നാണ് ചിത്രങ്ങൾക്കൊപ്പം താരം കുറിച്ചിരിക്കുന്നത്. മനീഷയുടെ പോസ്റ്റിന് താഴെ സ്നേഹത്തോടെ സാഗർ സൂര്യയും കമന്റ് ചെയ്തിട്ടുണ്ട്.

'തട്ടീം മുട്ടീം' എന്ന ജനപ്രിയ ഹാസ്യ പരമ്പരയിൽ അമ്മയും മകനുമായി അഭിനയിച്ചതിലൂടെ വർഷങ്ങളായുള്ള ബന്ധമാണ് മനീഷയ്ക്കും സാഗറിനും. വാസവദത്ത, ആദി എന്നീ കഥാപാത്രങ്ങളെയാണ് ഇരുവരും സീരിയലിൽ അവതരിപ്പിച്ചത്. തന്നെ പരിചയപ്പെട്ടത് മുതൽ 'അമ്മ' എന്നാണ് സാഗർ തന്നെ വിളിക്കുന്നതെന്ന് മനീഷ മുൻപ് പലപ്പോഴും പറഞ്ഞിട്ടുണ്ട്.

ബിഗ് ബോസ് മലയാളം സീസൺ അഞ്ചിലും ഇരുവരും ഒരുമിച്ച് മത്സരാർത്ഥികളായി എത്തിയിരുന്നു. സ്ക്രീനിലെ അമ്മ-മകൻ ബന്ധത്തിനപ്പുറം യഥാർത്ഥ ജീവിതത്തിലും അത്രമേൽ ആഴത്തിലുള്ളതാണ് സാഗറും മനീഷയും തമ്മിലുള്ള ആത്മബന്ധം.

സീരിയലിനു പുറമേ ഏതാനും സിനിമകളിലും മനീഷ വേഷമിട്ടിട്ടുണ്ട്. മോഹൻലാൽ ചിത്രമായ 'തന്മാത്ര'യിലൂടെയാണ് താരം വെള്ളിത്തിരയിൽ എത്തുന്നത്. 'രസതന്ത്രം', 'എന്നും എപ്പോഴും', 'ജനമൈത്രി' തുടങ്ങി പതിനേഴോളം ചിത്രങ്ങളിൽ അഭിനയിച്ചിട്ടുണ്ട്. പന്ത്രണ്ടോളം സിനിമകളിൽ ഡബ്ബ് ചെയ്യുകയും ചെയ്തിട്ടുണ്ട്. കഴിഞ്ഞ മുപ്പത് വർഷമായി ഗാനരംഗത്തും സജീവമാണ് മനീഷ.

മിനിസ്‌ക്രീനിലൂടെയും ബിഗ് സ്‌ക്രീനിലൂടെയും മലയാളി പ്രേക്ഷകരുടെ പ്രിയങ്കരനായി മാറിയ താരമാണ് സാഗർ സൂര്യ. ജോജു ജോർജ് സംവിധാനം ചെയ്ത 'പണി' എന്ന ചിത്രത്തിലെ ഡോൺ സെബാസ്റ്റിയൻ എന്ന വില്ലൻ കഥാപാത്രം സാഗറിന്റെ കരിയറിൽ വലിയ പ്രശംസ നേടിക്കൊടുത്തിരുന്നു. 'പ്രകമ്പനം' ആണ് തിയേറ്ററുകളിൽ എത്തിയ താരത്തിന്റെ ഏറ്റവും പുതിയ ചിത്രം.