ഹജ്ജ് അപേക്ഷാ തീയതി ഓഗസ്റ്റ് 15 വരെ നീട്ടണം; കേന്ദ്രത്തോട് മന്ത്രി എൻ. ഷംസുദ്ദീന്റെ അഭ്യർത്ഥന

ഹജ്ജ് അപേക്ഷ സമർപ്പിക്കാനുള്ള അവസാന തീയതി ഓഗസ്റ്റ് 15 വരെ ദീർഘിപ്പിക്കണമെന്ന് മന്ത്രി എൻ. ഷംസുദ്ദീൻ കേന്ദ്ര ന്യൂനപക്ഷകാര്യ മന്ത്രാലയത്തോടും ഹജ്ജ് കമ്മിറ്റി ഓഫ് ഇന്ത്യയോടും ആവശ്യപ്പെട്ടു. പാസ്പോർട്ട് പുതുക്കുന്നതിനുള്ള നടപടികളിൽ ഉണ്ടായ കാലതാമസം മൂലം നിരവധി അപേക്ഷകർക്ക് സമയബന്ധിതമായി രേഖകൾ ലഭിക്കാത്ത സാഹചര്യമാണ് ഈ ആവശ്യമുന്നയിക്കാൻ കാരണമായത്.
പാസ്പോർട്ട് കാലാവധി കഴിഞ്ഞവർക്ക് പുതുക്കി നൽകണമെന്ന സംസ്ഥാന സർക്കാരിന്റെ അഭ്യർത്ഥനയെ തുടർന്ന് പ്രത്യേക നിർദേശം പാസ്പോർട്ട് ഓഫീസുകൾക്ക് നൽകിയെങ്കിലും അത് വൈകിയാണ് ലഭിച്ചത്. ഇതോടെ പലർക്കും പാസ്പോർട്ട് ലഭിക്കാൻ ഇനിയും സമയം വേണ്ടിവരുമെന്ന് മന്ത്രി ചൂണ്ടിക്കാട്ടി.

കോഴിക്കോട് വിമാനത്താവളത്തിൽ നിന്ന് ഹജ്ജ് യാത്ര നടത്താൻ ആഗ്രഹിക്കുന്നവരുടെ ബുദ്ധിമുട്ടും മന്ത്രി കേന്ദ്ര വ്യോമയാന മന്ത്രാലയത്തിന്റെ ശ്രദ്ധയിൽപ്പെടുത്തി. വലിയ വിമാനങ്ങൾക്ക് അനുമതിയില്ലാത്തതിനാൽ തീർത്ഥാടകർ മറ്റ് വിമാനത്താവളങ്ങളെ ആശ്രയിക്കേണ്ടിവരുന്നതും യാത്രച്ചെലവ് വർധിക്കുന്നതും പരിഗണിച്ച് ഹജ്ജ് സർവീസുകൾക്കായി വലിയ വിമാനങ്ങൾക്ക് കോഴിക്കോട് വിമാനത്താവളത്തിൽ അനുമതി നൽകണമെന്നും അദ്ദേഹം ആവശ്യപ്പെട്ടു.

ഹജ്ജ് തീർത്ഥാടകർക്കുള്ള ഭക്ഷണവുമായി ബന്ധപ്പെട്ട പരാതികൾ ഒഴിവാക്കാൻ കേരള ഭക്ഷണം വിതരണം ചെയ്യാൻ കേരള ഹജ്ജ് കമ്മിറ്റിക്ക് അനുമതി നൽകണമെന്നും മന്ത്രി കത്തിൽ നിർദേശിച്ചു. നിലവാരമില്ലാത്ത സ്മാർട്ട് വാച്ചുകൾ വിതരണം ചെയ്തതായുള്ള പരാതിയും ഉന്നയിച്ച അദ്ദേഹം, ഇതിനായി ഈടാക്കിയ തുക തിരിച്ചുനൽകാൻ നടപടി സ്വീകരിക്കണമെന്നും ആവശ്യപ്പെട്ടു.