ഗവൺമെന്റ് പ്ലീഡർ നിയമനം; എസ്എഫ്ഐ മുൻ പ്രവർത്തകയെ ശുപാർശ ചെയ്തത് ഡീൻ കുര്യാക്കോസ് എം‌പി

തൊടുപുഴ: എസ്എഫ്ഐയുടെ മുൻ പ്രവർത്തകയായ അഡ്വക്കേറ്റ് ജിയോണ ജയിംസിനെ ഗവൺമെന്റ് പ്ലീഡറായി നിയമിച്ചതുമായി ബന്ധപ്പെട്ട വിവാദത്തിനു വഴിത്തിരിവ്. ഇടുക്കി എം‌പി ഡീൻ കുര്യാക്കോസാണ് ജിയോണയ്ക്ക് വേണ്ടി ശുപാർശ നടത്തിയത്. ഒരു യുവ എം‌പിയാണ് ജിയോണയ്ക്ക് വേണ്ടി ശുപാർശ ചെയ്തത് എന്നും അതിനായി മുഖ്യമന്ത്രിയെ ഒറ്റതിരിഞ്ഞ് ആക്രമിക്കേണ്ടതില്ല എന്നും പാർട്ടി നേതാവ് കെ. ബാബു പറഞ്ഞതിനുള്ള പ്രതികരണമായി ഡീൻ കുര്യാക്കോസ് എം‌പി തന്നെയാണ് ഇക്കാര്യം സ്ഥിരീകരിച്ചത്. കൂടുതൽ കാര്യങ്ങൾ വരും ദിവസങ്ങളിൽ വിശദീകരിക്കാമെന്നും അദ്ദേഹം പറഞ്ഞു.

എസ്എഫ്ഐ പ്രവർത്തകയായിരുന്ന ജിയോണ ജെയിംസ്, ആർഎസ്എസ് ബന്ധം ആരോപിക്കപ്പെട്ട ഡി എസ് ശരത് എന്നിവരെ സീനിയർ ഗവൺമെന്റ് പ്ലീഡർമാരായി നിയമിച്ചതിൽ കെ‌എസ്‌യു ശക്തമായ പ്രതിഷേധമുയർത്തുകയാണ്. എന്നാൽ നിയമനത്തിൽ കെ‌എസ്‌യുവിന് കാര്യമില്ല എന്ന നിലപാടാണ് മുഖ്യമന്ത്രി വിഡി സതീശൻ സ്വീകരിച്ചിട്ടുള്ളത്.

പ്ലീഡർ നിയമനത്തിൽ ഒരു യുവ എം‌പിയുടെ ശുപാർശയുണ്ടെന്നും അത് ഷാഫിയും ഹൈബിയും അല്ല എന്നും വ്യക്തമാക്കിയായിരുന്നു കെ. ബാബുവിന്റെ വെളിപ്പെടുത്തൽ. ഡീൻ കുര്യാക്കോസിനെയാണ് ലക്ഷ്യമിടുന്നത് എന്ന ചർച്ചകൾക്ക് ഈ വെളിപ്പെടുത്തൽ കരുത്തേകുകയും ചെയ്തു. നിയമനത്തിൽ മുഖ്യമന്ത്രിയെ കാര്യത്തിൽ കുറ്റപ്പെടുത്താൻ കഴിയില്ലെന്നും എല്ലാ സന്ദർഭങ്ങളിലും രാഷ്ട്രീയം മാത്രം നോക്കാൻ കഴിയില്ലെന്നും അപേക്ഷകരുടെ യോഗ്യത കൂടി പരിഗണിക്കേണ്ടതുണ്ടെന്നും കെ. ബാബു പറഞ്ഞിരുന്നു.

പ്ലീഡർ നിയമന വിവാദത്തിൽ മുഖ്യമന്ത്രിക്ക് അനുകൂല നിലപാടുമായി കെസി വേണുഗോപാലും രമേശ് ചെന്നിത്തലയും രംഗത്തുണ്ട്. എന്നാൽ വിഎം സുധീരൻ പതിവുപോലെ മുഖ്യമന്ത്രിക്ക് എതിരായ നിലപാടിലാണ് എന്നാണ് സൂചന. മുഖ്യമന്ത്രിക്കെതിരെ പ്രതിഷേധം നടത്തിയ കെ‌എസ്‌യുവിന്റെ അലോഷ്യസ് സേവിയറിനെ പ്രശംസിച്ചുകൊണ്ട് സുധീരൻ രംഗത്തുവന്നത് ഇക്കാര്യം വ്യക്തമാക്കുന്നു. ഡീൻ കുര്യാക്കോസ് സതീശൻ വിഭാഗത്തോടു ചേർന്നു നിൽക്കുന്ന ആളായതിനാൽ വരും ദിവസങ്ങളിലും ഉൾപ്പാർട്ടി ഏറ്റുമുട്ടൽ ശക്തമാവുമെന്നാണ് സൂചന.